Нефёдов, Михаил Иванович

Нефёдов, Михаил Иванович — скульптор^[1].

Эрямо пингезэ[витнемс | витнемс лисьмапрянть]

Чачсь 1907-це иень таштамковонь 21-це чистэ Алатырь ошсо (ней те Чуважонь Республика). Ульнесь Ине Отечествань войнасо. Прядсь Н. Новгородсо рабфак (1931), тонавтнесь Московонь архитектурань институтсо (1934 – 1938), Г. И. Мотовилов скульпторонть студиясо (1941-це ие видьс). 1941-це иестэ эсь олясо тусь фронтов, 1942-це иестэ пек ранявомадо мейле демобилизовавсь. Важодсь монументальной, декоративной ды станковой пластикасо, поладсь рузонь реалистической скульптурань демократической койтнень^[1].

Сехте содавикс теевксэнзэ: СССР-энь ВДНХ-нь туртов «Эрзянка» ды «Мокшанка» (1938); Иркутск ошсо «Борцам революции» кеврунго (1940); Советэнь Союзонь Геройтненень И. А. Пожарскойнень (Ардатов ошсо) ды М. П. Борониннэнь кеврунгот; Алатырь ошсо В. Ф. Ветвинский Ине Отечествань войнань участникентень кеврунго (1947); Селищи велесэ (ней те Мордовия Республикань Краснослободской буесэ) Веденяпин Аполлон декабристэнтень обелиск (1950); Комсомольский велесэ (ней сон Мордовия Республикань Чаунза буесэ) Т.Бибинань калмонзо лангсо памятник (1961); М. Е. Евсевьев эрзянь, мокшонь просветителенть портетэзэ; Ф. Ф. Ушаков адмиралонть портретэзэ; И. М. Яушев морыцянть портретэзэ (1946); П.С.Кириллов сёрмадеенть портетэзэ (1956); Е. П. Кривошеева сказительницанть портретэзэ (1957); А. И. Полежаев поэтэнть портретэзэ.

Невтневсь Россиянь ды Союзонь келес выставкатнесэ (1937-це иестэ саезь). Важодевксэнзэ ванстовить С. Д. Эрьзя лемсэ изобразительной искусствань мордовской республиканской музейсэ, И. Д. Воронин лемсэ Мордовской республиканской вейсэндязь краеведческой музейсэ, Мордовия Республикань Правительствасо гуманитарной наукань научно-исследовательской институтсо.

Кулось 1963-це иень ацамковонь 8-це чистэ Москов ошсо.