Междометиясь
Междометиятне лововить эмоционально-экспрессивной ёнксонь невтиця кортамо пельксэкс. Пек покш тарка саить ломанень кортамосо междометиятне. Сынст вельде невтевить ломантнень мелест, потмоёжост. Келень системасонть междометиятне аштить ве ёно лия кортамо пелькстнэ эйстэ грамматикань ёнксост коряс, кельсэ функцияст коряс, кода ёвтазденть мель (модальность) теине (краткой) эмотивной форма.
Лингвистикань литературасо междометиянть статусозо и объёмозо чарькодеви учёнойтненень а вейкетьстэ. Междометия чарькодеманть толковамсто, авейкетьксчитне саить эсестэ ушодксост античной грамматикатнестэ. Истя, Александрийской школань учёнойтне, конат эрясть од эрань ушодомс 3-2-це пингетнестэ, эзть ловт междометиятнень ськамочинь кортамо пелекс. Сынь арсильть, што междометиясь педявтови глаголонтень эли глаголонть пингстэ арсеви [1]. Римень грамматистнэ (од эрань 2-1-це пингетнестэ) явизь те кортамо пельксэнть наречиятнеде секс, мекс «сонзэ эйсэ ули глаголонь аффект ды междометиятнень вельде ёвтави ломанень оймесь сестэяк, зярдо глагол кадык араськак[2].
Междометиядо теориясь поладови средневековой периодсто. Панжовить эрьва келень междометиянь авейкетьксчитне, ёнкстнэ: «эрьва келенть улить эсензэ междометиянзо – heu (лат.), uah ды racha (евр.) – сынст стака ютавтомс лия кельс»[3]. Междометиятнень улить асатыксэст. Сынь ансяк лия кортамо пелькс марто ёвтыть келей смусть. Тень коряс кортась Августин Блаженный: «Когда я хотел воплями, различными звуками... сообщить о своих сердечных желаниях и добиться их выполнения, я оказывался не в силах ни получить всего, что мне хотелось, не дать знать об этом всем, кому хотелось».
Междометиядо келей чарькодема максови Лингвистикань Энциклопедической Валксонть: «...валонь аполавтневиця истямо класс, конатне лездыть перть-пельксэс эмоциятнень ливтеме. Междометиятне а лововить а ськамочинь (знаменательной), а лездыця (служебной) кортамо пельксэкс. Ськамочинь валтнэнь эйстэ сынь явовить номинативной значениянь арасьчисэ (невтить потмоёжо, но а ёвтыть сынст эйсэ); лездыця кортамо пелькстнэнь эйстэ явовить сеньсэ, што арась сюлмиця (связующей) функцияст [4].
Эрзянь келень литературасонть междометиянть лангс истя жо ули башка вановт. Васняяк, тешкстасынек, кельсэнть те валось теи покштояк покш тев. Кода содасынек, валось – те келень сехте вишка прявт пелькс, кона невти чарькодема предметтэ, тевдеемадо ды сынст башка ёнкстнэде. Валонь полавтнемадо ды формань теемадо тонавтомантень мерить морфология. Сон ванны: грамматикань смустень, кода ды мейсэ сынь теевить; полавтневи а полавтневи валось, бути полавтневи – кода полавтневи (падежга, лицява, шкава, числава); кодат улить кельсэнть кортамо пелькст ды кодат сынст явовтыця ёнксост [5].
Эрзянь кельсэ явовить кемень кортамо пелькст: существительной, прилагательной, числительной, местоимения, глагол, наречия, валмельгакст, союзт, частицат ды междометият. Сынь эрить ськамочинь ды лездыцят. Башка явовксос кандовить междометиятне.
Междометиятне – валт, конатнень вельде кортамосо ёвтавить ломаненть ёжомарямонзо, мелявксонзо ды кармавтомань мелензэ. Эсест смустест коряс междометиятне явовить лия кортамо пелькстнэстэ теньсэ – сынст арась лемдемань (номинативной) ёнксост. Сынь тешкстыть ансяк кортамонь, вайгелень улеманть, кона эрявкшны ломанентень нурькинестэ тевдеемань невтемстэ.
Междометиятне топавтыть ёжомарямонь невтемань, валрисьмесэ ёвтавкшныть ськамост ды лия вал марто сюлмавозьгак. Седе сеедьстэ тешкстыть ёвтамонь интонациянть. Вейке теке междометиясь ёвтави лия вайгельсэ. Сестэ сон невти смустень лия ёнкс. Саемга: Вай, кода сэредян! Вай, кодамо покш кенярксось! Васенце валрисьмесэнть невтеви седей ризкс, омбоцесэнть – седеень витиця кеняркс.
Кортамо пелькстнэнь ютксо междометиятне саить башка тарка эли аштить башка таркасо. Сынь явовить кода прявт валтнэде, истя лездыця валтнэдеяк. Морфологиянь ёнксост истят: сынь а полавтневить числава, падежга, арась лицяст, шкаст ды морфологиянь лия категорияст.
Саемга: – Вай, ялгай, улема, лисить превстэ?; – Я, содавлиньгак, сеске ёвтавлия тонеть; – Ну, вечкевикс оям, мезе ёвтыксэлить? – кевкстизе цёрась...
Ськамост ёвтамсто, сынь малавгадыть смустень кандыця валтнэнь марто, но явовить лездыцятнень эйстэ, конат ськамост а кандыть башка смусть. Междометиясь топавты кодамояк смусть, конань чарькодьсызь эрзянь келень содыцятне ды сонзэ эйсэ кортыцятне. Междометиятнесэ явить ёжомарямонь ды сыргозтемань (императивностень) ёнкстнэ.
Синтаксисэст коряс междометиятне явовить лия кортамо пелькстнэнь эйстэ: сынь а эрсить валрисьмень а прявт (главной), а аволь прявт (второстепенной) пельксэкс, куш сюлмавитькак ёвтамонь (интонациянь) коряс валрисьменть марто, конанень совавтовить. Саемга: – Ну, мезе ёвтыксэлить? ; – Ужо, иля пижне, – аволдась ёнонзо од цёрась. Неть валт-междометият. Улить междометият, конат ёвтавить валрисьмень таркас. Саемга: – Но-о! – лоштизе нузякс лишменть локшосо атясь. Лиясто междометиятне-валтнэ эрсить валрисьмень членэкс: Колька ёвтась шумбрат-парт тетянзо лемс. Тесэ междометиясь – дополнения. – Э-э, Юрка, тесэ уш тон цю, – аволдась Санька лелясь ялганзо ёнов. Тесэ междометиясь топавты сказуемоень смустенть: чатьмонть. Междометиясь седе сеедьстэ эрси валрисьменть ушодкссо ды песэ. Аштиндеряй валрисьменть потсо, сестэ сон эрси валрисьмень кодамояк членэкс [6].
Ванодо
[витнемс | витнемс лисьмапрянть]«Междометия» теманть коряс уроконь конспект
Сёрм.:
[витнемс | витнемс лисьмапрянть]- ↑ Античные теории языка и стиля / под. ред. О. М. Фрейнденберг. – М. : Соцэкгиз, 1936. с.118
- ↑ Античные теории языка и стиля / под. ред. О. М. Фрейнденберг. – М. : Соцэкгиз, 1936. с.137
- ↑ История лингвистических учений / Ф. М. Березин. – Высшая школа, 1985. – С.73
- ↑ Лингвистический энциклопедический словарь / В. Н. Ярцева. – М. : Сов. энциклопедия, 1990. – 290с.
- ↑ Цыганкин, Д. В. Эрзянь келень программат 5 – 11 класстнэнень / Д. В. Цыганкин, В. П. Цыпкайкина. – Саранск : Мордов. кн. изд-во, 2001. – 32 с.
- ↑ Цыганкин, Д. В. Эрзянь келень программат 5 – 11 класстнэнень / Д. В. Цыганкин, В. П. Цыпкайкина. – Саранск : Мордов. кн. изд-во, 2001. – 32 с.