Маризь Кемаль

Артовкс:Marizj Kemalj.JPG

Маризь Кемаль эрзянь оршамопельсэ

Маризь Кемаль (Раиса Степановна Кемайкина) — эрзянь сёрмадей, содавикс валморозей.

Чачсь 1950 иень умарьковонь 13 чистэ Мордовиянь Чамзаньбуень Вишка Маризь велесэ сокиця-видицянь семиясо. 1956 иестэ прядызеть школанть, тусь тонавтнеме Саран ошов, косо прядызеть «эрзянь кель» пельксенть келеньсодыцянь факультетсэ Мордовиянь прявтуниверситетенть.

1972 иестэ саезь 1975 видс важодсь пакшань тонавтыцякс тиринь велесэнзэ. Кизна 1975 иесте тусь эрямо Саран ошов ды пецек кавто иеть ульнесь куляньсёрмадеекс «Эрзянь правда» кулялопасонть. 1977 иестэ саезь сисем иеть важодсь Пушкинень А. С. лемсэ Мордовиянь ловнома кудосонть.

1985 иестэ саезь 1988 видс — поэзиянь прявтонть полавтыця «Сятко» журналсонть, 1989 иестэнть саезь течи чинть видс важоди секретарекс «Чилисема» эрзянь эйкакшонь журналсонть.

Васенце валморонзо лисемась путови 1980 иенте. Умарьковонь номерсэнть «Сятко» журналонть ульнесь печатазь «Эйкакшчинь лавсь» валморозо. Секе шкастонть ушодызеть улемэ эрьва иень одломанень литераторонь семинартнесэ. «Сятко» журналось кармась макснеме сонзэ валморонзо. 1987 иестэ лись ниле сёрмадеень пурнавкс «Маней васолкст», ков совасть Маризь Кемалень покш кочкавкс валморонзо. 1988 иестэ Мордовиянь книгань нолдыцясь-издательствась нолдызеть сонзэ васенце пурнавксонзо «Лавсь».

Омбоце пурнавксозо лись 1994 иестэ «Штатол» лем ало, сонзэ эйсэ малморыцясь арсесь эрямодонть, вечкемадонть, кезерень эрзянь раськеденть. Тей совась виев, парсте сёрмадозь поэмазо «Мон — эрзян!», конасонть Маризь Кемаль сти ловныцятнень икеле ломанекс, конань теевс-путовсь эсь раськенть вечкемась, пертпельксэсь ды эрямоёжось.