Атянь эзем
Атянь Эземесь — те эрзяраськень вейсэнь коень кочкавиця ветикуро, конась пурнави-тееви эрзянь ветямкоень койкуротнес, веле-сядонь вейсэндявкстнэс, ломантнень вейсэндявкстнэс, паро тевень теиця вейсэндявкстнэс совиця ломантнень ютксто.
Теема[витнемс | витнемс лисьмапрянть]
Атянь Эзементь вейке важодема шкань юткось – 3 иеть. Атянь Эземс совить 18 ломанть – койсодыйть. Атянь Эземень васенце промксось ютавтови Раськень Озксонь ушодома чистэнть.
Кочкамо[витнемс | витнемс лисьмапрянть]
Атянь Эземесь – те эрзяраськень вейсэнь коень кочкавиця ветикуро, конась пурнави-тееви эрзянь ветямкоень койкуротнес, веле-сядонь вейсэндявкстнэс, ломантнень вейсэндявкстнэс, паро тевень теиця вейсэндявкстнэс (седе тов – кочкитятнес) совиця ломантнень ютксто. Инязорось яволявты кавто ковонь перть кочкицятнесэ койсодыень лемень ёвтамонь шкадонть, зярдо Раськень Озксонь ютавтомантень кадови 6-до а седе аламо ковт.
Эрьва кочкицясь, 10 чиде Атянь Эзементь васенце промксонзо икеле, максы Инязоронтень койсодыйкс ёвтазь ломантнень лемрисьме (седе тов – кочкицянь бюллетень), истямо мельс нежедезь: 1 депутат вейсэндявксонть сядо ломанень пельде, теке марто таштавксокс лемрисьме 5 ломанень лем марто, конатне кочкавить вейсэндявксонь ломантнесэ панжадо эли салава кочкамосо.
Кочкитянь бюллетенень теемадо кочкицянь мельпутомась путови протоколс, кона кемекстави вейсэндявксонть прявтонь кедьчелькесэ ды путомтешкссэнзэ. Вейсэндявксось путы протоколонть эйс вейсэндявксонь ломанень лемрисьменть, кона кемексты кочкамо лувонь кирдеманть.
Од Атянь Эзементь васенце промксонзо 10 чиде икеле Инязоронть И-вальмасонть невтевить кочкицятнень весе протоколтнэ, конатне ульнесть максозь Инязоронтень важодема лувонть мельсэ кирдезь. Кочкицятнень протоколтнэнь невтема чистэнть Инязорось кемекстасы Атянь Эзементь, конась тееви истямо лувонть коряс:
- максозь протоколтнэнь коряс тееви кочкицятнень рейтингесь вейсэндявксос совсицятнень ламоксчис нежедезь. Вейсэндявксось, козонь совить седе ламо ломанть, саи рейтингсэнть васенце тарканть, конасонть лововить сехте аламо ломанть – меельце тарканть;
- кочкицятнень мельконёвтнесэ (бюллетентнесэ) васенце тарксо сёрмадозь ломанесь совавтови Атянь Эземс;
- бути Атянь Эземс совить 18 ломанде седе аламо койсодыйть, совавтомась ютавтови одс колмоце, нилеце, ветеце кочкицятнень мельконёвтнестэ ломантнень марто семс, зярс Атянь Эземесь а карми улеме пештязь.
Кочкицятненень мереви максомс пеняцямо конёв Видекурос, бути сынь ловсызь, Атянь Эзементь теемстэ-аравтомсто колазекс ломантнень кочкамо лувонть, конась максозель те Койлувонть 43-це сёрмадовксонть эйсэ. Тень кочкицятненень эряви теемс 90 чинь перть се чистэнть саезь, зярдо Инязорось путсы эсензэ И-вальмас одс пурназь Атянь Эзементь.
Бути Видекуронь весе судиятне (весе 3 судиятне) ловсызь пеняцямонть видекс – полавтови се койсодыесь, конань кувалма теезель ильведевкс. Видекуронь мельпутоматне лововить педе пес кемекстазекс ды пеняцямот кувалманзо а саевить.
Атянь Эземень од пурнавксось ютавты эсь васенце промксонзо Раськень Озксонь ютавтома чистэнть. Те промскссонть инесодыйтне кочкить-аравтыть Инязор, истя жо эсь ютксто кочкить Атянь Эземень промксонь ветиця ды промксонь конёвветиця.
Койсодыйтненень мереви:
- анокстамс ды макснемс Атянь Эземс мельпутомань арсевкстнэнь;
- кунсоломс Видекурос совамос ёвтазь ломантнень пачтямост;
- тейнемс яволявтомат ды пачтямот Атянь Эземсэ;
- кунсоломс Инязоронть ды Видекуронть иень перть важодемадост пачтямотнень;
- пшкалемс Инязоронтень ды Видекуронтень кевкстема марто;
- ёвтамс мельть апак путонь Атянь Эземень пурнавомодо.
Топавты-аравты истят тевть[витнемс | витнемс лисьмапрянть]
Атянь Эземесь топавты-аравты истят тевть:
- арси ды кемексты важодема лувонть сеть бажамо мельтнень ды тевпутовкстнэнь мельсэ кирдезь, конатнень аравты икелензэ Промксось;
- теи эрявикс важодема курот, вейсэндявкст ды ярмакпаргот;
- кемексты ярмакмаксомат ды ярмакказнеть;
- пурны ярмакт эрзя раськемолеманть туртов;
- аноксты кулянь сравтомапелень теема;
- аноксты ды яволявты Видекуронь пурнамо.
Койсодыйтненень мереви:
- анокстамс ды макснемс Атянь Эземс мельпутомань арсевкстнэнь;
- кунсоломс Видекурос совамос ёвтазь ломантнень пачтямост;
- тейнемс яволявтомат ды пачтямот Атянь Эземсэ;
- кунсоломс Инязоронть ды Видекуронть иень перть важодемадост пачтямотнень;
- пшкалемс Инязоронтень ды Видекуронтень кевкстема марто;
- ёвтамс мельть апак путонь Атянь Эземень пурнавомодо.
Промксветицянтень, койсодыень эрьва чинь тевдензэ башка, мереви:
- ёвтнемс мельть Атянь Эзементь ютавтома шканть ды тарканть кувалма;
- панжтнемс Атянь Эземень промксонть ды ветямс сонзэ;
- макснемс вал ды лоткавтнемс кортыцятнень;
- панжадо вайгелень максомсто ловномс койсодыйтнень вайгелест;
- конёвветицянть марто вейсэ ловомс койсодыйтнень вайгельтнень салава вайгель максомань пингстэ;
- анокстакшномс Атянь Эземень важодема кевкстематнень, путомс сынст вайгелень максомас кемекстамонть кис;
- путнемс эсь кедьчелькенть Атянь Эземень протоколонтень (кемекстамонь кис).
Конёветицянтень, койсодыень эрьва чинь тевдензэ башка, мереви:
- сёрмалемс-тешкстнемс Атянь Эземень промксонь протоколонть;
- пачтнемс койсодыйтнень Атянь Эзементь ютавтома таркадонзо ды шкадонзо;
- анокстакшномс-ветнемс Атянь Эзементь вадрясто ютавтомань лувонзо;
- промкс ветиенть марто вейсэ ловномс койсодыень вайгельтнень салава вайгель максомань пингстэ;
- путнемс эсь кедьчелькенть аравтозь ды апак аравто Атянь Эземень промксонть протоколонтень (кемекстамонь кис);
- топавтокшномс промкс ветицянть тевензэ, бути тонась а сави промксос.
Атянь Эземень промксось ютавтови колмо парцунсо: аравтозь, апак аравто ды пек эрявикс мельть-кортнемат. Аравтозь промксось тердевкшни эрьва иестэ, медьковсто. Эрьва койсодыентень эряви самс путонь промксос. А самось эрси ансяк сестэ, зярдо улить важов тувталт, конатнеде койсодыентень шкастонзо эряви пачтямс промкс ветиентень промксонть ушодомадо икеле. Апак аравто промксось эрсекшни Инязоронть вешеманзо коряс, бути те вешеманть шнасызь койсодыйтнень ютксто 2/3 пелькстнэде. Истя жо апак аравто промксось тердтневи 9 койсодыйтнень вешемаст коряс, конатне пачтить истямо промксстонть промкс ветицянтень. Апак аравто Атянь Эземень промксонть ютавтомадо меленть тевень ушодыцясь кортасы весе койсодыйтнень марто: промксонь важодемань кевкстематнень, истя жо зярдо ды косо карми ютавтовомо промксось. Пек эрявикс мельтне-кортнематне – алтымань вельде вайгелень максома башка парцун, конанть тейсы-аравтсы Атянь Эземень промкс ветицясь. Атянь Эземень промксось ловови важодицякс, бути эйсэнзэ лововить 9-де седе ламо койсодыйть. Вайгелень максомась пек эрявикс мелень-кортнемань промкссонть ловови топавтовиксэкс, бути эйсэнзэ лововить 12-до а седе аламо койсодыйть. Атянь Эземесь кемексты эсь мельпутоматнень вайгелень ламочисэ весе уликс койсодыйтнень пельде, конат важодить промкссонть.
Атянь Эземень весе мельпутоматне – панжадот ломантнень туртов ды невтевить Инязоронть И-вальмасонть. Аравтозь ды апак аравто промкстнэсэ вайгелень максомась ютавтови олясто ды панжадо лувсо – кедень кепедезь. Эрьва койсодыенть ули вейке вайгелезэ ды вайгеленть максни ансяк сонсь. Промкс ветицянть, конёветицянть эли койсодыень меремаст коряс, бути сынст мелест шнасызь промкссонть аштиця ломантне, ютавтовкшны салава лувсо вайгелень максома башка кевкстемань коряс, кона стявтови промксонь важодеманть пингстэ. Койсодыентень а мереви саемс эсь вайгелензэ вайгелень максоманть ютавтомадонзо мейле ды вайгельтнень ловомадонть мейле.
Ансяк салава вайгелень максомасо ды ансяк аравтозь ды апак аравто промкстнэсэ: – кочкави Инязорось; – пурнави Видекурось; – кочкавить Атянь Эземень промкс ветицясь ды конёветицясь.
Атянь Эземсэ важодема келесь – эрзянь.