Олячив Рав-Урал

Олячив Рав-Урал

Олячив Рав-Урал (руз. Свободный Идель-Урал, татар. Азат Идел-Урал) — Рав чирень раськетнень айгемась, кона кирди тёкшмелекс олячив эрямо Мордовия, Чувашия, Марий Эл, Татарстан, Удмуртия ды Башкортостан мастортнэсэ стявтоманть. Теема неть кото мастортнэнь интеграциянь вейсэндявкс, вейсэнь кордон марто, экономикань пертьпельксэнть ды вейсэнь камелявтомо системанть марто.

Эрямопингеденть

2017 иень ацамковонь 26 чистэнть, Россиянь пекстамокудостонть лись олячив татаронь раськень айгемань лидерэсь, Рафис Кашапов, кона ульнесь озавтозь 2015 иень умарьковсто, Крымень аннексиянь критикань кисэ. 2018 це иень даволковонь васенце читнестэ сон тусь Украинав, косо аламо шкань ютазь, васстызе, вемельс мартонзо прыцянть, Мордовиясо чачозенть, Боляень Сыресь, эрзянть, таколинь ушманонть.

21 це эйзюрковонь чистэнть Рафис Кашапов ды Боляень Сыресь, апокшке вемельспрыцянь куронть марто, ютавтсть Кевошсо пресс-конференция, конасонть яволявтызь "Олячив Рав-Урал", раськень айгемань, вейсэндявксонь тееманть.

Васенцеть, эсь важодемань, вете ковтнэнь кувалт, организациясь эзь пшкале сепаратистэнь позициятнестэ, сонзэ декларациятне ульнесть тюремадо Равчирень мастортнэнень реалень суверенитетэнть велявтоманть кисэ. Ансяк зярдо "Госдумась" кемекстызе тиринь кортамотненень тонавтомадонть закононть, мейсэ эшкизь програматнестэ тиринь кортамонтенень тонавтоманть, "Олячив Рав-Урал" полавтызе эсь тёкшмеленть.

2018 це иень медьковонь 25 -це чистэнть "Олячив Рав-Урал" яволявтсь снартнемадонзо эсь мельсэ эрицят, нациянь-демократиянь Эрзя-Мокшо, Чувашия, Марий Эл, Татарстан, Удмуртия ды Башкортостан мастортнэнь теемадонть.

Тень пингстэ ульнесь ёвтазь: айгемась кирди мельсэнзэ каршо аштеманть виень тевснолдамовтомо. Аламонь чинь ютазь, Россиянь кулянь сравтнемапельтне пачтясть куля Рафис Кашаповонь каршо, од чумочиде тевень ушодомадонть. Келят, сон путсь Инеалтымас информация, конасонть кирвастни яттоньчи рассань ды раськень, кортамонь ды кемамань кувалт.

Ідеологиязо

"Олячив Рав-Уралонь" Баннерэсь РФ посольстванть пирявксонзо лангсо.  2018 ие

"Олячив Рав-Уралонть" позициясь истямо: - вейсэнь раське -политикань айгема, кона юровтозь демократиянь ды гуманизмань принциптнэнь лангсо. Тёкшмелезэ - Эрзя-Мокшонь, Чувашень, Мари эл, Татарстанонь, Удмуртиянь ды Башкортостанонь, эсь мельсэ эриця, националень  демократиянь мастортнэнь теемась. Ине тёкшмелесь, те социалень, кульурань ды кемемань, эрзятнень, мокшотнень, чуваштнэнь, маритнень, татартнэнь, удмуртнэнь, башкиртнень мельтопавтомаст реализациянть кисэ тюремась.

Рав -Уралонь республикатнень статусост

Организациянть тёкшмелесь те Эрзя-Мокшонь, Чувашиянь, Марий Эл, Татарстанонь, Удмуртиянь ды Башкортостанонь, эсь мельсэ эриця национал -демократиянь мастортнэнь стявтомась. "Олячив Рав Уралось" яволявты эсь мельденть пурнамс вейс неть националень республикатнень вейке интеграциянь вейсэндявксос (кода Европань Вейсэндявксось). Айгеманть декларациясонть ёвтазь: -эрьва республикась, сонсь прымельс эсь потмо ды ушонь политикасонть. Тень пингстэ весе вейсэ мелявтыть эсь вейсэнь камелявтомодонть, вейсэ ванстыть эсь вейсэнь кордонтнэнь, сынст ули вейсэнь таможнянь пертьпельксэсь ды ярмактнэяк.

"Олячив Рав-Урал" айгсманть юровтыцятне, керш ёндо вить ёнов: Боляень Сыресь (эрзя), Ростислав Мартынюк ("Эрзянь Вал куронть юровтыцязо), Рафис Кашапов (татар), Ильмир Имаев (татар). Киев ош, 2018 иень, эйзюрковонь 21 чистэнть.

Тень пингстэ "Олячив Рав -Урал", программань презентациясонть, тешкстынзе эсь тёкшмелензэ ды кармавтоманзо "Рав -Уралонь" республикатнесэ эсь койсэ эрямонь ушодоманть видьс.  Сынсть ютксо истят: -зярс неть кото республикатне совавтозь РФ -ияс, сынст юткоёжост ды федералень центранть марто юткоёжотне тешкставить сёрмацтозь вейсэньлувтнэсэ. Эрьва "Рав -Урал" республиканть ули мельтопавтомазо вето лангс, бути кевкстематне токить сынст интереснэс. Теде башка эрьва республиканть ули мельтопавтомазо, эсь мельсэ, лия мастортнэнь марто ды раськеютконь организациятнень марто юткоёжодо вейсэньлувонь сермацтомадонть. Эрьва республиканть эсензэ гражданинэнь статусось ды гражданствадо инекоесь.

Ушманвиесь ды армиясо вардамось

Идель-Уралонь эрьва республикасонть эряви теемс специалень ушманонь курот, косо ютавтыть вардоманть республикань весе раськетнень эрицятне. Ушманвийсэ эли полициясо вардоманть, вейке иень кувалт, ютавты эрьва цёрась 18-30 иетнесэ. Эрьва ломанентень, кона ютавтызе те вардоманть максови мельтопавтома кирдемс кудосо, ды кантнемс леднемапель ды лията тюрьмаз. Тюрьмазось (оружие) миеви сынест 21 иеденть мееле ды ансяк масторкирдиенть микшнема кдотнесэ.

Айгемась сти лия республикатнесэ армиясо вардоманть каршо.

"Олячив Рав-Уралось" карми снартнеме яволявтомс Рав -Уралонь республикатнень зонакс, косо арась товтюрьмазось (ядерное оружие). Айгемась сырьгсты (выступает) товтюрьмазонь республикатнесэ ускоманть кисэ ды леднема тюрьмазонь зярокстенть аламолгавтома кисэ.

Раськень (националень) политикась

"Идесынек Рав-Уралонь кортамотнень" акциясь Киев ошсо Россиянь посольсьванть каршо. 2018 и. чадыковонь 28 -це чи.

Айгемась яволявты эрьва раськень мельтопавтомадонть тонавтнемс эсь школатнева, университетнэва ды лия тонавтнема таркатнева эсь раськень кортамосонть.

Кирдий кортамотнень тонавтнемась кемекстави эрьва республиканть Конституциясонть васенце тонавтнема чистэнть ды меельце тонавтнемань чис. Атянь Эземтнесэ, топавтома куротнесэ верде алов, совавтови квотань принципесь, конань кувалт тескень ундокс раськетнень кочказьтнеде свал улевель лиятнеде седе ламо.

Рав-Уралонь территориясонть максовить гарантият тескень раськетнень культурань автономиянь теемадонть, теевить услойть сынст культурань ды социалень мельтопавтоматненень, васенцекс, эсь тиринь кортамосонть тонавтнеманть лангс ды мельтопавтома эсь пурнавкстнэнь ды кулянь сравтнемапельтнень тееманть лангс.

Тевеньлувсонть ды кирдийтевень вецямосонть тевснолдавить кирдийкортамотне (государственные языки), лия РФ мастортнэнь марто — рузонь келесь. Социалень пертпелькссэнть тевснолдавить Идель Уралонь кирдийкортамотне. Весе велетненень, оштнэнень ды топонимкань объектнэнень велявтовить сынст аутентичнойть лемест, конат ульнесть полавтозь колониалень политикань шкатнестэ.

Тевензэ

2018 иень чадыковонь 18 -це чистэнть, "Олячив Рав-Урал" вейсэдявксось ютавтсь пикет РФ -нь Киевсэ посольстванть икеле, косо тердсь -кармавтсь лоткавтомс Рав -Урал Республикатнесэ тонавтома системанть рузыявтоманзо.

"Олячив Идель-Уралонь" важодемань юртонь ённтнэ превалдомавтомасонть ды мельтопавтомаидемасонть. Европань мастортнэсэ Россиянь Федерациянь дипломатикень икелестявтомакуротнень каршо, активистнэ ютавтыть митингт ды пикетт, конатнень тёкшмелесь ургатевтемс мельпутоманть Равчирень ундокс раськетнень проблематнень лангс.

Айгемась лезды ярмаксо, политикань кувалт Россиясо пекстазьтнень, ды сынст инескеттненень, канды мода масторонть весэксчинтень эрзянь, мокшонь, чувашень, марий элэнь, татаронь, удмуртонь ды башкирэнь раськетенень эрямодост кулятнень.

"Олячив Рав-Уралось", зняроксть ковстонть аноксты ды нолды Инеалтымасонть кулят эрзякс. Лиснить мода масторонь политикадо, экономикадо, спортто ды культурадо кортамот. Теде башка весть ковстонть лисни "Торпингень блокнот" программась, конасонть ёвтневи мода масторсонть конфликтнэде, ёвтневи мезе одось теезь тюрьмазтнэде ды эрзя раськень торпингень историядонть.

Кортамотнень идема

Айгеманть васенце массань акциякс кармасть публикань онксоньсаематне, конат ульнесть алтазь эрзянь, мокшонь, чувашонь, маринь, татаронь, удмуртонь ды башкирэнь кортамотнень идемантень.

2018 це иень чадыковстонть ульнесь ушодозь раськеютконь адвокатскоень "Идесынек Рав-Уралонь кортамотнень!" компаниясь. Сонзэ ютавтомсто активистнэ Рав-Уралсо, ды кордононзо томбале, публикань таркатнесэ, тейсть фото плакат марто, конатнесэ ульнесь сёрмадозь эсь кортамотнень идемас тердема. Фототне ульнесть сравтнезь социалень алтыматнева ды тердсть кортамонь зэментень ды рузыявтоманть каршо стямонтень.

Компаниянть прядомакс кармась 2018 це иень чадыковонь 28 чистэнть, ламо масторга, Россиянь Федерациянть дипломатонь икелестявтомакудотнень ве шкань пикетт. Акциятне ютасть "Идесынек Рав-Уралонь кортамотнень!" лозунгонть ало. Сынст тёкшмелесь ульнесь ургатевтемс мода масторонь вейсэксчинть мельпутоманзо Рав-Уралонь раськетнень: эрзятнень, мокшотнень, маритнень, чуваштнэнь, удмуртнэнь, татартнэнь, ды башкиртнэнь Московсо рузыявтомантень.

Акциятнень организатортнэ кортасть пикеттнэсэ истя:

...Татартнэ те омбоце ламокстень кувалт Россиянь Федерациясонть раське. Минь виевстэ кирдтяно эсь тиринь койтнес, кемемас ды кортамотнес. Минь снартнетяно ванстомс эсь раськенть, улемс татарокс. Ансяк минек мелявтоматнень а яви Московось. Сон снартни весе РФэнь раськетнень велявтомс россиянинэкс ды нардамс минек идентитасчинть. Аумонь невтевксэсь те -агрессияв школань программатнестэ раськекортамотнень эшкемась. Минек школатнесэ кармавтыть тонавтомо ансяк рузонь кельсэ, ды аволь рузтнэнень, нарьгазь, мерить сёрмадомс вешема эсь масторсонть эсь кортамосонть тонавтнемадонть. Раськетнень активистнэнь, конат стясть рузыявтоманть каршо, кеместэ лепштить полициясь ды ФСБэсь. Бути минек, ламомиллиононь татаронь раськесь истя майси -мезе кортамс Рав-Уралонь лия раськетнеде, невтемакс чуваштнэде.

— кортась "Олячив Рав-Урал" вейсэндявксонь юровтыцясь, таколинь политикань кис пекстазесь Татарстансто Рафис Кашапов.

Москва вети эсь прянть Рав -Уралонь раськетнень марто истя, кода ГУЛагонь администрациясь пекстазьтнень марто. Минек пансить ды терроризовить, саить контрольс эрьва вейсэксчинь эряза тевенть. Тень пингстэ цивилизацияв мирэнть туртов Кремлясь свал сульти, келят "им всё можно". Келят сынест кияк а меши кортамс тиринь кельсэ ды морамс эсь моротнень, ансяк кадык сынь тень теить зэхельстэ, салава, кадык "мельтопавтомат а люкадить"! Натой улить истят тонавтозь морамо ды киштемакурот. Сынст невтить прессантень эрьва кодамо "праздникка", инечитнестэ. Ансяк кияк а невти эрзянь бизнэсменнтнэнь, шоу бизнэсэнь тештетнень, эли мельскармавтыця политиктнэнь. Мейсь? Сынь арасть! Россия а максы минек раськентень икелев айгеманть. Миненек максозь ансяк чахмась...

— ёвтни "Олячив Рав -Урал" вейсэндявксонь юровтыцясь, эрзянь сёрмадеесь Боляень Сыресь.

Айгеманть активистнэ, ламот мода масторонь ужотнестэ, эрязасто комментувить РФэнь кортамонь политиканть, Рав-Уралонь школатнесэ кирдийкортамотнень тонавтомань пиретеманть.

2018 иень умарьковстонть, "Олячив Рав-Уралонь" юровтыцясь, Боляень Сыресь ютавтсь Киевошсо Украинань журналистнэнь туртов пресс-конференция, конасонть сялдызе Равчирень  школатнень рузыявтоманть. Активистэсь тешкстызе, -течинь Россиясонть раськекортамонь тонавтнемась нолдазь невтемань, "показухань" видьс, "литературщинань" койтнес, зярдо раськекортамонть тевснолдыть ансяк  раськень мельтопавтомань вейкетьксчинь невтемас. Ансяк невтемас. Сон ютавтсь аналогия Украинань "шароварщинанть" марто,  СССРсэ ютавтозенть, конань смустезэ ульнесь меремасонть"вишкараськетненень" киштемс -морамс, валморот ёвтнемс, ансяк "а эцемс" политикас, политикас кона а сульти империянь койтнэнь ды лувтнэнь.

Россиясо, кода СССРсэяк, лият раськетнень мельскармавтыть рузонь келенть приоритетностьсэнть, кода икелемолицясонть. Ды тень пингстэ снартнить мельскармавтомо тиринь кортамотнень омбосортсонть. Нама, улить вейсэндявкст, курот, конат нежедить эрзянь кортамонть важодемасост. Ансяк сеетьстэ те ансяк невтемань кис, инечитнестэ, весть иестэнть, ды истямо ситуациясь чаповсь лия Россиянь Федерациянть ундоксраськетнень мартояк.

Политикань кис озавтозьтнень нежедемась

Пикет алтазь Данис Сафаргали нежедемантень РФ Украинасо посольстванть каршо  2018 иень панжиковонь 16 чистэнть.

2018-це иень панжиковонь 16 -це чистэнть "Олячив Рав-Урал" Россиянь Федерациянть Украинасо посольстванть икеле ютавтсь пикет. Акциянть ютавтыцятне яволявтызь кавто услоест: лоткавтомс раськень айгематнень активисттнэнь пансеманть- лепштямонть, ды нолдамс тюрьмасто (пекстамокудосто) Данис Сафаргали, татаронь пекстазенть Сафаргали - РФ ундокс раськетнень Ассоциациянть юровтыця, содавикс мельтопавтомань идиця, кона ульнесь озавтозь колмо иес. Россиянь "видечинь ванкшнома курось", судось, чумовтызе Сафаргалинь чумотевсэ РФ Криминальной Кодексэнть (КК), 115 сёрмадовксонть 2 -це пелькссэнть ("Хулиганонь койсэ арсезьанокстазь шумбрачинтень шожда зыянонь кандома) ды РФ КК 213 сёрмадовксонть 2 пелькссэнть (Ломань куросо икелев арсезьанокстанзь хулиганонь тевть).

2016 це иень ожоковонь 27 це чистэнть, сонзэ каршо ушодсть колмоте тевсэ чумовтоманть, РФ КК 282 сёрмадксонть 1 пельксэнть квалт (Кежень ды вардочинь кирвастема Инеалтыманть тевснолдазь), россиянь кирдивийденть критикань сёрмадовкссонзо кисэ. Арестэнть тувталокс кармась тюремась, зярдо Данис снартнесь идеме эсь пешкесэв поланть, ломаньтнеде, конат каявсть нинзэ лангс.

Пикетэнь теицятне кандсть баннер политозавтозенть портретэнзэ марто, косо ульнесь сёрмадозь "Free Danis Safargali! Beliefs are not a crime!" (англ."Олячи Сафаргалиев Даниснэнь! Эсь койсэ арсемась а чумотев!). Активистнэ пижгалесть девизтнэнь "Даниска ирек!" (тат. Олячи Даниснэнь). Акциянть ютавтомсто посольсьвастонть кияк эзь лисне.

Раськеютконь вейсэксчитень информациянь кандома

"Олячив Рав -Уралось" ютавты Эрзя Мокшонь Масторсо, Чувашиясо, Мари Элсэ, Татарстансо ды Башкириясо мониторинг ломатнень топавтомомелст кирдемадонть. Весе коламотевтнеде, кода эсь тевтнеде ды Айгеманть тёкшмельтнеде информациянть, активистэ снартнить ёвтнемс раськеютконь вейксчинтень. Сеть мастортнэсэ, косо улить Рав -Уралонь раськетнень диаспоратне, ютавтовить эрьва кодат преввалдовтомань акцият, конатнень тёкшмелесь ургатевтемс лия масторсо эрицятнень мельпутомаст олявтомаайгеманть проблематнес.

Невтемань кис, 2018 це иень панжиковонь 26 це чистэнть Рав -Урал, вейксчинь айгемась, ютавсь акция Кевошсо (Киевсэ), "Олимпийский" стадиононть вакссо. Тосо ютавтовсь чемпиононь Лиганть финалонь налксемась англиянь "Ливерпуленть" испаниянь "Реалонть" марто. "Олячив Рав-Уралонь" активистнэ келемтизь стадионов совамотаркасонть "Кremlim kills native nations!" (англ. "Кремлясь изни ундокс раськетнень!") баннерэнть ды явшесть "сэредицятненень" буклетт англань ды украинань кельсэ, Рав-Уралонь республикатнесэ политикань ситуациядонть.

Волонтертнэ кортасть лиямасторсто инжетнень марто Равчирень республикатнесэ репрессиятнеде, видечинь арасьчиденть ды виень структуратнень аволь закононь кувалт тевтнеде, эсь тиринь кортамотнень тонавтоманть кардамодонть, ды тердсть виевгавтомс Кремля лангс раськеютконь лепштямонть.