Тиринь келенть виензэ, али мезекс эрзятьнене эсист «Wij kepedi»-a?

Википедиясто материал - аорев содамкундосто

Истя лиссь, меельце эрямо иетне монь ульнесть сюлмавозь эрзянь интернетэнь кепедстямонть марто, ансяк важодян теленевтемасо[1], ды аволь эрзяньсесэнть. Кода появасть интернет-кулянь пачтямо керькстнэ[2], кармасть само кевкстемат, - эряви-арась теемс сынст эрзянь кельсэ?! А карман кортамо весе ломантнень кис, монь истямо кевкстема сась прязон. Карминь вешнеме интернет ванома систематнестэ[3] – мезеяк арась. Эрзянь кельсэ сёрмадовкст арасельть. Кода кортыть, «валмеревксэнь чансть таркась чаво а ашти». Сестэ монь арсемам видестэ сёрмалемс кулят ды сёрмадовкст эрзянь кельсэ виевгадсь ды те кармась монь ёрокчинь тевекс. Ушодынь чизэнзэ весть максомо кулят эрзянь келсэ рузонь «эрий журналсо», конань панжия Erzjanj Jurnal (http://www.erzia.org Архивировазь 14 Эйзюрковонь 2008 иестэ. ). Пек ламо ломанть интернэт пельде кармасть тень сёрмадомо, сакшность кевкстнемат, конатнень мельга теевильть-вельмильть сёрмадовкст. Сестэ мон прынь истямо мельс – эрзянь кельсэ пачтямось эрявикс тевесь (эли пек эрявикс).

Кода чачсь эрзянь литературась[витнемс | витнемс лисьмапрянть]

Ютась сядодо ламо иеть, кода 1884 иестэ Авксентий Юртов нолдызе эрзянь кельсэ васенце букваренть. XX пингстэ эрзянь келесь теевсь литературноекс, эйсэнзэ кармасть нолдамо кулялопат[4], журналт ды печатамо конёв пусмот[5]. Ломантне кармасть седе тонавтовиксэкс. Ламот ульнесть маштозь аволь ансяк эрзянь кельсэ бакулямонь, кудоютконь тевтнесэ кортамонь кис, истяжо сёрмадомань кисэяк, - тиринь, авань кельсэ.

Кода эрзянь келесь чаповсь ды кассь[витнемс | витнемс лисьмапрянть]

Революциянь икеле литературась эрзянь кельсэ тунь (овсе-рузонь калька) арасель, бути а ловомс пазонь ознома конёв пусмотнень. Кепедстемась ды виевгавтомась эрзянь (черкстан, эрзянь, аволь мордвань, кода сёрмадсть совэтень сёрмадома-печатьсэ) литературанть ульнесь путозь ХХ-сь пингень 20-сь иетнестэ, зярдо Ульян ошсо кармась лиснеме «Чинь Стямо» васенце кулялопась, ды Московсо «Якстере Тештесь». Кода ловиль Васильевень Тимофей, «Мордовия» кирьпусмосонть (1931 и.) «васенце молематне литературно-издательствань тевтнесэ ульнесть пек аволь кеметь. Те ульнесь од ёнкссо ушодозь тев. Вейкеяк литературасо важодиця арасель, арасельть издательствань-нолдамо кедьёнкст, арасель икелень эрямо-ютавкс те тевсенть».
Истя, васенце молицятненень пек стакаль, седе стака «копоренть трокс» тевтнень кисэ, конатнень сынь теильть эрицятнень икеле. А эрьвась снартни тень кисэ куземе «амбразура лангс», а кода тевесь а содавикс, теньс каподить виев ломантне, конатнень седеест палы «тевсэ». Истя ульнесь эрзянь васенце профессоронть, Рябовонь Анатолиень марто, кона ульнесь ледезь 30-нь ХХ пингень иетнестэ, ды аволь ансяк сонзэ марто лиссь истямо тев, ламот сестэ тусть тоначив. Ломантне понгсть «васенце молиця» янтнэс ды тоско кадовсть. Кортамонть ветян аволь седе, парсте, эли беряньстэ тейсть сестэ - эрямо лувстонть машты теемс смустев арсемат ды эрзятнень сынь пек покшт. Вейке пингедэ седе аламодо ульнесь путозь эрзянь литературань келень ундовкстнэнь теевемантень. Сынст саизь аволь ансяк кельсодыень вейсендявкссо[6], ловныцятнеяк. Ульнесь ламо теезь пильге лангс стявтомга, содамочинзэ ды сонзэ эйстэ кулянтнень пачтямонь, ды седе тов касоманть-паролгавтоманть кис.
Эрзянь литературань келенть ули эсензе ГОСТ-озо – ГОСТ 757-97 «Келень лемдямонь тешкст[7]» коната вейкетьксчи омбомасторонь ISO 639, ды кирди потмосонзо кельтнень лемест рузокс ды англакс, колмо тешксэнь рисьметне кириллистической алфавитенть коряс[8], колмо тешксэнь рисьметнэ латинэнь алфавитэнть коряс, колмо тешкст цётамонь тешкст[9]. Эрзянь келесь те ГОСТ-онть коряс истямо: эрз, erz, 835. Мекс сесте конёвонь пусмонь нолдамсто аволь видестэ сёрмадыть ГОСТ-онть коряс келенть, конань эйсэ лись пусмось? Вансынек невтевкс:

  • Журавлёв Ч. Арсемань пакся. Стихть /Вступительной статьясь В.Дёмкинэнь. – Саранск: «Красный Октябрь» типографиясь, 2003.– 440 с. – Мордов.-эрзя яз.

ISBN 5–7493–0500–7
Косто саевсь «Мордов.-эрзя яз.»? Лиси веси конёвонь пусмотне конат лиснить Мордовиясо ауль видесте тешкстазь келенть коряс, ГОСТ-сто арась истямо «мордовский язык».
Ды сестэ, коли ушодовить кортамотне кодамо-буди «мордвань кельде», али «кельтьнеде» - те корты смустень асодыця кортыцядо. Модамасторсо «мордвань кель» арась, арась истямо ГОСТ, косонь сон сёрмадозь-тешкстазь, ды сесте смустезе «мордовской келенть», кода термин, чаво. Ды валрисьмесь «мордвань кель» канды ансяк масторонь смусть, аволь келень – печкастнэ, рузтнэ, конат эрить Мордовиянь Республикасо, кортыть «мордвань кельсе». Тень аэряви тапамс ды човорямс.

Мезекс эрзятьненень «вейсень мордвань келесь»?[витнемс | витнемс лисьмапрянть]

Мекс-бути кона-кона ломантне арсить ды кортыть ауль вейкетьксте – кода якстере тюссось, кона якстере кортамосо ёвтави пижекс? Арсян истямо ломаненть лангс мерить сон ормасо дурачке, лиякс кодаяк. А вана Мордовиясо лиси истя: раськенть, конань лемезе ЭРЗЯ, сюлмить мокшотнень марто ды мерить – те «мордва раське», те косто истят арсевкст? Сёрмадыть ламо конёв пусмот, нолдыть наукань важодемат, зняро тень коряс кортавкст, тевть – косо мордва раськесь? Знярс велев а ардат, ды экспедициятнесэ а кортат ломатнень марто: «- Кить тынь ломать, прянк кода лемтядо?» Каршо маряви: «Минь эрзятанок.», али «Минь мокшот». Кода кармат эрзятнень кевкстямо, кить сестэ мордвась, сынь мерить – те мокшот, минь эрзятанок. Истя жо кортыть мокшотне эрзятнеде.
Сесте сы кевкстямо – кие лемди минек тиринь раськенек лия лемсе, ды ули истямо жо тевесь лия раськетьнень? Вансынек невтексе:

Кода сынь пряст лемдить Рузкс Эрзякс
татарлар, tatarlar татары печкаст
чăваш чуваши ветькеть
русские русские цика, рузт
Suomalaiset финны суомить
мари черемисы, марийцы марить
удмурт вотяки, удмурты удмурт
эрзят Мордва, мордва-эрзя Эрзя, эрзят
мокшет Мордва, мордва-мокша мокшот

Лиси ули, кода шабрацек раськенть лемдить эсист ладсо, кода маряви сынест седе парсте. Вейке ёнксось – те ломать кортыть шабарцек раськеденть, лия ёнкссось кода те шабраце раськесь стувты эсинзе тиринь лемензе (терминенть лемезе «эндоэтноним»), ды саи экзоним.
Сесте мезекс миненек эрзятненень мерить мордва? Кинень те эряви? Те политикань тевтне-кедтне. Кода историкесь, аволь кельсодый, Юрченков В.А., кона сонсь эрзя, пачтямокерьксэ[10] корты «Мордвань кельсэ ламо кортавкст (наречият), эрзянь ды мокшоньсесь тов сови». Те кода истят кортавкст максовить официально пачтямо керькстнева? Мекс прявт-кийрдийтне арсить ломатьнень кисэ, эрзятнень эсест «Мельяволявтомасонть эрзянь раськенть алкуксонь лемензэ коряс» кемекстасть:

Минь, весе эрзянь раськенть пельде Эрзянь Инекужос кочказь эрзянь ломантне,

  • нежелезь ламо тёжаиень эрзянь раськенть эрямопингезэнзэ, мельсэ кирдезь минек покштянок ды сынст койтнень-кирдатнень, эрзя раськень, эрзя келень ды эрзя культурань вейсэксчинь ёжонь марязь ды кирдезь,
  • мельспаросо тешкстнезь кеме эрзянь меленть ды ёжомарямонть уликсчист,
  • парсте чарькодезь ды марязь – Эрзя раськенть сы шкань эрямонзо кис мелявксось ней весемезэ ашти неень шкань эрзятнень лавтов лангсо,
  • раськеютконь праватнес ды Рузмасторонь Прявткоентень кирдезь, конат идить эрьва ломанень ды эрьва раськень праватнень,
  • лия раськень эрямопингест, коест, культураст, келест ды раськень каштанчист мельванозь,
  • бажазь улемс Модамасторонь лия раськетнень ютксо улемс-эрямс эсь кезэрень лем ало, норовазь улемс содавиксэкс, эсь питнень содыця ды мариця, эсь мельсэ эриця раськекс,
  • лия раськетнень, сынст кирдивийтнень ды ветикуротнень паро мельс ды ялгаксчис кемезь,
  • весе эрзянь раськенть мелензэ-бажамонзо ломань сельме икеле невтезь,

ЯВОЛЯВТТАНО Эрзя раськенть МЕЛЕНЗЭ: панжадо лемдявомс эсь кезэрень лемсэнек – ЭРЗЯНЬ РАСЬКЕ, ЭРЗЯ, ды кемекстатано – Эрзянь раськенть улить весе асаевикст эсензэ праванзо лия раськетнень ютксо.

Весе раськетненень Вемельксчинь, Сетьмечинь ды Изнявксчинь арсезь
Эрзянь Раськень Инекужось.
1995 ие, эйзюрков, 23 чи. Саран Ош

Лиси, тень лангс апак вано прявт кирдийтне лепштить минек раськенть лемензе ды совавтыть минек чаво «мордва» валонть алов, ды веси прявт вийсэст эвкставтыть киненьгак а эрявикс «вейсень мордвань келенть». Кода корты Мордовия Республиканть Раськень политиканть комитенть прявтось Лузгин Александр, «те доминанта (прим.: вейсень литературань келесь), кона невти раськенть цивилизациянь ды прявтмасторксонть (государственность). Кодак минек нейке улевель вейсень мордвань келенек, минь улевлинек седе прогрессивноекс, ды миненек сон седе шождасто максоволь тонавтнеме рузтнене ды печкастнене, конат эрить Мордовиясо».

Эрзянь келесь ды интернет[витнемс | витнемс лисьмапрянть]

Масторпельксесь эрьва чи ашти касомасо, истя жо кода кельтнеяк. Кода чачсь весейньмасторонь интернет сюлмавксось, содавиксчись ды сонсь смустесь «келенть касомась» тусь лия ёнов – секундань пельксень трокс сёрмадовксось пачкоди милльёнонь ловныцянень, сон ули online-со, ды эрьвась сеске максы эсензе мельполадкс[11] сёрмадовксонть лангс.

Мезе лемсеть тонь «Вий кепеди» -я?[витнемс | витнемс лисьмапрянть]

Неень шкань ломантне седе ламо ванныть невтевкст сёрмадовкс лангс интернетсэ. Мезе теемс сесте, коли арась кинь лангс невтевемс[12]? Косто саемс информациянть? Покш лезекс тонавтыцятненень ды ломантненень, конат вешнить эрявикс сюлмавкст, ули олясчинь питневтеме «Википедия» энциклопедиясь. Васняяк сон ульнесь ансяк англань кельсэ, ней ловови 265 келень пелькст-теевкст, 25-е эйстест кирдить 100 000 сёрмадовкст, ды 167-мтнень эйсэ 1000 сёрмадовкст.

Эрзянь «Вий кепеди»-ясь[витнемс | витнемс лисьмапрянть]

2008 иень панжиковонь 26-це чись совавтови эрзянь интернетэнь эрямо лувоньтень кода чи, коли ушодовсь пек покш эрзянь келенть сравтомазо ды кепедстямозо «Вий кепеди» олячинь энциклопедиянть трокс. Ледстясынек, 2008 иень даволковонь 19-це чисте Википедиянь весимасторонь келень комитетэсь редизе «Эрзянь Вий кепеди»-янть «лац теевксекс, видечисте[13] кемекстызе сонзэ аноконть ды сонз.э вейкетьсчинть путозь сетнень энциклопедиятнень тердематненень». Теде мейле ютась 4 ковт, коли содавикс ломать тейсть тарка интернетсэ, косо карми аштеме энциклопедиясь (доменэнь тарка, лиякс лемезе), ваность сёрмадовкснэнь алкуксчист. «Вий кепедиянть» касомазо нейкак а лотки, те шканть видс «вийкепедицятне» (истя лемдязь ломантне, конат теить «вий кепеди») чапасть-сёрмадсть 1,5 тёжа сёрмадовкст. Эйсэст парсте, фотокувт[14] марто сёрмадозь эрзянь культурась-мазычись, койтне-кирдатне, истя жо эрзянь кельс юльнесь ютавтозь веси Россия Масторонь ёнкссне-пельксне, ды кой-мезе лия Мастортнеде. Кода сёрмады эсинзе лецтнематнесе американь келеньсодыцясь[15] Рютерэнь Джак «эрзянь вийкепедись, ашти од феноменекс эрзянь мельсэ». Ды видесте редязь, сонсь латинской валось «википедия» эрзянь кельсэ гайгеви кода «вий кепеди», - сесте смустезэ седе покшгалтови. Лиякс меремс, виесь эрзянь келенть карми касомо «Вий кепеди»-ясонть.
Мезе ульнесь сехте стака википедиянть теемсте? Сон чапозь-путозь чаво юрт лангс – пель иеде седе ламо шка «вийкепедицятне» ютавтсть эрзянь кельс ламо тёжат терминт ды валcюлмавкст[16], конат аштить сюлмавозь интернет, али лиякс Wicrosoft марто. Истямо эрзянь келеньсодыцясонть эзь ульне. Видесте меремс, мештень апак чаво, неень шкастонть ушодовсь од пинге эрзянь кельсодыень теемакуросонть[17], ды те пек паро. Ютазь пингенть, 20-сь иетнестэ содавикс эрззянь кельсодыесь Рябовонь Анатолий кортыль «вейксень терминологиянь путомадо-аравтомадо», конатненень эряви теемс истят ушодкс тешкст: истят терминт, конатнень эйсэ кармасть саеме лезэ веси ломантне, математикань, техникань терминтнэ ды с. т.[18] сынст эряви апак корта путомс кортамо лувтненень сестэ, коли сонзэ арась эсинзэ термин»(Т.Васильев «Мордовия», 1931 ие.). Мекс неень шкань видс кой-кона кулялопатне («Сятко», «Эрзянь Правда») максыть ковонь лемест сырекс, кадозь рузонь ундоксонть: январесь, мартось ды с.т. Неень шкань эрзятне саизь эрямозость ковонь истямо лемтнень:

рузкс эрзякс
Январь Якшамков
Февраль Даволков
Март Эйзюрков
Апрель Чадыков
Май Панжиков
Июнь Аштемков
Июль Медьков
Август Умарьков
Сентябрь Таштамков
Октябрь Ожоков
Ноябрь Сундерьков
Декабрь Ацамков


Пря апак яжа, келесь тееви ансяк «-есь ды -ась»-екс, ды мейле мерить – а косо тынк келесь, косо сонзэ мазычизэ, гайтез), валрисьмень чудикерьксезэ? Невтевкс, истямо it-важодицянь «содавикс пилене» «удалить» ды «править» терминтнэ кармасть «нардамс» ды «витнемс-петнемс», «Главная страница» кармась «Прякслопа»-кс. Истя эскелькс эскелькс мельга.
Сонсь викепедиянь технологиясь, кона лемдязь вики-разметкакс, максы эрьвантень путомс лезкс: ушодомс од сёрмадовкст, витнемс-петнемс, путомс кой-кодат арсемат, ды кортнемс весинь марто панжадо сёрмадовксонть коряс. Те олячинь питневтеме энциклопедия.

Кинень кастомс «вий кепеди»-янть?[витнемс | витнемс лисьмапрянть]

Ютась вейке ие эрзянь «вий кепеди»-янть панжомсто, ансяк теицятнеде кадовсть истяжо кавто-колмо ломать. Мезедэ те мери? Арсян, те зыянось корты колмо ёнкссто – али те проектэсь эзь туе мельс, сонзе эйстэ аздыть, али ломантнень арась лисема сонзэ лангс (арась интернетэст). Ванозь, зняро монень мельполадкст, сёрмат самонть ланкс неяви – те проектэсь-тевесь пек мельс тусь. Содыть-арась эйстедензэ??? Содыть. Мекс сестэ арась лездамот кельсодыйтнень Мордовиянь Масторсто? Кияк теде а теи салавачи, эрзянь «вий кепеди»-янть теицятне а эряить Мордовиясо?! Те кода истя? Паро невтемс се ютазь теевксенть кона ули Википедиянь вишка келень пелькснэнь, сайсыне невтеме удмуртонь. ВТТ[19] ды школань тонавтницятненень информатикань уроктнесэ тонавтыльть вики-технологиятнень, ды сынь «пештильть эсист» Википедиянть пельксест сёрмадовкстнесэ. Мезе сёрмадомс – те лия тевесь. Сёрмадомс эрзянь кельсэ эрьва мезде – те покш тев. Истя ванна,од касыця ломантнень теемест тиринь келень вечкицякс ды содыцякс. Те касты информационной раськень кельтнесэ технологиятнень-кедьёнкснень ды теи од суоми-угрань куля-медиа[20] касовкст.

Эрзянь «вий кепеди»-янть ванодо ды лездадо тесэ: http://myv.wikipedia.org

Валтне конат сёрмадовксонть тештязь[витнемс | витнемс лисьмапрянть]

  1. Теленевтема - рузкс «телевидение»
  2. Интернет-кулянь пачтямо керькст – руз. «интернет-СМИ»; тееви «куля» - новость, «пачтямо»-доносить, «керькс» - круг валтнэстэ
  3. Интернет ваннома системат - поисковые интернет системы (по-иному, просто «поиск»)
  4. Кулялопа – рузкс «газета». Тееви кавто валсто: «куля» - новость, ды «лопа» - лист
  5. Конёвонь пусмо – рузкс «книга»
  6. Келеньсодыця вейсендявкс – рузкс «лингвистическое сообщество»
  7. «Келень лемдямонь тешкст» - Коды наименования языков (ГОСТ 757-97)
  8. Колмо тешксэнь рисьме кириллистической алфавитень коряс – трёхбуквенный код на основе кириллистического алфавита
  9. Колмо тешкст цётомань тешкс – трёхсимвольный цифровой код
  10. Пачтямокерькс – радио программа
  11. Мельполадкс – комментарий
  12. Невтевкс – рузкс ссылка; Ссылаться – невтевемс
  13. Видечи – юридически
  14. Фотокув – фотография
  15. Келеньсодый, келеньсодыця – лингвист
  16. Валсюлмавкс – словосочетание
  17. Эрзянь кельсодыень теемакуро – эрзянское лингвистическое построение
  18. Ды с. т. (лиякс ды седе тов) – рузкс и т. д. (и так далее)
  19. ВТТ (лиякс «вере тонавтнима тарка») – ВУЗ (высшее учебное заведение)
  20. Суоми-угрань куля-медиа – рузкс «финно-угорские news-медиа»


Петрянь Андю, И-Петрань ош, 2009 ие.