Эрзянь фольклор

Википедиясто материал - аорев содамкундосто
Перейти к навигации Перейти к поиску

Эрзянь фольклор эрзя раськень шкинемазо, кона невти раськень эрямонзо ды мелензэ, саезь умонь пингетнестэ неень шкань видс.

Содазь фольклорось эрьва таркасонть ванстовсь аволь вейкетьстэ. Тувталтнэ тенень ламот. Эрьва кодат меельце шкань экспедициятне невтизь, косо седе покш культурась, тосо сон седе ванстовськак. Теде корты Пензань ёнксонь экспедицияськак. Сон теезель Сура леенть чирева. Фольклорось тесэ пек сюпав, тематикаськак эрьва кодамо: социально-гражданственной, социально-бытовой. Улить морот историческойть, пейдемань. Минек шкас сынь парсте ванстовсть. Тенень васняяк лездась региононть тарказо, лиякс меремс, географической аштемазо, тесэнь перпельксесь: ламо вирть, эрькеть. Тунда ды тельня тей мейсэяк а ютават. Те шкастонть перть-пельксэнть марто сюлмотне лавшот, секскак Сура енксонь фольклорось ванстовсь кода-бути лиятнень енов а молицякс.

Сура леень чирева фольклорось[витнемс-петнемс | витнемс-петнемс лисьмапрянзо]

Сура маласо эрзянь велетнень моротне човорявсть рузонсетнень марто. Эрзянь велетнестэ ламо ломанть туильть важодеме лия ёнксов. Зярыя иеде мейле велявтыльть тиринь велев. Сынь ускильть мартост аволь ансяк ярмакт, рузонь мороткак. Эряви тешкстамс теньгак, эрзянь велетнень маласо свал ульнесть рузонь велеть. Сынст ютксо сюлмотне ульнесть кеметь. Историясь сынст вейсэндинзе. Зярдо сыль кажось, сынь вейсэ стильть врагонть каршо. Рузонь моротне, конатне понгсть эрзятнень репертуарс, аламонь-аламонь полавтовсть.

Сура маласо эриця эрзятнень эрямосо моронь фольклоронь зярыят[витнемс-петнемс | витнемс-петнемс лисьмапрянзо]

1) Эрзянь традиционной морот:

  • Сокицянь-видицянь календарень морот
  • Роштовань кудонь морот
  • Позярмат
  • Круговой морот

2) Семиянь коень-кирдань морот, авардемат:

  • Калмамонь лайшемат
  • Свадьбань одирьвань ды сонзэ малавиксэнзэ авардемат
  • Свадьбань парявтнемат
  • Свадьбасо паронь арсемат
  • Свахань морот

3) Эрзянь коень морот

  • Эпическойть
  • Лирическойть

4) Неень шкань эрзятнень моронь лирика

Эрзянь фольклоронь пурныцятне[витнемс-петнемс | витнемс-петнемс лисьмапрянзо]

Эрзянь фольклоронь пурныцятне, Макар Евсевьев, А.И.Маскаев, Л.С. Кавтаськин, И.С. Сибиряк, свал тешкстыльть эрямосо фольклоронть таликанзо. Морось, келя, аволь ансяк кенярдовты, сон кармавты арсеме, паролгавты ежомарямонть. Сонзэ эйсэ путозь художественной виесь кармавты седе парсте чарькодеме раськенть.

Эрзятнень моронь культурась тонавтнезь эште а весе. Аламо экспедицият ульнесть Ульяновской, Оренбургской, Саратовской, Нижегородской, Пензенской областнесэ, Чувашия Республикасо, лия регионтнэсэ. 1883 иестэ Финляндиясо теезель финно-угорской вейсэндявкс. Истямо вейсэндявксонть покш мелезэль домкасто тонавтнемс эрзятнень ды мокшотнень культураст. Теньсэ те вейсэндявксонть таликазо покш. Сехте ламотейнесь, нама, Х.Паасонен ды П.Гавила.

Эряви меремс, пурназь сюпав материалтнэстэ Х.Паасоненнэнь удалась печатамс овсе аламо, ансяк а покшкеть кавто сборникть. Васенце сборникентень совасть 54 морот, 46 валмеревкст ды 415 загадкат, омбоце сборниксэнть ульнесть ёвкст. Ламо евкстнэ ютавтозь немецень кельскак. Зярдо Х.Паасонен кулось, сонзэ тевензэ поладызе ученоесь П.Равила.

Тешкстасынек, Х.Паасоненэнь роботанзо кандыть покш смусть ды сюпавчи. Сонзэ покш эстетической енксозояк. Те собраниясь ловныцянть теевти содавиксэкс эрзянь сюпав устно-поэтической культуранть марто. «Устно-поэтическое творчество мордовского народа» пурнавксонть пельксэзэ печатазель Саранскойсэяк. Сонзэ домкасто тонавтнизь минек научно-исследовательской институтонь ученойтнеяк.

Мезе сёрмадозь эрзянь фольклордонть[витнемс-петнемс | витнемс-петнемс лисьмапрянзо]

Рузонь ученойтнень ютксто эрзямокшонь фольклоронть ушодсь тонавтнеме сехте васенцекс А.А.Шахматов академикесь. 1905-1906 иетнестэ сон якась экспедицияв Саратовской областень Сухой Корбулак ды Оркшно велетненень. Эрзянь фольклордонть зярыя роботанзо М.Т.Маркеловань. Сехте меельце роботанзо лемезэ «Саратовская мордва».

Мейле кувака шкань перть ученойтне эрзянь фольклоронтень шка ламо эзть явно. Лиснесть ансяк башка статьят. Истя 1969 иестэ лиссь Г.И.Сураев-Королевонь «Мордовские народные песни» книгазо. Текстнэде башка тосо максозь моротненень нотаткак. 1981 иестэ лиссь «Памятники мордовского народного музыкального искусства» антологиянь 1-це томось. Те изданиясонть ульнесть седе ламо мокшонь морот. Седе икеле 1972 иестэ лиснесь региональной сборник. Лемезэ «Эрзянская свадебная поэзия». Авторозо А.Г.Борисов. 1975 иестэ лиссь «Мокшанская свадебная поэзия» книгась. Авторозо К.Т.Самородов. Эрзямокшонь фольклоронтень ламо шка алтась ученоесь И.С.Сибиряк. Сон яксесь эрзянь велетнева, конат Рав лей маласо, Дальней Востоксо ды мик Север енояк. Истя жо лиссь книгазо-сборникезэ. Лемезэ «Мордовские народные песни Заволжья и Сибири».

Кода илязо уле, Сура маласо велетнень (Пензань ёнкссонь) эрзятнень фольклорось кадовсь кода-бути ве енов. Сон эште пек апак тонавтне. Те тевенть ушодокшнызе эште М.Е.Евсевьев, мейле Пенза енксонь зярыя краеведт нолдакшность статьят. Нурькинестэ меремс, материалтнэде аволь пек ламо. Седе виевстэ те енксось ушодовсь тонавтневеме сестэ, зярдо Саранскойсэ тееви экономикань ды историянь, литературань ды келень научно-исследовательской институтось. Ансяк меельце иетнестэ Пензань областев теезельть кеменде ламо экспедицият. Ученойтне тейнесть сермадовкст Шемышейской районсо. Меельцеде тесэ истямо экспедиция ульнесь 13 иеде икеле. Те разнэ ульнесь мель тонавтнемс Сосновоборской райононть. Ютавтнезь лия экспедициятнеяк. Пурнавсь аволь ансяк фольклорось, пурнавсть башка валткак. Арсевсь анокстамс од словарь. Теде башка тейневсть магнитофононь сермадовксткак.

Неень шкань фольклоронь пурнамот[витнемс-петнемс | витнемс-петнемс лисьмапрянзо]

1982 иестэ теезель экспедиция Неверкинской ды Лопатинской районтнэва, Шемышейской райононь Ранго Лисьма, Новая Яксарка, Сосновоборской райононь Шугурова ды Тешнярь велетнес. Весе экспедициятнень итогокс ульнесь «Народные песни мордвы Пензенской области» книгась.

1999 иестэ Пензань областев ульнесть кавто фольклорной экспедицият. Некеть жо экспедициятне ульнесть Чувашиясо. Ярмактнень явокшнынзе Кастрен лемсэ финно-угорской вейсэндявксось. Истямо экспедициянь участникекс ульнесть Хельсинки ошонь университетэнь финно-угрань келень кафедрань сотрудницась Мерья Сало, Пензань областень ученоесь Николай Мальков, МНИИЯЛИЭ-нь старшей научной сотрудникесь Василий Беляков, филологической наукань кандидатнэ Нина Агафонова ды Валентина Маркина.

Экспедициянть ульнесь мелезэ пурнамс фольклорной ды келень материал финской ученоенть Хейкки Паасоненэнь киява, конась ульнесь неть таркатнесэ 110 иеде икеле. Ванномс, кодат полавкст теевсть келенть ды фольклоронть марто неть иетнень перть. Экспедициясь роботась Сярда- Белинской райононь Вышелейсэ, Мордовской Ишимсэ, Шемышейской райононь Ташто Яксаркасо, Од Яксаркасо, Захаркинасо. Сосновоборской райононь Тешнярь, Вязовка, Ега, Кардафлей велетнесэ. Теде башка ульнесть Мордовиянь Рузаевкань райононь Левжасо, Сузгарьсэ, Ковылкинань райононь Троицкойсэ, Инсаронь райононь Кочетовкасо, Чувашиянь Напольное велетнесэ.

Экспедициянь перть диктофонс сермадозь ведьгемень часос материал. Теезь ламо фотографият. Материалось, кона сермадозель диктофонс тонавтнемадо мейле, невтьсы, кода 110 иес полавтовсть эрзянь морось, евксось, жанрань лия видтнэ. Евтазь велетнесэ пурназь материалось невти эрзянь моронть неень тевензэ. Истя Пензань областень Сосновоборской райононь Тешнярь велесэ удалась сермадомс ламо содавикс хорт, группат. Ульнесть сермадозь весе жанратне. Белинской буень Карсаевка велесэ седе парсте ванстовсть устной народной творчествань произведениятне. Тесэ вастовсть истят ломанть, кинь ульнесь мелезэ лездамс ванстомс эрзянь моротнень. Теке жо шкастонть Сярда велесэ эрицятне а пек покш мельсэ лездасть экспедициянтень. Экспедициясь невтизе, эрзянь фольклорось жив. Кезэрень моротне эште эрить ды сынст морсить. Велень эрьва кодамо праздниктне моровтомо а ютнить.

Афанасьева Ольга Семеновна чачсь 1918 иестэ Пензань областень Бессоновской буень Пазелки велесэ. Сонзэ мельсэ ламо эрзянь морот. Зярдо кортамось тусь неень шкадонть, сон серьгедсь моро «зярдо пурнавкшныть вейсэ». Аванть ламо моронзо сермадозь магнитофонс. Сонзэ эйкакшонзо, нуцьканзо покш мельсэ кунсолыть эйсэст ошсояк.

Роботатнесэ, конатнесэ тонавтневить неень шкань фольклоронь процесстнэ, аволь весть тешкставкшнось эрзянь фольклоронь традиционной жанратнень енксост. Сынь весе эште апак тонавтне. Моротне эсь художественной питнест эзизь емавто. Сынь кандызь эсь шкань эрямонть минек шкас. Традиционной моротнень Сура маласо велетнесэ морсить те шкас. Сынтемест тесэ а кода. Пензань областень Сосновоборской райононь Тешнярь велень фольклорной ансамблясь, Шемышейской райононь Ташто Яксарка велень хорось а весть ульнесть Московсо, Саранскойсэ, Прибалтикасо. Сынь ламоксть тейнесть выступленият радиова ды телевидениява.

Мекс ули покш мель тонавтнемс Сура маласо эрзянь велетнень фольклоронть? Васняяк секс, Сура леень бассейнась v кезэрень эрзятнень эрямо тарка. Теде кортыть исторической документнэ. Тесэнь эрзятнеде складязь ламо преданият, лият мезть. Тесэнь эрицятнень евтнемаст коряс неть таркатне икеле ульнесть пек сюпавт, секскак эрзятне кадовсть тезэнь эрямо.

Ули предания Сура лейдентькак, келя, эрзятне икеле эрясть аволь тесэ, косо-бути лиясо. Марясть, косо-бути Рав чиресэ модатне сюпавт ды чавот. Сынь арсесть самс тей. Зярдо састь, тесэнь модатне занязельть уш. Вешнесть перть-пельга, чаво тарка арась. Атятне кармасть арсеме-толковамо: эряви велявтомс мекев, эли жо вешнемс эште? Удость кодамо-бути лей маласо. Кияк а содыль кодамо сонзэ лемезэ. Вейке сыре ломанесь мерсь, келя, эряви тенек туемс те леенть кувалма. Сон, келя, теке сур невти тенек эрявикс енксонть. Истя тейстькак. Рав лейденть тусть од леенть кувалма верев ды мусть чаво модат. Тесэ кармасть эрямо. Леенть лемдизь Сурокс. Суракс лемдизь седе мейле, зярдо тей састь рузтнэ.

Эрзянь покш велетне таргавсть Сура леенть береконзо кувалма. Неть таркатнесэ икеле ульнесть вирть. 1859 иень переписенть коряс тесэ эрясть 150 тежат эрзят. Весе эрзятнестэ те 12,5%. Сехте ламо эйстэст ульнесть Пензенской губерниянь Городищенской уездсэ. 1970 иень переписень даннойтнень коряс Пензань областьсэ эрясть 109 тыщат эрзят.

Материалтнэ, конат пурназь евтазь экспедициятнесэ меельце иетнестэ, невтить - эрзянь фольклорось ютась а шожда ки. Сон эри ды эште карми эрямо кувать.

Сёрм:[витнемс-петнемс | витнемс-петнемс лисьмапрянзо]

  • В.Беляков