Кончкэть

Кончкэть (лиякс мерить: куринесэ, гуринесэ) — налксема. Сонзе содасызь пек ламонь таркава. Налксекшнить эйсэнзэ 6 — 12 иесэ эйкакшт кудосо тельня. Налксицятнеде зняро, зяро пурнавить, ансяк седе паро ули, бути ламочись а меши кудо потмова чийнемантень.

Налксемань кой-кирдатне

Налксема таркастонть сайневи-кекшневи весемесь, мезесь меши налксемстэ. Табуреткатне, пряхатне, ведратне, партне аравтневить цюланга, каштом удалга, эзем алга, айгсевить ужотнева. Весе налксицятне лемдясызь эсь пряст лия лемсэ. Саемга, мак, якстерька ды лият.

Налксицятнестэ вейкесь вадьсы суронзо каштом трубань содсо эли ашо порсо ды сювордасынзе суронзо мокшнас. Бути налксицятнеде ветеде ламо, сестэ сювордавить кавонест мокшнатне ды венстявить икелев. Весе лиятне невтема сурсост сювордазь мокшнатнестэ кармнть кочкамо эстест суронь-сур. Кинень саты содсо эли порсо тешкстазь сурось, се ули одицякс-конч-сельмекс.

Одицянть сельмензэ сюлмасызь пацясо (гурясызь), чаравтсызь зярыяксть таркасонзо ды орголить эрьва ёнов. А меревкшны кекшнемс куваяк цюланга, аксялга, каштом удалга, ансяк лиясто мереви куземе эзем лангс эли мендявозь ютнемс одицянть кедензэ алга.

Налксицятне чийнить конч-сельменть перька, цяпить судонзо икеле кедьлапушкасост ды бойка полавтнить таркаст. Бути налксицятне редить, конч-сельмесь эшкеви кодамояк пшти ужос-каштомс, стуворс, — весе пижакадыть: «Тол! Кирвазят!». Икелев венстязь кедтнесэ конч-сельмесь снарты киньгак кундамс. Налксицятненень лиясто меревкшны састынька токшемс одицянть кутьмерьс, хлопадемс сонзэ венстязь кедьлапушканзо. Те шканть конч-сельментень эряви эрязасто велявтнемс ды кундамс эшкицянть. Зярдо одицясь киньгак кундасы, сон, сельмень апак панжо, терявты содамс, кие те: токшесы кундазенть рунгонзо, прянзо ды ёвтасы сонзэ од лемензэ. Бути а содави тензэ, весе пижакадыть: «Толось палы! Толось палы!». Ды налксемась туи седе тов. Зярдо жо кундазенть лемезэ ёвтазь видестэ, сестэ пижнить: «Толось мадстязь!».

«Толось мадстязь!» валтнэнь ёвтазь пацясь саеви одицянть сельмстэ ды сюлмасызь од конч-сельменть сельмензэ.

Весемесь ушодови одс.

Сёрм.:

• Брыжинский Василий Сергеевич 2002: Сиянь рисьминеть. Мордовской книжной издательствась. Лл. 156-158.