Желтов, Дмитрий Степанович
| Желтов, Дмитрий Степанович | |
|---|---|
| чачома чись | 1890 |
| Чачома тарка | |
| Кулома чись | 1961 |
| Кулома тарка | |
Дмитрий Степанович Желтов (чачсь1890 - кулось1961) - советэнь-партиянь тевветий, тонавтыця, Мордовской атономиянь вейкесь теицятнестэ.
Эрямопингензэ[витнемс | витнемс лисьмапрянть]
1890-це иестэ эрзянь Напольное велесэ, кона ней Чувашия Республикань Порецкоень районсо. Те велесь куваксто стравтовсь Сура леенть чирева. Умонь шкасто саезь сон содавикс сюпав умарьпиресэнзэ ды медев нешкепиресэнзэ. Седеяк пек содавикс кудонь чапицясонзо, конат ютнизь-яксизь весе Россиянть ды эрьва косо кадсть мельгаст теке аволь кудоткак - чувтонь викшневкс потсо налкшкеть. Те кияванть, паряк, туевель Митя Желтовгак (тетязо, велень паро плотникесь, вишкинестэ уш тонавтокшнызе узерень-стамескань кирдеме), ды эзизе нолда земствань ушодома школань тонавтыцясь Максим Иванович Анашкин. Сон рединзе цёракаенть валдо превензэ ды чартьчинзэ, тонавтнеме покш бажамонзо ды пшкадсь тетянстэнь-аванстэнь кучомс эйдест семинарияв. Сеть сынськак чарько диця ломанельть, содасть: превей ломанентень те эрямосонть ков седе шожда, ды каршо молеме эзть карма.
Семинариясь эйстэст аволь пек васололь, Порецкойсэль. Эсь шкасто сонзэ панжокшнызе Илья Николаевич Ульянов, вешематне эйсэнзэ покшольть, секс сеть, кить понгонесть тей тонавтнеме, бажасть ладямс неть вешематненень эрьва ёндо, прясткак ветясть кода эряви, тонавтнестькак. Ледстнематнень коряс, Митя Желтовсо те бажамось седеяк покшоль, мезенть кисэ свал шнасть эйсэнзэ тонавтыцятне. Обуцянь коряскак, келя, цёрась ульнесь куш ков: кадык сэтьмель, покордамс прянзо эзь максне - шумбраль ды виевель, эзь вечке манчицят ды тевтеме лужалицят; сюпав ойме ломань, сон питнейкс ловсь ялгаксчинть, пек лембестэ кортнесь тетядонзо-авадонзо, эсь велень эрицятнеде, вечксь сынст ды путсь мельс. Сеть, эряви меремс, сынськак кеняркшность кувалманзо.
Виде, васня а весе кемсть: каня изнявить превей наукатне карень кодый эрзянень? Тень кисэ, зярдо 1910-це иестэ Дмитрий Степанович прядызе семинариянть, покштояк покш мельспаро печтясть аволь ансяк тетязо-авазо, весе велесь. Сонензэ вечкезь кармасть мереме «минек учителесь». Аволь ансяк секс, мекс велестэст сон васенцель, нень максозель те лемесь; секскак, мекс эйстэнзэ ушодовсь покш содамочи мельга Напольноенть сыргамозо.
Тень пингстэ кода сонстензэ Желтовнень лездась эсь шкасто семинарияв экзаменэнь максомо анокстамсо Максим Иванович Анашкин, истя сонськак ней «баславась» тонавтнеме тиринь велень сеть од ломантнень, кить сайнесть мель туемс киява - прядомс училища, семинария, институт. Кода корт кортнесь сестэ, лисемс ломанекс... Сынст ютксо -1930-це иетнестэ КПСС-нь Мордовиянь обкомонь омбоце секретаресь Пётр Данилович (1894 - 1938), Якстере Армиянь ды Флотонь комиссаронь лездыцясь Андрей Игнатьевич Фролов.
Литературась[витнемс | витнемс лисьмапрянть]
- Дёмин, Василий Иванович. Эрзянь журналистиканть эрямопингезэ : монография : кавто пельксстз Василий Дёмин. - Саранск : Лит. фонд России, 2013. - Васенце пельксхь ' - 404 с. - Мордов.- эрзя яз.