Глаголонть залогонзо

Википедиясто материал - аорев содамкундосто
Перейти к навигации Перейти к поиску

Залогось - те глаголонть уликсчизэ, маштомазо эсензэ формасонзо невтемс тевтеицянть ды объектэнть ютксо эрьва кодат сюлмавоматнень.

Неть сюлмавоматнень лангс нежедезь, явовить эрзянь глаголонть истят залогонзо: действительной, страдательной, велявтомань(возвратной), тувталонь( понудительной).

Действительной залогось[витнемс-петнемс | витнемс-петнемс лисьмапрянзо]

Действительной залогонь глаголось панжи истямо тевтеемань смусть, кона кандови виде объектс, конань вельде мезе-бути тееви, топавтови: 1. Тетям теи пирявт. 2. Авась шли вальма. 3. "Авай, рамат тень мазый паця?" - энялды тейтерькась. "Раман, кода эно а раман". 4. Тикшетнестэ теиль (Акулина Ивановна) надобият (Ч. Журавлёв). 5. Мишка(лишмесь) пек вечкиль, зярдо сонзэ каванилизь пинемеде (Ч. Журавлёв).

Объект марто полавтнемань форматне - действительной залогонь глаголт, сынст тевтеемаст свал аравтови виде дополненияс.

Невтемга: 1. Недлянь ютазь Катянь нолдызь больницясто. 2. Цёрась пекстызе кенкшенть, кискиненть сюлмизе кузтемпес...эйкакшонть саизе берёмазонзо, ды сынь тусть Верепев. 3. "Ломанде а эряви пелемс, Сашок", мурнизе цёрынензэ тетясь...(Весе валрисьметне Т. Разгуляевань).

Синтаксиссэ действительной залогонь глаголтнэнь башка ёнксост ашти сеньсэ: сынст марто алкуксонь тевтеицянть лемдиця валось - валрисьмесэ подлежащей, алкуксонь объектэнть лемдицясь - виде дополнения.

Нетемга: 1. Таргась (Витя) зепстэнзэ ламбамо сюкоро...(виде доп.) (Т. Разгуляева). 2. Проска (подл.) каванизе Мария Сергеевнань (виде доп.) прякадо (виде доп.) ды сывельямдо (виде доп.) (Т. Разгуляева). 3. Неть чувтынетнень (виде доп.) озавтызь школасо тонавтницятне (подл.).

Страдательной залогось[витнемс-петнемс | витнемс-петнемс лисьмапрянзо]

Страдательной залогонть форманзо истят:

а) -в- суффиксэнть вельде теезь глаголт: копача-в-омс (копачамс) - менелесь копачавсь раужо пельсэ; юта-в-омс (ютамс) - окойники кувака кись миненек ютавсь;

б) страдательной залогонь причастият: соказь (сокамс) - паксясь соказь тракторсо; ледезь (ледемс) - тикшесь ледезь пелюмасо; стазь (стамс) панарось стазь маштыця кедьсэ.

Страдательной залогонь форматнень пингстэ тевтеицянть лемдиця валось саи местной эли дательной падежень форма, валрисьмесэ топавты аволь виде (косвенной) дополнениянь тев; объектэнть невтиця валось путови именительной падежень формас, валрисьмесэ ары подлежащеекс. Ёвтазесь нурькинестэ невтеви истя:

алкуксонь тевтеицясь - аволь виде дополнения

алкуксонь объектэсь - подлежащей

Те мекевлангт велявтомась тееви глаголонть формасонзо ды субъектэнь-объектэнь панжиця валтнэнь формасост. Невтемга: Модась вельтявсь ловсо. Модась вельтязь ловсо. Грамматикань коряс тевесь ашти истя: модась - именительной падежсэ, подлежащей, ловсо - местной падежсэ, аволь виде дополнения. Логикань коряс арсеви лиякс: ловось - тевень теиця, сонзэ тевензэ вельде полавтовсь модась, секскак модась - объект.

Местной эли дательной падежень формасо аволь виде дополнениянть улемазо - те страдательной залогонть пек содавикс тешксэзэ.

Местной падежень формась тевс нолдави сестэ, зярдо тевтеицясь - аволь ломанень лем. Невтемга: Сон (Мария Сергеевна) а пек сыре, ансяк удалов пурназь тусто черензэ аламнеде токазь шержесэ... (Т. Разгуляева). Шержесь - алкуксонь тевтеицясь, ялатеке сон аволь подлежащей, сон местной падежсэ аволь виде дополнения.

Улиндеряй тевтеицянть невтиця валось ломанень лем эли сонзэ полавтыця местоимения, дополнениякс сон ары дательной падежень формасо.

Невтемга: 1. Эрьва авантень эсензэ эйкакшозо вечкеви. Авась - тевтеицясь, вечкитясь, ёвтазь дательной падежень формасо, секс сон аволь виде дополнения. 2. Аволь покш атинесь ней монень неявсь покшокс, теке ёвксонь богатырь, конадо пельсь натой толось (Ч. Журавлёв). Мон атиненть неицясь, тевтеицясь; местоимениясь ашти дательной падежень формасо, секс сон аволь виде дополнения.

Действительной ды страдательной залогонь формань кирдиця валрисьметне сюлмазь вейкест-вейкест марто вейкетьксчисэ ды явомасо. Вейкетьксчись - тевс нолдазь валтнэсэ, явовомась - неть валтнэнь форматнесэ ды синтаксисэнь тевсэнть.

Невтемга:

Действительной залог: Пиземесь начты моданть;

пиземесь - им. падежень форма, подлежащей;

моданть - род. падежень форма, виде дополнения;

Страдательной залог: Модась начтови пиземесэнть; Модась начтозь пиземесэнть;

модась - им. падежень форма, подлежащей

пиземесэнть - мест. падежэнь форма, аволь виде дополнения.

Велявтомань (возвратной) залогось[витнемс-петнемс | витнемс-петнемс лисьмапрянзо]

Те глаголонь форма, кона невти тевтееманть эстензэ теицянтень велявтоманзо. Истят глаголтнэнь пингстэ субъектэсь ды объектэсь - вейке секе лицясь (предметэсь).

Велявтомань залогонь глаголтнэ теевить ютыця смусть марто глаголсто -в- суффиксэнть вельде: вачкоде-в-емс (вачкодемс), тока-в-омс (токамс), томба-в-омс (томбамс), эшке-в-емс (эшкемс).

Неть глаголтнэнь тевс нолдамосо вастовить истят башка ёнкст.

  1. Топавтындеряй тевтееманть вейке лиця (предмет), сонензэ велявтыяк тевтеемась. Невтемга: 1. Алёнка эзь кирдеве, ёртозь ёртовсь килеентень ды пиризе вишка рунгинесэнзэ (Т. Разгуляева). 2. Кулясов учизе, зярдо Саша ярсави (А. Брыжинский).
  2. Топавтындеряйть тевтееманть кавто эли седе ламо лицят (предметт), сон кандови эйстэст эрьвантень. Невтемга: 1. Малав колмо иеть уш ютасть, кода теевсть содавиксэкс Петя ды Наташа (А. Брыжинский). 2. Эрзянь ломанть! Пурнавтано раськень од толпандянть перька ды вейсэ серьгедьсынек кезэрень пингень ды од моронок (Ч. Журавлёв)

Тувталонь (понудительной) залогось[витнемс-петнемс | витнемс-петнемс лисьмапрянзо]

Те залогонть глаголтнэ невтить: тевтееманть топавтомга ули тувтал, кинь-бути/мезень-бути меремазо-кармавтомазо.

Тувталонь форматне теевить -вт- суффиксэнть вельде: карма-вт-омс (кармамс), вано-вт-омс (ваномс), леде-вт-емс (ледемс).

Неть глаголтнэнь сехте неявиця башка ёнксост истямо: сынст марто эрцить кавто тевтеицят. Вейкесь эйстэст - подлежащей, сон кармавты объектэнть - виде дополнениянть тевенть топавтомо, лиси, виде дополнениясь секе шкане - тевтеиця (субъект).

Невтемга:

  1. Лиза сыргавтызе стаданть Вечкема латконть ёнов, косо чавсь сиянь кирьксэнь кондямо лисьмапря (Ч. Журавлёв). Лиза - им. падежень форма, тевтеиця-кармавтыця, подлежащей; стаданть - род. падежень форма, объект, виде дополнения; сыргамс тевтееманть топавтызе стадась, секскак, объекттэ башка, те валось невти тевень теицянть лемензэяк.
  2. Пертьпельга касыця чувтотне кенярдовтыть сельметь эсь мазычисэст (А. Брыжинский). Чувтотне - им. падежень форма, теень теиме кармавтыця, подлежащей; сельметь - им. падежень форма, объект, виде дополнения; кенярдыть сельметне, секскак, объектэкс улеманзо марто вейсэ, сельметь валось невти тевень топавтыцянтькак.

Тувталонь невтиця глаголтнэ эрсить аволь виде дополнения мартояк, конат ёвтавить родительной падежень формасо кедьстэ вальмельгаксонть марто: 1. Тейтерень кедьстэ кандовтыть ведь. 2. Цёрат кедьстэ лазновтт пенгеть.

Сёрм.[витнемс-петнемс | витнемс-петнемс лисьмапрянзо]

Мария ИМАЙКИНА, филологиянь наукань кандидат, доцент

Саезь: "СЯТКО", №8 (718), 2017