Надькин, Дмитрий Тимофеевич

Надькин, Дмитрий Тимофеевич
Надькин, Дмитрий Тимофеевич
чачома чись	панжиковонь 28 чи 1934
Чачома тарка	Иваньбиё, Лугаян буе, Алоошонь ёнкс, Российянь Советэнь Федеративной Социалистической Республикась[d], Советэнь Вейсэндявкс[d];
Кулома чись	медьковонь 15 чи 1992 (58 иеть)
Кулома тарка	Хельсинки ош, Суоми Мастор;
Мастор	Советэнь Вейсэндявкс[d]; Россия Мастор;
Важодема ёрокчизе	тонадей

Надькин, Дмитрий Тимофеевич (1934 панжиковонь 28 чистэ Иваньбиё велесэ Лугаянбуесэ Горьковской ёнксо, неень Алоошонь ёнкс — кулось 1992 медьковонь 15 чистэ Суоминь Масторсо) — эрзянь сёрмадей, эрзянь профессор, ламо келень содыця.

Эстедензэ

Чачсь эрзянь сокицянь-видицянь семиясо. Иваньбиёсо прядозель сисемиень школанть, седемейле Лугоянонь тонавтомаучилищанть раськень пелксэнзе. Мейле ульнесь войнась. Седе мейле Дмитрий Тимофеевич прядызеть якстере шнамо лопа марто Горьковской университетэнь историко-филологической факультененть, важодсь Дагестанонь Масторсо.

Дмитрий Тимофеевич сёрмадсь зярыя тонавтнема книгат эрзянь эйкакштнэнь туртов, анокстась лездамо кедьёнкст тонавтыцятненень. Школасо сынст вадрясто содасызь. Дмитрий Тимофеевич ульнесь филологиянь наукань доктор, профессор, вельть паро тонавтыця, конань пек вечксть студенттнэ.Теде башка, сон поэтэль.

Ламо сёвномат, покордамот савкшнось цидярдомс те ломанентень эсь раськенть кисэ пшкадеманзо кис. Но те Дмитрий Тимофеевичень эзь тандавто. Раськень тевтнень сон ветясь апак пеле, превейстэ. Покшось, кода кортыть, седе парсте неяви веёндо. Се, мезе кенерсь тееме эсь нурька пингензэ перть Д.Т. Надькин, кадовсь эрзятнень мельс-превс, нолдась ундокст. Ушодозь тевензэ поладызь лият. А стяко ламот тешкстыть, бути а Д.Т. Надькин, раськень ламо кевкстематне те порамс авольть решаво. «Чилисема» журналонь теицятне мельспаросот секс, мекс Д.Т. Надькин ульнесь эрзянь эйкакшонь журналонь редколлегиянь членкс. Сонзэ мелензэ-валонзо пек лездасть журналонтень кеместэ стямс касомань-кемекстамонь кинть лангс. Пек а сатны сон тенек ней, зярдо тиринь кельтнень перька молить сэзнэмат. Сонзэ кеме валозо валдомгавтовлинзе бу эрзянь кельсодыйтнень превест. Кода илязо уле, Д.Т. Надькин кадови эрзятнень мельс-превс кода алкуксонь учёной, доктор, профессор, виев поэт, раськень ине цёра.

Кулось 1992 медьковонь 15 чистэ Суоминь Масторсо, калмазь Саранскойсэ.

Сёрмадовксонзо

Мордовиянь книгань издательствасо лиссть стихень колмо пусмонзо:

«Кустемат» (1977)
«Чачома эле» (1983)
«Эрямонь лув» (1987).

Дмитрий Тимофеевич покш мель явсь вишка ловныцятненень: сёрмадсь сыненст ёвкст, валморот, конат лиснесть «Чилисема» ковставксо. «Лов тештинеть» (1989) вейсэнь пусмонтень совавтозь эйкакштнэнень алтазь Надькинэнь стихензэ. Кода алкуксонь эрзянь ломань, Дмитрий Тимофеевич пек ризнэсь-мелявтсь эрзянь келенть, минек раськенть кис. Те сэредьксэсь кармавтызе сонзэ стямс «Масторава» вейсэндявксонть прявтс.

Сёр.:

Дмитрий Тимофеевич Надькин. Чачома чистэнзэ 70 иетненень // «Сятко». – 2004. – №5. – С. 86-107.