Эрзянь раськень оршамопельть

Википедиясто материал - аорев содамкундосто
Перейти к навигации Перейти к поиску
Эрзянь раськень оршамопельть
Изображение
Эрзянь раськень оршамопельть

Эрзянь раськень оршамопельть (руз. эрзский национальный костюм) — те оршамот, конататнень канесть эрзянь ломантне. Раськень оршамопелесь, кода мерить этнографтнэ, те велень эрицятнень оршамопелест. Эрзянь оршамопельтне ульнесть арсезь кезерень шкасто. Ули авань ды цёрань оршамопель. Сон ульнесь кода покшчинь ды озксонь ютавтомане, ульнесь эрьва чистэ якамонеяк. Эрзянь раськень оршамопелесь теевсь Россиянь европейской пелькссэ кушнка таркасонть, ды эйсэнзэ ульнесь алга ды верьга шожда оршамопель, телень ды тундонь-сёсксень лемпе оргамопель. Пек ламо улить мазылгавтомат.

Авань раськень оршамопелльть[витнемс-петнемс | витнемс-петнемс лисьмапрянзо]

Покай[витнемс-петнемс | витнемс-петнемс лисьмапрянзо]

Покаесь[1] – те панар, ансяк пек седе сюпавсто викшнезь. Сонзэ оршнилизь мирденень лисемстэ ды лия покшчива. Покай лавтовонь викшневкстнэнень мерильть сёрмат. Истят арткеть викшневильть покай алксонтеньгак (удалов), мерить тенст пельсёрмат (викшневи сёрманть пелезэ). Пельсёрматне ульнесть эрьва кодат ды пек мазылгавтсть весе викшневксэнть.


Пулай[витнемс-петнемс | витнемс-петнемс лисьмапрянзо]

Панар ды покай ланга, кона-кона таркатнесэ руця ланга, эрзянь аватне кандтнесть пулай[2] (пулакш, пулагай, пулокаркс). Сонзэ оршилизь 13 -14 иесэ ды кандтнесть куломозост. Пулайтеме тейтерь-авантень эзь мереве лиснемс ломань сельме икелев, сон лововсь пельсштапокс. Пулайтне ульнесть истякчинь ды покшчинь[3]. Истякчинсесь а вельть мазыель, тень кис покшчинсесь цитнесь эрьва кодамо тюссо. Пулаесь оршавиль карксамова, вельтиль эчке пукшотнень.

Покшчинь пулаентень мазылгавтомань кис стакшныть кшнинь ярмакт. Бути ярмакт арасть, тевс туить ашо эли тюжа тюсонь кшнинь бляшкинеть, вейкеть мазый плаштят. Пулаенть кавто пельга понгавтовить якстере ды пиже цёкот. Цёкопрянть эрзянь аватне кекшилизь кодавкске потс. Теде башка цёкотнень ды сурепулотнень эрзяватне мазылгавтнесть ашо тюсонь човалясо.


Кирьгашат[витнемс-петнемс | витнемс-петнемс лисьмапрянзо]

Кезэрень эрзяватне пек вечкильть мазылгавтомо кирьгаст, мештест, секс кандтнесть сюлгамот, ламо эрьгекерькст, эрьгень сиветь, конатненень мерильть кирьгаша[3].


Сюлгамо[витнемс-петнемс | витнемс-петнемс лисьмапрянзо]

Панаронь эли покаень сивенть эрзяватне чочилизь сюлгамосо[3](руз. брошь, брошка). Сюлгамотне эрсильть эрьва кодат: салмукс март оды салмукстомо. Эрзянь сюлгамосо весемеде сеедьстэ вастневить якстере, раужо, пиже, ашо, пачк невтиця эрьгть, човалят. Ожот, сэнть, тюжт мерицят вастневить седе чуросто. Сюлгамось кемекстави меште куншкас: панар сивень кавто пельга теевить килькшкеть, козонь понгавтовить сюлгамонь петне. Бути сюлгамось салмукс марто, сон чочави салмуксонть вельде.


Эрзянь прясюлмавкст[витнемс-петнемс | витнемс-петнемс лисьмапрянзо]

Седикелень эрзянь тейтертне коняваст кандтнесть прясуре, лия таркава сонензэ мерсть пацяконя[3]. Мирденень лисемадо мейле пряс путовиль авань панго. Ульнесь натой истямо кой, мерильть тензэ прянь сюлмамо: те чистэнть одирьванть прянзо сюлмилизь авакс.

Авань панго[витнемс-петнемс | витнемс-петнемс лисьмапрянзо]

Эрзянь прясюлмавкстнэ ульнесть эрьва кодат. Мирденень максозь аватне якильть пангосо[4]. Сынь а вейкетельть. Ульнесть сювозь прят, конат молилть скалонь сюро эли ансяк чачиця ков ёнов, ульнесть келей конякс марто, Самарань ды Симбирень эрзятне сынст лемдить сорука эли шлыган.

Икельга паця[витнемс-петнемс | витнемс-петнемс лисьмапрянзо]

Панаронть ды руцянть ланга эрзяватне кандтнесть мазый икельга пацят[4](руз. фартукт), конатнесэ ульнесть аволь ансяк викшневкст, вастневсть черьведьметь, кружеват, плаштят, плёскат, човалят ды натой ярмакт. Орданбуень, Отяжбуень, Чаунзань, Покш Березникень, Дубенкань ды Кочкурбуень эрзяватнень икельга пацяст а пек явовсть вейке вейкеде. Самарань эрзяватнень икельбацяст ульнесть седе теинеть ды тустосто викшнезь.

Цёрань панар[витнемс-петнемс | витнемс-петнемс лисьмапрянзо]

Эрзянь цёрань[4] панарось викшневиль-ставиль истямо жо коцтсто, кодамосто теевиль авансесь. Панаронть кувалмозо кумажа видьс, карксавиль цёко марто мазый каркссо. Ломань юткс лисема панарось викшневиль седе сюпавсто, истякчинсесь – теине кикскесэ. Мазылгавтовильть панар алксось, ожа петне, сивесь, мештесэ чочамо таркась ды лавтовпрятне. Покшчинь панаронтень педявтневильть цитниця плёскат, карксцёкотнень пест мазылгавтовильть човалясо. Истямо ладсо цёрань ды авань панартнэ поладыльть вейке-вейкень ды вейсэ невтильть пек мазыйстэ. Неень шкас эрзянь цёрань панарт пачкодсть пек аламо.

Фотокувт[витнемс-петнемс | витнемс-петнемс лисьмапрянзо]

Вано истяжо[витнемс-петнемс | витнемс-петнемс лисьмапрянзо]

Лисьмапрят[витнемс-петнемс лисьмапрянзо]

  1. «Чилисема» 2004 ие №2, 16 лоп. (эрз.)
  2. «Чилисема» 2004 ие №3, 18 лоп. (эрз.)
  3. 3,0 3,1 3,2 3,3 «Чилисема» 2004 ие №4, 15-18 лоп. (эрз.)
  4. 4,0 4,1 4,2 «Чилисема» 2004 ие №5, 15-18 лоп. (эрз.)