«Междометия» теманть коряс уроконь конспект

Википедиясто материал - аорев содамкундосто
Перейти к навигации Перейти к поиску

«Междометия» теманть коряс уроконь конспект


Уроконь темась: Междометиясь кода башка кортамо пелькс (7 кл.)
Уроконть целезэ: Теемс тонавтницятнень содавиксэкс междометия кортамо пельксэнть марто.
Уроконть путовксонзо:
1) парсте, ёжомарязь ловномс междометия марто валрисьменть;
2) вейсэндямс кортамо пелькс ланга содамочитнень;
3) кепедстемс мель тиринь келень тонавтнемантень;

Уроконь кедьенкстнэ: кортамопельксэнь тешксткеть, ськамочинь важодемань карточкат, плакат "Кода паро эрямс мода лангсо, зярдо междометиятне прясот" эпиграф марто.
Уроконь формась: Грамматикань налксема.

Уроконь молемась[витнемс-петнемс | витнемс-петнемс лисьмапрянзо]

Пурнамо шкась[витнемс-петнемс | витнемс-петнемс лисьмапрянзо]

Тонавтыцясь: – Шумбратадо, вечкевикс ялгат! Течи минь понгтано ёвксос, косо карматано содамо междометиядо.'

Кудонь кевкстематнень ваномась[витнемс-петнемс | витнемс-петнемс лисьмапрянзо]

Тонавтыцясь: – Минь тынк марто ютазь урокстонть прядынек ськамочинь ды лездыця кортамо пелькстнэде тонавтнеманть.Зяро жо эйстэдест? Конатне лововить ськамочинь? Конатне лездыцякс?
Тонавтницятне: – Кельсэнть улить ськамочинь ды лездыця кортамопелькст. Ськамочинь лововить существительнойтне, прилагательнойтне, числительнойтне, местоимениятне, глаголт, наречият. Лездыцякс лововить валмельгакстнэ, союзтнэ ды частицатне.
Тонавтыцясь: – Мон ёвтан тенк валт, а тынь ёвтынк, кодамо кортамо пельксэкс кармить: ломань (сущ.), теемс(глаг.), сермав(прил), комськавтово(числ.), сон(мест.), пицезь(дееп.), пижелдыця(прич.), ли(част.), Но-о!(межд.).
Ней тетрадезэнк сёрмадодо 3-4 невтевкст:
а) частицат;
б) союзт;
в) наречият;
г) местоименият
д) существительнойть
е) глаголт
ж) прилагательнойть
з) предлогт

Од материалонь ваномась[витнемс-петнемс | витнемс-петнемс лисьмапрянзо]

Тонавтыцясь: − Минек течинь од теманок междометиясь, кода башка кортамо пелькс. Мекс жо сон ловови башка кортамо пельксэкс? Штобу максомс вал те кевкстеманть лангс кунсолотано вейке ёвкс междометиядо.
Налксицятне: Грамматикась, Словаресь, Междометиясь, Существительноесь, Глаголось, Прилагательноесь, Наречиясь, Местоимениясь, Предлогось, Частицась, Союзось. Грамматикань ёвкс.
Тонавтыцясь: - Те ульнесь сядо, а паряк седе аламо иень ютазь. Сестэ междометиядонть кияк оштё а содыль. Вирь куншкасо вишка кудынесэ эрясть-аштесть Валкс дедась Грамматика бабанзо марто ды ульнесть сынст вейксэ кортамо пелькс эйкакшост: Существительноесь, Прилагательноесь, Числительноесь, Местоимениясь, Глаголось ды Наречиясь – неть ульнесть седе покшт Валкс ды Грамматика марто яксесть школав ды тонавтсть эйкакштнэсэ. Неть колмотне, конат ульнесть седе вишкинеть – Предлогось, Союзось и Частицась – лиялесть кудонь тевень тееме. Зярдо тетяст-аваст ды покш ояст школасольть, сынь пидесть ярсамопель ды урядасть кудот. Чокшне ланга пурнавильть весе вейсэ, симильть варения марто чайде, кортнесть эрьва мезде, эрясть апак сёвно.
Весть кенкшэс тенст кие-бути лоштясь.
Частицась: - Чу! Кие-бути тосо, - сергедсь вишка частицась.
Глаголось. – Молян, панжса. (Поровт лангсо кодамо-бути существа, рудазов, раздезь.
Существась: - Шумбратадо, паро ломанть!
Словаресь: - Шумбрат, якиця ломань! Совак инжекс кшиде-салдо ярсамо. Минь тонть чайде симтядызь, а тон ёвтнесак, кие тон истямось ды ков ки кирдят.
Существась: - Лемем мон Междометия, якан мастор ланга умок, ансяк ломантне а ловить эйсэнь кортамо пельксэкс. Ютынь вакска, карминь содамо, што тесэ эрить кортамо пелькст ды совинь инжекс. Ванса, тынь эрятадо парсте, совавтомизь монь эсь юткс, карман важодеме весе ладсо.
Предлогось: - Вот те на!
Наречиясь: - Фу! Чаво валт!
Союзось (междометия лангс ванозь): - Эге, ков ванат.
Существительноесь: - Вай! Авакай! Мезе мартонзо теемс?
Прилагательноесь (пеень пачк): - У-у-у, кодамо амазый ды минек юткс соваволь.
Глаголось (мокшна марто моли междометиянть лангс): - И-ись! У! Марш тестэ!
Словаресь (кежень сазь): - Цыц! Чатьмонеде весе! Эряви кунсоломс ды ваномс, аволь пижнемс стяко.
Грамматикась: - Виде. Кадык междометиясь ёвтнесы, мезе сон машты тееме ды кодамо лезэзэ.
Междометие: - Весе тынь пижниде лангозонь ды эзинк нееяк, зяроксть мон саимезь эсь кортамосо.
Глаголось: - Виде, истя ульнеськак.
Местоимениясь: - Тс-с, кунсолодо, мезе карми седее тов.
Междометиясь: - Вана седее тов мезе ёвтнян. Мон – сехте эрявикс вал, кортамосонть монь теме кодаяк, секс мекс, мон ёвтань ломанень ёжомарямот, мельть. Кие сэреди – се пижни: "Ай-ай-ай" или "Ой-ой-ой!". Вадря ёжомарямозо - раки: "Ха-ха-ха! Хи-хи-хи! Хе-хе-хе!". Кавонест вастовсть, монень энялдыть.: " Шумбрат! Сюкпря! "
А весе неть ну, эге, ага, ого, ох, ах, гм-гм - те монь оян. Мезе ломантне, ракшатнеяк, нармунтнеяк монь теме а эрявить: кискась - гав-гав, тяф-тяф; каткась - мяу-мяу; утякась - кря-кря; гусясь - га-га-га; атякшось - ку-ка-ре-ку; саразось - куд-кудах; тувось - хрю-хрю. Предметэнь гайгематнесэяк мон пачтян, - прянь кепедезь мерсь Междометиясь. – Марсинк, кода баягась гайги? Бом-бом-бом, дин-дон, динь-динь-динь. Грамматикась: - Видестэ ёвтык, тонтеме кортамосонть ковгак. Сави совавтомс минек юткс. Эйкакшт, саинк сонзэ паникудов шлямо ды мадстинк каштомо удалов, тосо таркине ули.
Тонавтыцясь: - Истя эрияк Междометиясь, теке каштомо удало, лия кортамо пелькстнэнь эйстэ башка[1].

Кемекстамось[витнемс-петнемс | витнемс-петнемс лисьмапрянзо]

Тонавтыцясь: - Тынь парсте кунсолынк ёвксонть. Ней седе вадрясто чарькодемань кис ловносынек вейсэ учебникстэнть параграфонть. Парсте ловнынк правилатнень (тонавтницятне ловныть скямост сынсь).
Доска лангсо текст кармавтома марто. Тонавтницятне топавтыть сонзэ тетрадьс.
- Мон – сехте питней вал. Монтемень ковгак. Мон ёвтан эрьва кодат ёжомарямот. Кие сэреди – пижни : "Ай-ай-ай", "Ой-ой-ой!". Кенярды - раки: "Ха-ха-ха!", "Хи-хи-хи!". Вастовсть кавто – монень лездамо кисэ: "Шумбрат! Здравствуй! Сюкпря! Инеськеть!". Бути сёвнозевить - кортыть: " Маштымор лангат! Атят-сэрдят саидизь! ". А весе неть ага, ого, ох, ах – монь раськень оят.

Кармавтомась:
Сермадомс текстстэ междометиятнень, тешкстамс, кодат ёжомарямот сынь невтить.

Цётамот[витнемс-петнемс | витнемс-петнемс лисьмапрянзо]

Тонавтыцясь: - Кодамо кортамо пельксэкс ловови междометиясь? Тонавтницятне: - Междометиятнень арась лемень максомань тевест. Сынь невтить ёжот, седей марямот. Синтаксисэнь коряс междометиятне явовить лия кортамо пелькстнэнь эйстэ: сынь а эрсить валрисьмень пельксэкс, хоть сюлмавить ёвтамонь (интонациянь) коряс валрисьмень марто, конанень совавтовить. Сынь аштить башка лия кортамо пелькстнэнь эйстэ. А кандовить ськамочинь или лездыця кортамо пелькстнэнь юткс.

Кудонь тевень максомась[витнемс-петнемс | витнемс-петнемс лисьмапрянзо]

Сермадодо аволь покшке сочинения, конантень совавтодо эрьва кодат междометият.


Ванодо[витнемс-петнемс | витнемс-петнемс лисьмапрянзо]

Междометиясь

Сёрм.:[витнемс-петнемс | витнемс-петнемс лисьмапрянзо]

  1. И. В. Булгаковонь «Грамматическая сказка о междометии», 2002 : 1-5 с.