Завражнов Тимофей Егорович

Завражнов Тимофей Егорович
Завражнов Тимофей Егорович
чачома лем	Завражнов Тимофей Егорович
Чачома тарка	Новая Тепловка[d];
Мастор	Россиянь империясь; Советэнь Вейсэндявкс[d];
Важодема ёрокчизе	сёрмадей, собиратель фольклора
вальма	ethnomuseum.ru/kollekcii…
	Завражнов Тимофей Егорович

Завражнов, Тимофей Егорович — (Завражнев) эрзянь валморонь ладсий, этнограф, эрзянь ды ветькень оршамопелень пурныця, "Мордовская история" (1907) ды "Мордовская земля" ёвтнеманть Семён Арсеньевич Ларионовонь марто сёрмадыцясь.

Игнатий Зоринэнь, Учаевень Роман Фёдорович, Ларионов Семён Арсеньевич, Саюшкин Василий Степанович, Цыбин Иосиф Александрович марто сон те шкас лияли мокшэрзянь литературань историяс парсте апак совавто, тевензэ парсте апак ванно. Ловови зярыя эйстэ васенце эрзянь литераторокс. С.А.Ларионов марто, конась ульнесь секе велень эрицякс, пурнась эрзянь ёвтнемат, конатнень коряс сынь кавонест тейсть "Мордовская история" ды "Мордовская земля" вейс ладязь ёвтнемат.

Эрямодонзо

Чачсь эрзянь Самара ёнксонь Бузулук буень Од Тепловка велесэ. Чачома иезэ а содави, ансяк академик А.А.Шахматовонь коряс 1906 иестэ сон уш ульнесь сыре ломанекс. Кедьтешксэнь коряс маштсь сёрмадомо, ансяк аволь пек вадрясто.

Музейтнень марто важодемазо

Уварова Прасковья Сергеевна историкесь ды археологось.

Революциядо икеле, ХХ пингень ушодксо, Тимофей Егорович пурнась ламо фольклоронь ды этнографиянь коряс материалт графиня П.С.Уваровань меремга. Прасковья Сергеевна Уварова ульнесь эсь шкастонзо пек содавикс ломань: историянь ды археологиянь содый, сюпав аристократонь раськестэ. Теде башка Тимофей Егорович ульнесь содавикс академик А.А.Шахматов марто. Истя жо ульнесь зярыя музеень ды вейсэндявкэнь информантонкс: РГОнь (Рузонь Географиянь Вейсэндявксэнь), Рузонь Музеень Этнографиянь отделэнь ды Ине Петрань лемсэ Антропологиянь ды Этнографиянь (Кунсткамера) музеенть.

1906 иестэ Рузонь Музеень Этнографиянь отделэсь явокшнось тензэ ярмак: сынст лангс Тимофей Егоровичнень мерезель рамамс Самара ёнксонь Бузулук буень ветькень ды эрзятнень ютксто коллекцият, теде башка молемаль рамамо Симбирень ёнксонь Алатырь уездэнь эрзятнень пельдеяк. Сехте вадрякс лововить сонзэ ветькень кедьстэ рамазь тевтне: оршамопельть, эргть-месть, мирденень лисемань коень кедьёнкст, ветькень ЙĚРĚХ ([йьрьх']) пазонь кеврунгот. Весемезэ Рузонь Музеесь сонзэ пельде получась малава 100 ветькень тевть. Эрзятнень пельде Тимофей Егорович кучсь 24 предметт: эрзянь тейтерьавань оршамопельть, тевень теемань кедьёнкст. Пурназь коллекциясь невти Завражновонь Т.Е. культурань домка содамочи ды музеень тевтнеде чарькодема. Эрьва кучозь тевесь ульнесь сёрмадстозь (мезекс эряви, косо вастневи, кодат улить лият лемензэ).

2021 иестэ Рузонь Этнографиянь музейсэ теезель невтема, косо башка стендсэ невтезельть Тимофей Егоровичень пурназь тевензэ.

"Мордовская история"

Истяжо явсь ламо мель эрзянь ёвтнемань пурнамонень. Эсь велень эриця - Семён Арсентьевич Ларионовонь - марто пурнасть ды вейс путызь "Мордовская история" (1907) ды "Мордовская земля" ёвтнематнень. Академик А.А.Шахматов, конась сонсь пек вадрясто содылизе эрзянь келенть, макссь покш питне не пурназь ёвтнемантень ды 1909 иестэ нурькалгавтозь ладсо нолдызе "Живая Старина" ловномапусмосо (II-III нолдамосо).

"Мордовская история" те кода эрзянь историянь летопись, юрсонзо аштить эрзянь кезэрень ёвтнемат ды сёрмадыцятнень эсь арсевкст. Тосо моли кортамось 50 иень перть Тюштянь инязорокс улеманзо ланга. Саемга, ёвтневи Тюштянь туремась "воевода Немвродонь" марто эли Сарданапал инязоронть марто, конась эрясь, сёрмадыцятнень коряс, эрзятнеде лембе ёнов. Тюштянь авадонзо - Вадря Орядо. Истяжо Фирий инязоронть ды рузонь Мурьзя инязоронть турема ланга. Явови мель эрзянь олячинь турицятненень - Покш Прябиксарнэнь, Сезьганнэнь ды Веталаннэнь. Ёвтнемась сёрмадозель ванькс эрзянь кельсэ, сонзэ питнезэ А.А.Шахматовонь коряс пек покш: тосо пурназельть "сырнень човалят" - кезэрень эрзянь морот ды сонсь ёвтнемась ашти прок вейсэнь цела произведениякс. Академикесь лови "Мордовской историясо" васенце снартнемакс сёрмадомс эрзянь раськень морокерькс (эпос). "Историясь" ашти эскельксэкс "Сияжарнэнь" ды "Мастораванень". Вана кода сёрмады Тимофей Григорьевич ланга академик А.А.Шахматов "Живая Старина" ловномапусмосо:

(эрз. «1907 иестэ мон теевинь содавиксэкс сыре ломань марто, лемезэль Тимофей Григорьевич Завражнов, сон ульнесь Самарань ёнксонь Бузулук буень Од Тепловка эрзянь велестэ. Сон сась Ине-Петрань ошов эсь куронь доверенной ломанекс, тевезэ ульнесь модань рамамо. Рамамо снартнесь Сокицянь-Видицянь Модань Банконь кувалт. Совсесь сон Академия Наукскак: сонзэ ульнесть та кодат кеээрень тевть-валт, арсесь миемс сынст Ине Петрань лемсэ Этнографиянь иузеентень. Кода теевинек содавиксэкс мон сёрмадстынь кедьстэнзэ зярыя эрзянь ёвкст ды пшкадень тензэ кудов пачкодемадо мейле истяжо сёрмадомс кезэрень эрзянь морот, ёвтнемат ды кучомс монень. Завражнов мельс паросо согласясь, секень марто бажамозо ульнесь тердемс лездыцякс эсь велень ломаненть - Семён Арсеньевич Ларионовонь - конась сонзэ коряс ульнесь сёрмадомань-мезень вадрясто содыцякс, секс мекс эсь шкасто важодсь "писарекс" ды маштсь ламо мезе мельсэ кирдеме. Зярыя ковонь ютазь Завражновонь туемадо мейле, монень почта вельде пачкодсь сёрмадомапусмо, конанть лемезэль "Мордовская история. Косто тусь эрзянь келесь, Тюштя инязордо, Паштеня инязоравадо ды эрьва кодамо эрзянь койде-кемемадо. Кочксезь эрьва кодамо эрзянь кезэрень ёвтнемасто ды ютавтозь рузкс". Мон пек дивазевинь, кода варчтыя, мезе потсо. Башка-башка аштиця ёвтнематнень таркас, тосо ульнесь вейс сюлмазь эрзятнень историяст.»).

Оригинальной текст (руз.)

«В 1907 году я познакомился с почтенным стариком Тимофеем Григорьевичем Завражновым из мордовского (эрзянского) села Новая Тепловка Бузулукского уезда Самарской губернии. Он приезжал в Петербург в качестве доверенного своего общества по делу о покупке земли при помощи Крестьянского Поземельного Банка. В Академию Наук Завражнов заходил для того, чтобы предложить Этнографическому музею имени Петра Великого приобрести у него какие-то старинные вещи. Сведя знакомство с Завражновым, я записал от него несколько мордовских сказок и условился с ним относительно того, что он на родине запишет старинные песни и предания и пришлет их мне. Завражнов охотно согласился на моё предложение, надеясь на помощь своего односельца Семёна Арсеньевича Ларионова, хорошо грамотного, по его словам, человека, служившего одно время писарем и обладавшего отличной памятью. Через несколько месяцев после отъезда Завражного, я получил по почте тетрадь, озаглавленную "Мордовская история. Об исходе мордовского наречия (эрзя-кель), об их царе Тюштене и царице Паштене и о разных суевериях этого народа. Избрана из разных устных мордовских преданий с переводом на русский язык". Я был удивлен содержанием присланной рукописи. Вместо сборника песен, сказаний и преданий в ней заключался связанный рассказ о судьбах мордовского племени. »

Седе тов сёрмадозель: "пурныцятне ульнесть кавто - Завражнов ды Ларионов. Сёрмадыцясь вейке - Ларионов". Тестэ лиси Тимофей Егорович аволь пек маштсь сёрмадомо. Омбоце тетрадень получамодо мейле, сынь кавонест састь Ине-Петра ошов. Ларионов С.А. ульнесь од ломань - 30-35 иесэ, кода сёрмады ланганзо А.А.Шахматов, тевест ульнесь теке - модань рамамось.

Вана кодамо валморо ульнесь печатазь ловномапусмосо (сёрмадома лувось ванстозь):

Моро Эрьзя инязор Тюштень кувалма
[витнемс | витнемс лисьмапрянть]

Сон удалакшность Тюштя инязор шачомдо,
Ищо удалась Тюштя изязор касомдо.
Сон ашо килей Тюштя изяоронь рунгозо,
Станцо тоциндязь Тюштя инязоронь пильгендзо.
Сон ашо локей Тюшя инязоронь полазо,
Сон локсей левкскеть Тюштя инязоронь идняндзо.
Сон чокшне поздас Тюштя инязор думсекшность,
Сон валцке рана Тюштя инязор стякшнокшнось.
Сон яла думась, кода бу амаксомс чавомс
Пря пине инязор Сарданень.
Сон валске рана марясь, что пине инязор Сарда
Веси виендзо маштызе и сы эсист само.
Сесто Тюштя инязор саень поландзо стяфнизе:
Стяка, полакай, стяка, Паштянай, теть мерган,
Сон пине инязор Сарда оцюв виендзо маро,
Саень Паштяняй, сакшны овси малав
Минек ошс, гороц полонц саемо

И тонь, полакай, монь экшсто саемо.

Лисьм.

Экспонаты Российского Этнографического Музея. Собиратель Завражнов Тимофей Егорович
Шахматов А. А. Из области новейшего народного творчества // Живая старина. СПб., 1909. Вып. 2 — 3, стр. 162 — 177
https://ethnomuseum.ru/kollekcii/vystavki-onlajn1/cennosti-vne-vremeni-k-istorii-sobiratelskoj-deyatelnosti-rossijskogo-etnograficheskogo-muzeya-v-pervoj-treti-hh-veka/ Архивировазь 8 Якшамковонь 2022 иестэ.
Все о Мордовии. Энцикл. справ. [/сост:Н.С.Крутов, Е.М.Голубчик, С.С.Маркова]. - Саранск: Мордов. кн. изд-во, 2005. - 840 стр. ISBN 5-7595-1662-0