Маскаев, Андрей Иванович

Википедиясто материал - аорев содамкундосто
Перейти к навигации Перейти к поиску
Андрей Иванович Маскаев
Важодема ёрокчизе : фольклорист, литературовед, филологиянь наукань доктор, профессор
Чачома чись: умарьковонь 17 чи 1907({{padleft:1907|4|0}}-{{padleft:8|2|0}}-{{padleft:17|2|0}})
Чачома тарка: Вежга (Теньгушбуе), Россиянь Империя
Гражданчи: СССРFlag of the Soviet Union.svg СССР
Кедьалксчи: Россиянь ИмперияFlag of Russia.svg Россиянь Империя
Кулома чись: медьковонь 11 чи 1975({{padleft:1975|4|0}}-{{padleft:7|2|0}}-{{padleft:11|2|0}}) (67 иеть)
Кулома тарка: Саран ош

Андрей Иванович Маскаев (чачсь 1907-це иень умарьковонь 17-це чистэ, кулось 1975-це иень медьковонь 11-це чистэ) — содавикс фольклорист, литературовед, филологиянь наукань доктор, профессор. Чачсь Мордовиянь Теньгушевань буень Вяжга велень кажов эрицянь покш семиясо, косо сондензэ башка ульнесть сисем пакшат. Эйкакшпингезэ ашождаль. Авазо пек одсто прась сэредеме. Ды Андрей, кода цёратнестэ сехте покшось, саинзе эсензэ лангс кудоютконь весе тевтнень. Ламо мелявкстнэнь кувалма сеедьстэ эзь яксеве школавгак. Зярдо истя лиснесь, чокшнеланга чииль ялгатненень кевкстеме, мезе од ёвтась тонавтыцясь, кодамо тев макссь кудов. Тонавтнесь сон вадрясто ды покш мельсэ.

Тиринь велень школасо ниле класстнэнь прядозь, Маскаев сась тонавтнеме Темниковав. Шкань ютазь тосто кучизь Горький ошов счетоводокс тонавтнеме. Кудосто тензэ лезкс учомс эзь савкшно, ды сон юткошкасто Рав лангсо чамдтнесь баржат. Вана истя ушодовсь содамочинь масторов А.И.Маскаевень кизэ. Мейле, 1929-це иестэ, сон прядызе Мордовиянь педагогикань техникумонть, 1932-це иестэ - Саратовань пединститутонть, 1937-це иестэ - НИИ-нь эрзянь-мокшонь культурань аспирантуранть. Ульнесь Ине Отечественной войнасо. Важодсь МНИИЯЛИЭ-сэ (1938-1941, 1945-1956), тонавтсь А.И. Полежаев лемсэ МГПИ-сэ (1956-1958), Мордовиянь государственной университетсэ (1958-1975). МГУ-со васня ульнесь литературань кафедрань прявтокс, седе тов - историянь-филологиянь факультетэнь деканокс.

Андрей Иванович 50 ламо научной статьянь ды вузтнэнь, школатнень туртов ламо книгань ды тонавтомань программань анокстыця.

Педагогонь тевденэ башка, Андрей Иванович пингензэ перть пурнась ды ванкшнось-тонавтнесь эрзянь-мокшонь фольклоронь произведеният. Вишка пингстэ саезь сон пек вечксь эрзянь ды мокшонь морот, ёвкст ды ёвтамот, содась раськень ламо койть-кирдат. Сонськак вадрясто седясь гармониясо ды велень весе покшчитнестэ свал ломань ютксоль, киштевтсь-моравтсь, кенярдовтсь. НИИ-сэ важодемстэ секе-тев яксель фольклоронь экспедицияв. Кочказь материалтнэнь коряс сон анокстась ды нолдась пек ламо важодевкст, конатнестэ сехте вадрякс лововить "Эрзянь-мокшонь раськень ёвксось" (1947), "Эрзянь-мокшонь фольклористикадонть" (1962), "Эрзянь-мокшонь эпикань морось" (1964).

Кода литературовед ды критик А.И. Маскаев пштистэ вансь литературанок касоманзо-виевгадоманзо мельга. Сельмензэ икеле эзь менькшне се шкань художествань вейкеяк од сёрмадовкс. Истя, сон эрьва ёндо ваннынзе А. Рогожинэнь, П. Кирилловань, А. Куторкинэнь, М. Безбородовонь, В. Коломасовонь, А. Мартыновонь, Т. Раптановонь, С. Вечкановонь, Н. Эркаень ды лия сёрмадыцятнень шкинемаст. Мезесь паро, шнамодост башка, невтинзе асатыксэстгак. Войнадо икелень ды мейлень весе литературанок туртов Андрей Иванович питне путсь "Эрзянь-мокшонь литературанть неень ёжодонзо ды касомань кидензэ", "Эрзянь-мокшонь художественной литературась колоньгемень иень перть" покш важодевкссэнзэ.

Наукадо, литературадо А.И. Маскаевень статьянзо ды монографиянзо ванкшномсто парсте неяви, кодамо покшоль ёрокчизэ ды кодат анокставикст путовксонзо эрзянь-мокшонь филологиянтень ды весе финно-угроведиянтень.

Учёноенть ды фольклористэнть лезэв тевензэ тешкстазь Трудонь Якстере Знамянь, "Знак Почёта" ордентнэсэ, зярыя медальсэ ды ламодояк ламо лия казнесэ.

Сёрм.[витнемс-петнемс | витнемс-петнемс лисьмапрянзо]

Саезь: "СЯТКО", №8 (718), 2017