Ётамс сёрматфть няфтьфонц потмос (содержаниянцты)

Дуняшин, Алексей Васильевич

Википедиясто материал - аорев содамкундосто
Алек Дуняшин
руз. Алексей Васильевич Дуняшин
Алексей Дуняшин, фотокувось саезь сонзэ «Пици-палакст» сёрмадовксонь пурнавксто
Алексей Дуняшин, фотокувось саезь сонзэ «Пици-палакст» сёрмадовксонь пурнавксто
чачома лем Алексей Васильевич Дуняшин
чачома чись даволковонь 8 чи 1904(1904-02-08)
Чачома тарка
Кулома чись 1931
Мастор
Важодема ёрокчизе сёрмадей, валморозей, публицист, куляньсёрмадей, фельетонист
 Алексей Васильевич Дуняшин

Дуняшин Алексей Васильевич, лиякс: Алек Дуняшин[1] (1904 иень даволковонь 8 чистэ Самарань ёнксонь Похвистнева буень Покш Толкан велесэ[2] - 1931 иестэ) — эрзянь[3][4] сёрмадей[5], фельетонист, валморозей, публицист[6], ды куляньсёрмадей.

Эстедензэ

[витнемс | витнемс лисьмапрянть]

Семияст аволь покшоль, эрясть вадрясто. Тетязо, Василий Фролович, содыль сёрмас, бажась тонавтомс эйкакшонзояк. Алёша Дуняшин прядызе ушодкс школанть Шнамо Конев марто. Ульнесь веленькулянь сёрмадеекс, сёрмадовксонзо лиснесть Бугурусланонь, Самарань («Коммуна»), ды московонь «Беднота» кулялопатнесэ. 1926 иень сёксня тусь тонавтнеме Московонь государствань журналистикань институтсо. Теке иестэ лись васенце ёвтнемазо. Тонавтнеманзо прядызе 1928 иестэ.

А. В. Дуняшинэнь эрямо шкасто Россиянь историясь ульнесь даволонь шкакс. Сон ютась А. В. Дуняшинэнь эрямонзо пачкаяк. Ульнесь гражданской войнасо, мейле ветясь культурно-содамочинь ды тевс тердемань важодема А. В. Дуняшинэнь шкинема шказо нурькинель. Тень лангс апак вано, кадсь редявикс тешкс эрзянь журналистикантень, публицистикань ды художествань литературантень. Сёрмадомо кармась 1923 иестэ рабфаксо тонавтнемстэ. Сонзэ тешкстнэ-редявкстнэ, фельетонтнэ, ёвтнематне сеетьстэ лиснильть «Якстере теште» газетасонть. Сон парсте содылинзе эрзятнень эрямост, сынст обуцяст, мелест-бажамост, коест. Московсо А. В. Дуняшин важодсь «Якстере теште» газетань редакциясо секретарекс.

Кулялопань редакторось Пётр Глухов сёрмадсь А. В. Дуняшиндэ[7]:

«А пек сэрей, ловтаня чама, оршазь раужо пиджаксо – истямоль лангс ванозь Алексей Дуняшин. Ялганзо мерильть тензэ Алёша. Эстензэ пек вечкевсь Алеко лемесь, секскак сеетьстэ сёрмадыль Алек Дуняшин… Дуняшинэнь сёрмадовкстнэнь эйстэ монень весемеде пек вечкевильть фельетонтнэ. Сынь сёрмадозь, кода кортыть, пек пшти кельсэ. Эряви меремс, што сондензэ икеле «Якстере теште» газетасонть сёрмадыцят арасельть. Секс лован, што эрзянь журналистикасонть Дуняшин ульнесь васенце фельетонистэкс».


1929 иестэ Московсо, Цетриздатсо лиссь «Васень сяткт» вейсэнь пусмось, конаньсэ печатазельть 25 эрзянь сёрмадейтнень морост ды ёвтнемаст. Пусмонть пурныцязо А. В. Дуняшин. Икельце валонть таркас сёрмадсь статья: «Сятктнэ яла кирвазить». Эрзянь поэтнэнь ды прозаиктнень сон тердсь сёрмадомо апак капша вадря произведеният. Шнась од поэтнэнь валморост: Артуронь Моронь, Алексеень Лукьяновонь, В. Радаевень, С. Салдинэнь. Неть валморозэйтнэнь кист ванькс. Шлязь ливезьсэст, сельведьсэст. Эрзянь литературань келесь - од кель. Валтнэнь парсте апак човсе-паро стих а сёрмадат. Ды аволь ансяк те. Арасель валморонь сёрмадома форманок. Эрьвась савсь вешнемс. «Васень сятктнэ» - минек художественной литературанть праздникест. Кадык те сборникесь ацы паро Ки лия сборниктнэнень, конатненькувалт карми касомо алкуксонь художественной литература» - истямо валсо пряды эсь статьянть Алексей Дуняшин. Сонзэ мельтне-арсематне ульнесть видеть.

1930 иестэ Московсо, Центриздатсо лиссь А. Дуняшинэнь «Пиципалакс» книгазо, козонь совасть ёвтнеманзо ды фельетононзо, конатне печатазельть газетатнесэ. Книгась ушодови «Пиципалакстнэнь» сёрмадыцядост Ф. Чесноковонь статьясонть. Федор Маркелович тешксты[7]:

«Дуняшинэнь книгастонть ули косто саемс пример, ули мезе лангс ваномс, ули косто неемс асатыкснэньгак. Книгась сонсь невтьсы, кода Дуняшин тонавтнесь, кода кайсь фельетонистэкс-писателекс. Дуняшинэнь фельетононзо мокшэрзянь трудицятнень неень эрямо-чиденть а явовить… Сон аволь ансяк превсэ-мельсэ, потмоёжосояк неень эрямонть марто. Сонзэ раштызе-пештизеяк неень шкась».


Эрямокизэ пек нурькинель, сёрмадомс савсь тензэ ансяк 4-5 иеть. Эрямостонть тусь 1931 иестэ 27 иесэ. Сонзэ куломадонть молить эрьва кодат кортамот. Сонзэ ледизь – мерить веенстнэ, ваявтызь Рав леентень – сёрмадыть лиятне. Тень лангс апак вано, сон тейсь ламо вадря тевть минек литературасонть, кадовсь талант марто васенце фельетонистэкс.

Сёрмадовксонзо

[витнемс | витнемс лисьмапрянть]
  1. Чись лись (Самар ош, Рабфак, 1925)
  2. Микитань грехезэ, (Самар ош, Рабфак, 1926). Ловновлик, варштака тей[1]
  3. Од кемть, (Самар ош, 1926)
  4. Кунсолок, эрзя!, (Москов, ГИЖ, 1926)
  5. Парсте морат, аздан козонь озат, (Москов ош, 1926)
  6. Историянь гарячка..., (Москов ош, ГИЖ, 1927)
  7. Мезе теят — секень неят, (Москов ош, ГИЖ, 1927)
  8. Сём вене, (Москов ош, ГИЖ, 1927)
  9. А шлязь — тык катаязь, (Москов ош, ГИЖ, 1928)
  10. Зярдо вешкезеви ракась, (Москов ош, ГИЖ, 1928)
  11. Рудазов ведесь чуди, (Москов ош, ГИЖ, 1928)
  12. Лавшось пачк калады, (Одсибирень ош, 1928)
  13. Месть уш стяко кортамс, (Одсибирень ош, 1928)
  14. Мон кашт молян, (Одсибирень ош, 19/VII-1928)
  15. Обь-леенть чиресэ, (Одсибирень ош, 1928)
  16. Коногон ацирьгали, (Москов, ГИЖ, 1929)
  17. Книга (сборник) Пици-палакст, (СССР-энь Наротнэнь Центрань Издательствась, Москов, 1930)
  18. Предисловие: Вете иетне кадовсть удалов, (1930)
  19. «Активист», (1930)
  20. Ванстынь — и карман ванстомо, (1930)
  21. Колмоцесь курок кенери, (1930)
  22. Манявсть, (1930)
  23. Пачк потявтума скал, (1930)
  24. Эфигения, (1930)

Ванодо истяжо

[витнемс | витнемс лисьмапрянть]

Лисьмапрят

[витнемс лисьмапрянть]
  1. ↑ Алек Дуняшин. Пици-палакст. Ёвтнемат ды фельетонт. СССР-нь народтнень Центрань издательствась, Москов, 1930, 12-це лоп. (эрз.)
  2. ↑ «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)
  3. ↑ 8 ФЕВРАЛЯ РОДИЛСЯ...(руз.)
  4. ↑ Время и события. 2014: библиографический указатель / Нац. б-ка им. А.С. Пушкина Респ. Мордовия; [сост. А.Н. Маланьчева]. – Саранск, 2013. – 148 с. (руз.)
  5. ↑ Ягина А. Н. Жанрово-тематический состав мордовской печати периода ее становления (по страницам эрзянской прессы 1920-х годов) // Огарев-online. – 2014. – №5.(руз.)
  6. ↑ «Национальная библиотека им. А.С. Пушкина РМ» Информационный листок «Журналист, писатель»: к 110-летию со дня рождения А. В. Дуняшина(руз.)
  7. ↑ 7,0 7,1 «Эрзянь Мастор», 257-це №, Т. Ф. Сафонова, Кундасынек чачома чист марто валдо ойме ломантнень лемест: Дуняшин Алексей Васильевич (эрз.)
Саезь "https://myv.wikipedia.org/w/index.php?title=Дуняшин,_Алексей_Васильевич&oldid=145395"-стэ