Конкка, Юхани

Википедиясто материал - аорев содамкундосто
Перейти к навигации Перейти к поиску
Юхани Конкка
Чачома чись: таштамковонь 4 чи 1904(1904-09-04)
Чачома тарка:
Кулома чись: аштемковонь 22 чи 1970(1970-06-22) (65 иеть)
Кулома тарка:
Гражданство (подданство):
Род деятельности: вийкирдий-ветий, куляньсёрмадей, сёрмадей
Годы творчества: с 1928
Награды:

Юхани (Иван Семёнович) Конкка (суом. Juhani Konkka) (1904 иень таштамковонь 4 чи, Конколовосо, Ине-Петрань ошонь губерниясь — 1970 иень аштемковонь 22 чи, Кухмойнен, Суоми Мастор) — финнэнь, ингерманландиянь сёрмадей, ютавтыця, сценариень сёрмадыця.

Эрямопингезэ[витнемс-петнемс | витнемс-петнемс лисьмапрянзо]

Юхани Конкка чачсь Конколово (суом. Konkkala) велесэ, Токсово веленть маласо, конась аштесь Ине-Петрань ошонь губерниянь (неень шкане Ленинградской ёнксонь Всеволожской буесэ) Шлиссельбургской уездсэ сюпав инкеринь раськесэ. Кудонь лемесь — Корвела. Тетязо — Симо Конкка, ульнесь велень прявт, кочксезель мировой судиякс, авазо — Катри Ванханен. Весемезэ кудосо ульнесть 12 эйкакшт, 5 - кулость вишкапингстэ.

Тетязо свал явсь мель ловномантень, кудосо свал ульнесть ламо книгат, Библиясто саезь Карл Марксонь ды Жан-Жак Руссонь видс.

Юхани Конкка кармась финнэнь кельсэ валморонь сёрмалеме 8 иесэ. Сон прядызе ушодкс школанть Конколово велесэ, теде мейле прядсь Токсовань кавто иень тонавтнема тарканть - земской школанть. 12 иень топодемас сон маштсь ловномо ды сёрмадомо аволь ансяк финнэкс, рузкскак. Рузонь кельс чарькодеманть сон тонавтызе рузонь классикань валморотнень ды романтнэнь кувалт, сёрмадсь валмрот рузонь кельсэяк.

1917 иень сёксня Юхани поступась петроградской лицейс, мейле поладызе тонавтнеманзо Петроградской велень тевень теемань тонавтнема таркасо, ансяк тонавтнемась эзь прядово, секс мекс тетянзо арестовизь сень кисэ, што эзь карма ёвтнеме эсь икельце венчамонь цёранзо ланга, конась тусь Суоми Масторов. Теде мейле тетяськак оргодсь Суомив. Весе раськень тевтне ней савсть ветямс Юханинтень.

1919 иень сёксня авазо ульнесь арестовазь ды ускозь Петроградс, кода мирдензэ велявтомань кемекстыця. Секе сёксня сынст кудос азорокс совасть эрямо кавто финнэнь коммунистт.

Теде мейле тетязо салава велявтсь Советской Россияв, ансяк тензэ кекшнемаль Ржевень артиллерийской полигонсо, се шкас, кода Юхани анокстась аванзо оргодема. Сеске теде мейле весе Конкка раськесь сыргась Суоми Масторов вирень киява.

Те нилечинь вирьга молемась вишка эйкакш кедь песэ ульнесь вадрясто ёвтнезь Юхани Конккань романсо - «Петра ошонь толт».

Суомив понгомадо мейле Юхани Конкка 15 иесэ сеске совась эсь мельсэ Пелевеёнкоснь-Инкеринь полкс, конанть прявтозоль Юрьё Эльфенгрен. Иензэ коряс сонзэ саизь вестовоекс. Полконть аштема таркась ульнесь Кирьясало велесь — те таркась ульнесь яволявтозь сокицянь-видицянь Пелевеёнксонь Ингерманландиянь Республикань прявт таркакс. Се шкане тетянзо-аванзо эйкакш марто снартнесть ушодомс од эрямо Суоми Масторонь Раутусо, косо пурнавкшность малава 3 тёжат Пелевеёнксонь Ингерманландиянь ломанть.

Тартунь мирной сюлмавкс мейле 1920 иень ожоковсто советэнь вийкирдийтне алтасть весе инкеринь ломатненень амнистия ды эсь кудов велявтома.

1921 иень аштемковсто Конкка раськесь велявтсь кудов, ансяк Юханивтеме: сон арсезевсь лиядомс Суоми Масторсо ды поладомс эсь тонавтнеманть. Васня сон тонавтнесь раськень училищасо Импилахтисэ, мейле поступась Сортавалань тонавтома семинарияс.

1922 иень ушодксо сон эсь мельсэ ульнесь Карелэнь кепедемасо ды Поросозеронь ало ледезель стакасто полдас. Зярыя ковт аштесь Сортавалань орманьменькстаркасо, керсемадо мейле сонзэ вить пильгезэ кармась керш пильгеде нурькине ды тень кувалт яволявтызь седе тов ойнас а маштовиксэкс.

1923 иень Роштувань шкане Юхани салава ютызе СССР-нь границанть: пек ульнесь мелезэ неемс эсь раськенть. Ансяк се шкас сонзэ кавто вишка сазоронзо ды ялаксозо совасть комсомолс ды вастызь сонзэ беряньстэ. Тетязо пек пельсь советской вийкирдийтнеде ды теде эзь корта.

Те ульнесь меельцеде, кода сон неизе эсь тиринь кудонть ды тетянзо-аванзо. 1931 иестэ тетянзо-аванзо Урхо ды Унелма эйкакшнэ марто кучизь ссылкас - Сибирев. Ташто Конкка кудонть миизь пенге лангс, а одонть ускизь Токсовав ды тейсть тосо печатамонь кудо. Покш эйкакштнэ Ээро ды Хилма совасть коммунистической партияс. Кавто иень ютазь авантень эйкакш марто мерсть велявтомс Сибирьстэ, ансяк ардомась ульнесь аволь кудов, а Карелэнь Республикав Ругозеро велев. Тетянзо же мекевланк, кучизь седе васов, Якутияв, Верхоянск малав, косо сон кулось 1933 иестэ.

Мекев велявтоманьперть финнэнь границань ванстыцятне куродызь Юханинь кода якстере шпиононь. 1924 иестэ сонзэ нолдызь олячив ды сон тусь эрямо Хельсинкив, поступась тонавтнеме Высшей кулялопань тонавтнема таркав (суом. Sanomalehtitutkinto Yhteiskunnallinen korkeakoulu). Тонавтнемань кисэ Юхани пандсь вирень керицякс-уевтицякс эли батракокс важодемань ярмаксо.

1927 иестэ сон прядызе институтонть ды получась кулялопань сёрмадеень диплом.

1929 иестэ лиссь сонзэ васенце эрямодоёвтнемазо «Минь, геройть» («Me sankarit») Урхо Торикка псевдоним ало. Те эрямодоёвтнемасо сон пейдезь невти гражданской тортингенть Карелиясо ды эсензэ тосо улеманзо, тень кувалт критиктнэ макссть тензэ «финнэнь Ремарк» ёнксонь путома.

1943 иестэ лиссь сонзэ эсь эрямодоёвтнемазо «Лытыцянь кизэзэ» (1943), конась кармась Суоми Масторсо бестселлерэкс ды нолдазель ламонь кирда. Эсь эрямодоёвтнемас истяжо совасть «Лытыцянь терть» (1945), «Лытыцянь тонавтнема тарканзо» (1946) и «Лытыцянь якамозо-пакамозо» (1947) сёрмадовксонзо.

1958 иестэ, финнэнь сёрмадыцянь делегациясо улемстэ, сон сакшнось Московов, Самаркандов ды Ленинградов. Ленинградсо улемстэ сон якась Токсовав: ульнесь мелезэ варштамс се тарканть, косо ульнесь тиринь велезэ, ансяк полигонь лангс сонзэ эзизь нолда. Секе иестэ лиссь сонзэ сехте содавикс, эсь эрямо ланга ёвтниця романозо «Петра ошонь толт» («Pietarin valot»), косо ёвтнезель эсь эйкакш пингеде, од шкасто-порасто рузонь революциянь шкане.

Сёрмадомань тевденть башка, Юхани Конкка важодсь кода WSOY печатамокудонь витницякс 1937—1944 ды 1950—1955 иетнестэ. 1949 иестэ саезь 1958 иень видс сон ульнесь Финнэнь сёрмадыцянь вейсэндявксонь правлениясо.

Юхани Конкка ульнесь текень марто кинонь сценариень сёрмадей[1].

Сон ламо ютавтсь рузонь классика, саемга Н. В. Гоголень, Ф. М. Достоевскоень, Л. Н. Толстоень, А. П. Чеховонь, М. Горькоень, Б. Л. Пастернаконь, М. А. Шолоховонь лы лиянь. Весемезэ финнэнь кельс сон ютавтсь сядодо ламо сёрмадовкст, тень кисэ 1967 иестэ тензэ макссть СССР-нь ютавтыцянь арневть казне.

Арневть казнень саемадо мейле, Юхани ардсь Петроскоев малавиксэнзэ туртов, конатнень эзинзе нее 40 иеде ламо ды явшинзе весе ярмактнень сыненст. Карелэнь сёрмадыцятне ловсть эйсэнзэ предателекс ды ашофиннэкс, тень кувалма каршовавтомс маронзо отказасть.

Юхани Конкка кулось 1970 иень аштемковонь 22 чистэ эсь дачасо, Кухмойненсо (суом. Kuhmoinen), куншкань Суоми Масторсо.

Сонзэ ульнесть колмо эйкакшонзо: Анита, Урхо ды Хейкки. Анита Конкка истяжо кармась сёрмадыцякс, сёрмадсь 11 эрямодоёвтнемат ды кармась Суоми Масторонь Вийкирдиень арневть казнень лауреатокс.

Вишка ялаксозо Унелма Конкка (1921—2011) — филологиянь наукань кандидат, ИЯЛИ КарНЦ РАН-со прявт наукань важодиця, советской, российской валморозей, прозань сёрмадей, СССР-нь Сёрмадыцянь вейсэндявксос совиця.

Юхани Конккань романонзо, конат ютавтозельть рузкс: «Огни Петербурга» (2014), «Мы, герои» (2015)[2][3][4][5][6][7][8].

Фотокувт[витнемс-петнемс | витнемс-петнемс лисьмапрянзо]

Сёрмадовксонзо[витнемс-петнемс | витнемс-петнемс лисьмапрянзо]

  • «К экономическому народовластию». Народные социально-экономические требования. Выборг. Издание автора 1928.
  • «Мы, герои: очерк Карельского похода». Роман. Хельсинки. Kansanvalta 1929 (под псевдонимом Урхо Торикка); СПб, Гйоль, 2015, ISBN 978-5-90479-04-17
  • «Красный ураган». Роман об Ингерманландии. Хельсинки. Otava 1931 (под псевдонимом Урхо Торикка)
  • «Во время кризиса». Одноактная комедия. Хельсинки. 1932. (под псевдонимом Урхо Торикка)
  • «Концерт ударных инструментов». Радиопостановка. 1935
  • «Богатый дядюшка». Одноактная пьеса. Karisto 1935
  • «Важные господа». Пьеса в двух действиях. Karisto 1936
  • «Женщина в красной шляпке». Одноактная пьеса. Karisto 1936
  • «Фронт любви». Двухактная комедия. Karisto 1936
  • «На границе двух миров». Роман. WSOY 1939
  • «Советская шпионка». Роман. WSOY 1942
  • «Лето бродяги». Роман. WSOY 1943
  • «Сорванные маски». Роман. WSOY 1944
  • «Оковы бродяги». Роман. WSOY 1945
  • «Школы бродяги». Роман. WSOY 1946
  • «Скитания бродяги». Роман. WSOY 1947
  • «Растраченное сокровище или похождения Сакари Коркия в мире писателей и богемы Хельсинки». Роман. WSOY 1947
  • «Заколдованная невеста». Роман. WSOY 1948
  • «Награждают лучших». Роман. 1948
  • «Дары жизни, письма из Орлиного Гнезда». Роман. Порвоо. WSOY 1950
  • «Жёлтый журавль». Книга для детей. WSOY 1953
  • «Петушок золотое зёрнышко». Восточные сказки. Порвоо. WSOY 1954
  • «Время решать». Роман. Порвоо. WSOY 1954
  • «Огни Петербурга». Роман. Порвоо. WSOY 1958; СПб, Гйоль, 2014, ISBN 978-5-90479-030-1

Арневть казнеть[витнемс-петнемс | витнемс-петнемс лисьмапрянзо]

  • Микаэль Агриколань лемсэ арневть казне (1961)
  • Суоми Масторонь сёрмадеень вейсэндявксонь арневть казне (1962)

Невтькеть[витнемс-петнемс | витнемс-петнемс лисьмапрянзо]

ЛопаПарцун:Внешние ссылки