Рузанкина, Наталья Станиславовна
| Рузанкина, Наталья Станиславовна | |
|---|---|
| чачома чись | сундерьковонь 20 чи 1966 (58 иеть) |
| Чачома тарка | |
| Мастор | |
Рузанкина Наталья Станиславовна, сёрмадей.
Эрямо пингезэ
[витнемс | витнемс лисьмапрянть]Чачсь 1966-це иень сундерьковонь 20-це чистэ Саран ошсо интеллигентэнь семиясо. Прядызе Н.П. Огарёв лемсэ Эрзянь-мокшонь госуниверситетэнь исторической факультетэнть. Важодсь корректорокс университетэнь издательствасо, школасо тонавтыцякс, библиотекарекс. Ветясь вейсэнь история Саранонь православной духовной училищасо.
Наталья Станиславовна свал мельспаросо ледстни «Пегас» литературной студиянть, конань ветясь рузонь содавикс поэтэсь А.Н. Терентьев. Саран ошонь ламо од сёрмадыцятне литературасо васенце эскельксэст теизь сонзэ тонавтоманзо вельде. Александр Николаевич валсояк, тевсэяк лездась одтнэнень. Шнась весень, кить ойме виест макссть шкинемантень. Истятнэнь ютксо ульнесь Наталья Рузанкинаяк. Васня сон сёрмадсь стихотвореният, меельце шкастонть седе ламо важоди прозасо. Стихотворениянзо лиснесть Эрзянь-мокшонь книжной издательствасо нолдазь вейсэнь истят пусмотнесэ, кода «Родные напевы», «Восхождение», «Калейдоскоп», «В саду моих мечтаний». Поэзиязо домка, седейс токиця. Образонзо виевть, мазыйть, лиянь ёнов а молицят.
Поэзиянь вечкицятне покш мельсэ вастызь Рузанкина Натальянь стихотворениянзо, конат совасть «Поэтический голос Мордовии» колмо томсо пусмонтень. Сон лиссь 2002-це иестэ. Ламот тешкстызь: литературас сась од, гайтев вайгель марто сёрмадей.
Рузанкина Натальянь башка ёвтнеманзо ды «Король и тварь» повестезэ печатазельть «Странник» од ломанень туртов журналсо. Произведениянзо лиснесть Московсояк: «Литературная Россия» газетасонть, «Смена» журналсонть, «Басткон» сакральной фантастикань сборниксэнть.
Нолдась стихотворениянь кавто башка пусмот: «Воздух розы» (1995) ды «России васнецовская пора» (2002). Ловныцятне сынст вастызь лембестэ, ламот кармасть пштистэ ваномо шкинеманзо мельга.
1998-це иестэ Рузанкина Наталья кармась улеме А.Н. Терентьевень лемсэ премиянь лауреатокс. 2002-це иестэ тензэ максозель Н.А. Снегирёвонь лемсэ премиясь, 2003-це иестэ – од литератортнэнь туртов Мордовия Республикангь Прявтонть литературной премиясь.
Меельце кавто книганзо лиссть «Красный октябрь» типографиясо. 2005-це иестэ – «Возраст, которого не было». Эйзэнзэ совасть повестть ды ёвтнемат. 2008-це иестэ – «Возвращение». Тезэнь совасть романозо ды повестезэ. Прозань книгатне истя жо вастозельть покш мельсэ.
Рузанкина Наталья зярдояк а стувтни эсь ундоксонзо. Сынь эрзянь. Покштязо эрясь Березник буень Симкина велесэ. Вишка порасто Наталья секе тев сакшнось тензэ инжекс. 2008-це иестэ Рузанкина Наталья совавтозель Россиянь писателень союзс. Сёрмадеентень те макссь шкинемасо од вийть. Эри сёрмадеесь Саран ошсо.
Писатели Мордовии : библиографический справочник : в 2 т. Е. 2. Л – Я / сост. : А. И. Брыжинский, Л. П. Бойнова, Е. И. Чернов. – Саранск : Мордовское книжное издательство, 2015. – 544 с. ISBN 978 – 5 – 7595 – 1938 – 6 (т. 2) «Чилисема», 2019, №12, С.14