Свадьбантень анокстамо

Википедиясто материал - аорев содамкундосто
Перейти к навигации Перейти к поиску

Свадьбантень анокстамо — те эрзянь полань саемань койстэнть омбоце пелькс.

Казнень анокстамо[витнемс-петнемс | витнемс-петнемс лисьмапрянзо]

Симемадо мейле невестась ушоды анокстамо свадьбантень: анокстамо казнеть ды урнеме тонавтнеме. Сехте пек невестась мелявты казнетнень анокстамодо. Весе казнетнень эряви теемс эсеть кедьсэ. Эрявить авань 10—20 викшнезь панарт, зняро жо церань ды зярыя викшнеэь кокошникть, нардамот, пацинеть ды седе тов. Нурька шкасто весе а теевить. Секс свадьбань казнетне анокставить зарыя иень перть седе икеле. Теде башка, эрзянь тейтересь весень марто вейсэ тельня ды кизна важоди кудонть перька, пиресэ, паксясо. Ансяк аштемаковсто (максневи тейтертнень туртов) тейтересь важоди эсензэ лангс. Симемадо мейле сакшныть лездамо ялганзо

Урнеме тонавтнема[витнемс-петнемс | витнемс-петнемс лисьмапрянзо]

Истя жо невестанть мелявтовтыть свадьбань урнематне. Эрзянь свадьбань урнематне складявсть-теевсть пингеде пингес. Сынь кандовить ве поколениясто омбоцес ёвтнезь. Эрзянь тейтертне ушодыть сынст тонавтнеме вишка пингстэ саезь, зярдо тейтернентень топодить 7 — 8 ие, сон яки весе свадьбань чокшнень, косо урни невестась. Мейле лецтни сынст мельс. Пек лезды кукласо налксемась. Тейтернесь налксемстэ урни невестанть кисэ, моры сваханть кисэ. Тейни весе сень, мезе эрси свадьбасо. Ансяк урнематне пек ламо, ды невестантень савкшны ламо тонавтнемс свадьбадо икеле.

Чинь путома[витнемс-петнемс | витнемс-петнемс лисьмапрянзо]

Ловозь, кона шкантень весе те анокстави, цёра женихенть тетязо, лиясто авазояк кавто-колмо родня марто молить сватонтень свадьбань чинть кочкамо. Те коентень мерить — чинь путома. Ней сынь сыть сватонтень кода роднянень, ускить мартост весе: вина, ярмакт, медь, кона эряви эрьва свадьбасто кулозь малавиксэст валкундамост кисэ.

Тейтеренть тетязо терди эсенээ роднянзо кортавтомо свадьбань чинть. Невестась таго кази весе роднятнень-малавикстнэнь.

Урнеме серьгедема[витнемс-петнемс | витнемс-петнемс лисьмапрянзо]

Свадьбань чинть путомадо мейле невестась ушоды чокшне ланга урнеме. Васенцеде урнеманть ушодсы вень куншкава ушосо. Лиси чопода вентень ськамонзо. Тевесь пек стака. Чилисема енов невестась ушоды:

Вере, вере, вере Паз!
Верешки Паз сияка!
Ниле ёнов сюконян,
Ниле пазнэнь энялдан.
Кона Пазось максымим,
Секе Пазось чануязман
Чис сэринень лажамо,
Чис сэринень вальмамо.
Тетянь юртонь кирдизэ,
Тетянь кардо сяркозо!
Иля тандатт шумнедень,
Сэрь ёмамо вайгельдень, —
Аволь тонть мои тандавтлян.
Аволь тонть мон тормошан.
Эсь сэринень мои лажан,
Эсь сэринень коволян.

Мейле невестась сы лисьмантень, юты перьканзо колмоксть, сюкони ды урни:
Лисьмань кирди, тейтерней!
Лисьмань кирди, кастарго!
Иля тандадо шумнедень,
Сэрь ёмамо вайгельдень:
Аволь тонть мон тандантнян,
Аволь тонть моy тормошан —
Монсень сэрень коволян,
Монсень эрямон мон лажан.
Седь икеле эрямсто,
Тейтерькс пингень печтямсто,
Валске рана сакшнылинь,
Чокшне позда сакшнылинь.
Эзинь сакшно лангозот
Кол ёмамо крик маро.
Киштезь аштильть пильгинень,
Пейдезь аштиль кургинем.
Валске рана самосто,

Чокшне позда самосто,
Паряк, токалить удомсто,
Паряк, токалить оймамсто,
Паряк, чалгавкшнынь
Виде килей сэреть лангс,
Мазы умарь тюсот лангс,
Чевте-паро алксот лангс,
Сэрей-паро прялксот лангс;
Паряк, чалгавкшнынь
Котова таргазь палят лангс,
Кумажас путозь руцят лангс,
Матразь коцт ашко пильгеть лангс,
Сия ведьс навазь карь прят лангс,
Илямака осудя:
Седе икеле эрямсто,
Тейтерькс пингень печтямсто,
Киштезь аштильть монь пильгень,
Пейдезь аштиль монь кургом.

Лисьмадо мейле тейтересь сы ванькс таркас, кона икеле ульнесь эрьва кудонть боксо ды ванстови эрьва кодамо рудаздо. Тесэ тейтересь таго сюкони ды энялды покштянзо-бабанзо икеле:

Покшт покштинень-бодинень!
Мода мазыть бабинень!
Сырк мерезэ, бодинень,
Матразь, оймазь киськиненк,
Кепсть мерезэ, бабинень,
Раужо човоля модыненк.
Покшт покштинень-бодинень!
Мода мазыть бабинень!
Аволь шкастонк, порастонк
Мазы леменк ушодсынь,
Мода челькенк явавтсынь.
Аволь пси пачалксес тердтядызь,
Аволь пси ямнес туйтядызь.
Кува, кува тердтядызь?
Кува, кува туйтядызь?
Тердевлидизь покш киява,
Покш кинь ламо якинзэ,
Ламо каршо понгинзэ,
Ламо мельга сасынзэ:
Пелян, покш покштинень бабинень,
Берянь ломань вастадо,
Берянь валонь тергиде.
Тердевлидизь бодинень,
Туевлидизь, бабинень,
Ош порядка юткова,
Москов ульцянь кувалма, —
Ульцянь ламо неинзэ,
Ульцянь ламо рединзэ:
Пелян берянь сельмеде,
Пелян берянь варчавксто.
Тердевлидизь, бодинень,
Туевлидизь, бабинень,

Ташто тайной киява,
Ташто кадонь киява.
Пелян, покш бодинень бабийень,
Одранк, саванк сезневить,
Тарад прява кадновить.
Тердевлидизь, бодинень,
Туевлидизь, бабинень,

Мода алга киява,
Мастор алга киява.
Хоть мода алга кинь
Арась кияк якизэ,
Арась кияк пакизэ,
Ламо мода пульнезэ,
Ламо мода челькезэ.
Пелян, бодинень-бабинень,
Кисеянь одранк, саванк
Мода пульне сайсынзе,
Мода чельке муйсынзе.
Садоя, бодян, садоя,
Садоя,бабан,
Велень бодянь кснав рядга.

Туеде, бодян, туеде,
Туеде, бабан, туеде
Кеверить кснавт-сельведькеть.
Садоя, бодян, садоя,
Садоя, бабан, садоя
Каль пулова киява,
Пешкс пулова киява.
Туеде, бодян, туеде
Чулгонь пештькеть валнэде.

Ванькс таркастонть невестась моли кудонть пелев. Те шкан тень карми ушодовомо валскень зорясь. Невестась пшкади зорян тень:

Зоря пувась толонзо,
Сялксь кувака чевензэ,
Уськеть, уськеть сятконзо,
Рисьметь, рисьметь куловзо,
Масторонь келес валдозо,
Менелень келес зэрькезэ.
Тиринь тетянь кардайс
Зоря валдо эзь токак,
Зорянь шумне эзь марявт:
Тиринь тетянь кардайсэ
Мон пайстомо ломанян,
Пайстомо сэрень мон лажан,
Грешной сэрень коволян.
Мейле пшкади эсь велень эрицятненень:

Велень бодят, бодинень,
Велень бабат, бабинень,
Велень урят, алинень,
Велень урят, уринень,
Кона, можот, токати
Тантей паро удомсто,
Кона, можот, токати
Апак удок, аштемстэ.
Кона токати аштемстэ,
Се марясазо монь шумом,
Сэрь ёмамо вайгельнем.
Кона некшнесь берянень,
Марсесь берянь монь валон,
Се эрьгедезь мерезэ:
Коля, сука Охима (поланть лемезе)
Чис сэрензэ коволи,
Чис сэрензэ сон лажи.

Кона эзь некшнек берянень,
Эзь марсек берянь валынень,

Се мерезэ монь жалязь:
Коля, грешной Охима
Пайстомо сэрензэ сон лажи,
Грешной сэрензэ коволи.

Неть урнематнень прядомадо мейле сови кудос ды полады:

Ох, тетякай-тиринем!
Ох, авакай-ванынем!
Мезень удозь саидизь,
Мезень оймазь муидизь,
Или пек эрьгедиде
Монь ёмамо чинезэнь?
Ох, тетякай-тиринем!
Ох, тетякай-ванынем!
Удок ней, тетякай, удок!
Удок ней, тетякай, удок!
Удок ней, тирякай, удок!
Мелявтлить, тетяй, мелявтлить,
Ризнэкшныть, тиряй, ризнэкшныть,
А ютыкс пижеть а юты,
А солыкс киветь а солы;
Маштсь, тетякай, ней рисксэть,
Маштсь, тетякай, мелявксот:
А ютыкс пижеть — тонть ютась,
А солыкс киветь — тонть солась.
Мон ней, тетякай-тиринем,
Пижедеяк пек ютан,
Киведеяк пек солан.
Ох, тетякай-ти нем!
Ох, тетякай-ванынем!
Мейс безардить эйстэдень?
Мейс ёмавтат мон эйсэнь?
Или кудот вишкингадсь?
Или сюрот тонть эзь чачт?

Пшкади аванстэнь:

Авай, авакай-ванынем!
Авай, авакай-тиринем!
Маштокшныть, авай, трямон ваномон,—
Кизэ чинень самосто
Шёлкке потсо трякшнымик,
Теле чинень самосто
Пухке потсо трякшнымик;
Монь трямостон-ваномстон
Эзить содакшно удомо,
Эзить содакшно аштеме...
Эзить машт, авакай, эзить, машт,
Ёмавтомон эзить машт!

Чокшне лангонь урнемат[витнемс-петнемс | витнемс-петнемс лисьмапрянзо]

Урнематненень пурнавкшныть тейтерть ды од ават. Церат а эрсить. Весе инжетне урнема шкасто чатьмонезь аштить невестанть икеле, ламотне эйстэст авардить. Невестась ашти тодов лангсо озадо, кедьсэнзэ кирди ашо паця, конаньсэ нартни сельведензэ. Те пацянтень мерить — лажамо паця. Икеле шкатнестэ невестатне урнесть кеветее ды седе ламо чокшнеть. Ней кавто — ниле чокшнеть. Тесэ максови васень ды остатка чокшнетне.

Васенце чокшне[витнемс-петнемс | витнемс-петнемс лисьмапрянзо]

Мень седей кирдезь саимим!
Мень седей оймазь муимим!
Кевкс кеведнясь седеем,
Повкс поводнясть сельведень.
Или мон эрьгединь
Лужадозан — урексчис,
Или мон пек кецинь,—
Лондадозан вардоксчис.
Мондень икеле урексчись
Эрьгедезэ-кецязо,
Мондень икеле вардоксчись
Радовань седьсэ аштезэ.
Промодо, ялган, промодо!
Промодо, оян, промодо!
Сэрь лажамо тарказон,
Сэрь вальмамо тарказон!
Умок марясынь, ялгинень,
Мазы циповкат вальгеенк
(или Москов баяга вальгеенек),
Умок марясынь, ялгинень,
Сахьянской котанк чикордыть,
Пуховой цюлканк каштордыть.
Лисикскелинь каршозонк,
Лисикскелинь вастомонк,
Тиринь ваньшь, тетинем,
Икельган таргась таргань столь,

Удалган пирясь кшнинь пирявт,
Вить пельган нолдась
Келейстэ чуди-чуди ведь,
Керш пелень сон вачкась
Сэрейстэ палы-палы тол.
Ютыкскелинь столь трокска,
Пелинь тетянь мельнеде,
Норовавань кежнеде.
Ютыкскелинь пирявтсть трокс,
Кедень вентинь - эзть сатот,
Пильгень чалгинь — эзть пекстак.
Печкикскелинь, ялгинень,
Чуди веденть мон трокска-
Пелинь, ялгинень,
Бояраваксчим начки.
Ютыкскелинь, ялгинень,
Палы толонть мон велькска -
Пельстия, ялгинень,
Бояраваксчим киртави.
Эрь, эзинь лисевть каршозонк,
Эрь, эзинь лисевть вастомонок,
Илядоя пеняця,
Илядоя осудя.
Аштеде, ялган, евтнеса,
Кода манявинь урексчис,
Кода манявинь вардоксчис:
Теде веде удылинь
Вере, вере утомсо,
Вере утомонь цюлансо,
Цюлан мазы вальмало.
Вальмань сэрьсэ алксомоль,
Лавсянь сэрьсэ прялксомоль.
Пелеведе икеле,
Атякш морамодо мееле,

Сайтець лембе монь вельксэм,
Калготкстомсь чевте монь алксом,
Алкиньгадсь сэрей монь прялксом,
Штатотсь тантей удомам.
Чикор мерькшнесь ялгинень,
Тиринь тетянь ортазо.
Лавузнякшность, оинень,
Тиринь тетянь кисканзо.
Варчинь вальма чирева:
Урексчи ашти вальмало
Тиринь тетянь тюскесэ;
Ве кедьсэнзэ сахъянской котат,
Омбоцесэ — пуховой цюлкат.
Манчесь, манчесь нень эйсэ,
Эзинь манявт мон тензэ:
Тиринь тетянь вийнесэ
Эзинь пиштлек котадо,
А пуховой цюлкадо.
Мейле сакшнось, ялгинень,
Ванынь авань тюскесэ,
Парсей кесак кедьсэнзэ.
Манчесь, манчесь нень эйсэ,
Эзинь манявт мон тензэ:
Ванынь авань вийнесэ
Эзинь пиштлек суреде.
Оштё сакшнось, ялгинень,
Вечкема лелянь тюскесэ:
Мазыть семеричкат кедьсэнзэ,
Сувтем ленгень карть кедьсэнзэ.
Манчесь, манчесь сынст эйсэ,
Эзинь манянт мон тензэ:
Вейкине лелянь вийнесэ
Эзинь пиштлек семеричкадо,
Сувтем ленгень карнеде.
Мейле сакшнось, ялгинень,
Вечкема ялгань тюскесэ.
Мазы алнэ кедьсэнзэ,
Троицянь каштаз прясонзо:
А ялгинем, а Охим!
А оинем, а Охим!
Тиринь тетять вальмало
Чачозь мазы поляна,
Пиже лугань поляна.
Ниле рядсо тикшезэ,
Ниле рядсо лукшозо.
Васенце ряд тикшезэ —
Пильге лапава ташто гавданзо.
Омбоце ряд тикшезэ —
Карькс тапардамга
Тантей цяпор тикшезэ.
Колмоце ряд тикшезэ
Кумажава керясь-тикшезэ,
Нилеце ряд тикшезэ —
Карксамова горнипов цецязо.
Се полянасть кунчкасо
Виев кужо эй налки,
Се полянасть кунчкасо
Виев кужо эй чары.
Весе ялгат киштить, морыть,
Весе оят пеедить, шутить,
Ансяк арасят тон, ялгай,
Ансяк арасят тон, оям.
Содасынк, ялгинень,
Кужо вечки ульнекшнынь,
Ялга печки ульнекшнынь.
Истя манявинь урексчис,
Истя манявинь вардоксчис

Ялгатненень пшкади:

Адядо, ялгинень, адядо
Килей пулова якамо,
Тарадто тарадс кунсеме,
Лопадо лопас чалксеме.

Орта вакссо урни:

Сакшнодо, ялгай, сакшнодо
Сэрь лажамо тарказон.
Сакшнодо, оян, сакшнодо
Сэрь вальмамо тарказон.
Илядо безарть эйстэдень,
Илимизь кадт тынь скушнас,
Илимизь кадт тынь тошнас.
Илядо пель, ялгинень,
Тиринь тетянь мельнеде,
Илядо пель, оинень,
Ванынь авань мельнеде,
Илядо пель, ялгинень,
Перекладонь сивмеде,
Илядо пель, ялгинень,
Алов мостонь менемде.

Остатка чокшне[витнемс-петнемс | витнемс-петнемс лисьмапрянзо]

Остатка чокшнесь эрси седе нурькине. Невестантень эряви оймсемс. Ильтямсто невестась терди ялганзо свадьбас:

Аштеде, ялган, аштеде,
Тыненк наказ наказан,
Тыненк приказ приказан:
Валске рана стямосто
Ашо пацят сюлмседе,
Таргань палят оршледе,
Лиседе тынь, ялгинень,
Тиринь тетянк орта лангс,
Варштадо тынь, ялгинень,
Тиринь тетянь турба лангс:
Бути лиси, ялгинень,
Тиринь тетянь турбава
Ашо мазы качамо,
Сестэ тиринь авинем
Кудосо семиянь кис стряпаи.
Бути лиси, ялгинень,
Тиринь тетянь турбава
Виев штурма качамо,
Сестэ тиринь тетинем
Покш поминкат кепеди
Пайстомо лемень ливамо.
Сестэ садо, ялгинень
Мазы лемень ливамо,
Мазы лемень кундамо.
Илядо учо тердемат -
Кучмо таркам монь арась,
Арась чожда посолом -
Пиже дугам сазором,
Мазы дугам ялаксом.

Истя прядовить чокшнень урнематне свадьбадо икеле.

Казнень рамсема[витнемс-петнемс | витнемс-петнемс лисьмапрянзо]

Вейке базаронь чистэ сватнэ невестанть марто молить базаров казнень рамсеме. Базардо мейле женихенть тетязо кавани сватнэнь. Невестанть кудос пурнавкшныть ялгат ды шабрат рамавкстнэнь ванномо. Невестась невтни ды урни:

Ох, лужадовлинь лужадозь,
Лондадовлинь лондадозь.
Ванодо, ялган, ванодо,
Ванодо, пижеть дугинень,
Истя якинь, ялгинень,
Прянь ёмавтома базаров
Анок ярмаксо рамсеме.
Тов молеместэ, ялгинень,
Ки чирестень касокшнось
Умарина сад чувто.
Чувтонть васень тарадсо
Бояраваксчим ашти озадо,
Лажамо паця прясонзо,
Сельведь паця кедьсэнзэ.
Саия бояраваксчим,
Чинь каршо лавкас ветия
Мазы нарядонь рамсеме.
Бояраваксчим, ялгинень,
Эзь радова мазы нарядтнэс,
Эзь пеедезевть кургозо.
Зярс яксилинь, ялгинень,
Эсь ярмаксон рамсеме,
Весёлгалиль тейтерьксчим,
Пеедезь якиль оляксчим.

Сурень ускома[витнемс-петнемс | витнемс-петнемс лисьмапрянзо]

Симемадо мейле зярьтя чинь ютазь ававтось уски невестантень викшнеманень понань суреть: якстереть, сэнть ды пижеть. Суретнень марто ававтось уски кши, курник, сюкорот. Суретнень ускить покшчинть чистэ. Бути невестась эсест велесэ, весемесь кандови ялго, бути лиясо, усковить алашасо. Эсест велесэ ававтось ильтицякс саи тейтерне, лия велес кучеркс-церыне. Ававтонть каванить. Туемадо икеле казить тензэ панар, тейтернентень - паця. Морот ды урнемат а эрсить.

Сёрм.:[витнемс-петнемс | витнемс-петнемс лисьмапрянзо]

  • Тиринь вал, Литературань коряс хрестоматия эрзянь школань 8-це класстнэнень, Морд. кн. изд., Саранск, 1993, с. 255
  • Евсевьев, М. Е. Мордовская Свадьба, 1931, сс 21-23