Терёшкина, Евдокия Яковлевна

Пол эли гендер	аваломань
Чачома чи	чадыковонь 17 чи 1945(1945-04-17)
Чачома тарка	Сомазляй, Мамолаевское сельское поселение[d], Ковёлбуе, Мордовиянь Автономной Советэнь Социалистической Республикась[d], Российянь Советэнь Федеративной Социалистической Республикась[d], Советэнь Вейсэндявкс[d]
Кулома чи	ацамковонь 17 чи 2000(2000-12-17) (55 иеть)

Терёшкина Евдокия Яковлевна – мокшонь валморозей, сёрмадей.

Эрямо пингезэ

Чачсь 1945-це иень чадыковонь 17-це чистэ Ковёлбуень Сомазляй мокшонь велесэ колхозникень семиясо. Эсь велень 7 иень, Мамолаевань средней школатнень прядомадо мейле тонавтнесь эрзянь-мокшонь госуниверситетэнь историко-филологической факультетсэ. 1965-це иестэ саезь важодсь Мордовиянь ды Пензенской областень школатнесэ. 1971-це иестэ сась эрямо Саран ошов. Важодсь «Мокшонь правда» газетасо литсотрудникекс, мейле отделэнь прявтокс. 1981-це иестэ тердизь важодеме эрзянь-мокшонь книжной издательствань художественной литературань редакциянь прявтокс. Кеветее иень ютазь кассь теке издательствань прявт редакторокс.

Шкинемазо

«Свадьба» васень ёвтнемазо лиссь 1971-це иестэ «Мокшонь правда» кулялопасо. Се шкастонть саезь ушодовияк шкинемань кизэ. «Мокшонь правдасо» печатавсть аволь аламо ёвтнеманзо, очеркензэ, зарисовканзо. Ламотне эйстэст мейле совасть «Ольга тонавтни эрямонть» эйкакшонь туртов алтазь книгазонзо. Эсь произведениясонзо Е.Я. Терёшкина кепеди истят эрявикс тематнень, кода тетянь-авань, пертьпельксэнь вечкемась ды ванстомась, сы шкань эрямонтень эсь прянь анокстамось. Сёрмадеесь тень теи виевстэ, маштозь. А стяко вишка ловныцясь вастынзе сынст паро мельсэ. «Сы ашо лишмесэ» омбоце книгасонзо, кона лиссь 1991-це иестэ, Е.Я. Терёшкина токи семиянь стакачитнень. Пусмонтень совасть ёвтнемат ды кавто повестть. Авторонть мелявтовты се, мекс ломантне секе тев теевить казямокс, велень ламо эрицятне лоткасть вечкеме моданть, мекс мокшотне стувтнить чачома келест. Тагояк тематне панжовить маштозь, тевень содазь.

Кода ютавтыця

Е.Я. Терёшкина лововсь лия кельстэ паро ютавтыцякс. Ютавтнесь произведеният мокшонь кельстэ рузонь кельс, седе ламо – рузонсестэ мокшонсес. «Мокша» журналсо секе тев лиснесть Е.Я. Терёшкинань ютавтовкссо ламо учёнойтнень (историктнень, философтнэнь, краеведтнэнь, литературоведтнэнь) статьяст. Эсь шкасто эрзянь-мокшонь книжной издательствасо лиссть В.А. Юрчёнковонь «Мокшэрзятне икеле ды ней», «Кода содасть мокшотнень ды эрзятнень» книганзо. Сынст истя жо ютавтынзе Евдокия Яковлевна.

Е.Я. Терёшкинань прявтсо лиссть лиртературно-художественной истят пусмотне, кода «Созвездие» (1985), «Светлое небо» (1988), «Встречи – 90» (1990), «Эрясть-аштесть атят-бабат» авторской ёвксонь ды легендань книгась (1990) ды лият. Сынст эйс совавтозельть аволь ансяк содавикс литератортнэнь, истя жо одтнэнь произведенияст.

Е.Я. Терёшкина аволь кувака эрямонзо перть кенерсь ламонь тееме. Эзь пеле стакачитнеде. Вечксь ледстнеме эйкакш пингензэ, кона савсь войнадо мейлень иетненень. Стакачитнень изнязь кемекстаськак войнадо мейле чачозь эйкакштнэнь обуцяст, шумбрачист. Сынь кассть вандынь чис кемицякс, лиянень паронь теицякс.

1995-це иестэ Е.Я. Терёшкина совавтозель Россиянь писателень союзс. Сон – Мордовия Республикань культурань заслуженной роботник (1992), СССР-нь печатень отличник (1988), МР-нь государственной премиянь лауреат (1998). Россиянь киниганьнолдыень Ассоциациянь Улиця. Кулось 2000-це иень ацамковонь 17-це чистэ. Калмазь Саранскойсэ.

Литературась

• Писатели Мордовии : библиографический справочник : в 2 т. Е. 2. Л – Я / сост. : А. И. Брыжинский, Л. П. Бойнова, Е. И. Чернов. – Саранск : Мордовское книжное издательство, 2015. – 544 с. ISBN 978 – 5 – 7595 – 1938 – 6 (т. 2)
• Еремчева, Т. М. Пути и тенденции развития мордовской детской литературы 70-90-х годов XX века : специальность 10.01.02 "Литература народов Российской Федерации (с указанием конкретной литературы или группы литератур)" : автореферат диссертации на соискание ученой степени кандидата филологических наук / Еремчева Татьяна Михайловна. – Саранск, 2000. – 18 с. – EDN ZKLJBD.