Боров, Михаил Романович

Михаил Боров
Михаил Боров
чачома лем	Михаил Романович Боров
чачома чись	1896
Чачома тарка	Якстере Лисьмапрят, Бугурусланский уезд[d], Самарская губерния[d], Россиянь империясь;
Кулома чись	панжиковонь 29 чи 1941
Кулома тарка	Киев ош, Украинань Советэнь Социалистической Республикась[d], Советэнь Вейсэндявкс[d];
Мастор	Россиянь империясь; Советэнь Вейсэндявкс[d];
Важодема ёрокчизе	борец
Тетязо	Боров Роман Дмитриевич
Авазо	Борова Евдокия Васильевна
	Михаил Романович Боров

Миша Боров (1896 иестэ Самарань ёнкс Похвистневань буень Якстере Лисьмапрят велесэ - 1941 иестэ панжиковонь 29 чи Киев ошсо ) — бороциця, васенце чемпион Советень Россиянь профессиональной бороцицятьнень (классической стильсэ). Эрзя^[1].

Эстедензэ

Чачсь Михаил Боров 1896 иесэ Самара ёнксонь, Похвистневань буесе Якстере Лисьмапрят^[1] эрзянь велесэ. XIX прядовомсто тесэ эрясть Роман ды Евдокия Боровтне. Сынст ульнесть 5 эйкакшост: Яков, Григорий, Матрена, Никита ды Михаил. Яков ды Михаил ульнесть сехте покштнэ – кавто метрадо седе сэрейть.

Тетязо Роман Дмитриевич ульнесь сэрей (малав 2 метрат ды 15 сантиметрат), обуцянь коряс сэтьме ды арсиця. Авазояк, Евдокия Васильевна – Олда, кода эрзякс мерильть сонензэ, ульнесь тетянть коряс. Авась свал кандтнесь викшнезь эрзянь оршамот ды карксазь пулай. Олда свал морсиль эрзянь морот. Эрзянь аванть ванькс вайгеленть кунсолокшнось весе велесь… Аванзо ёндо Бережковтнэ истяжо шумбральть. Мишань тренерэзэ Ф. Лавренов сёрмадсь:

«Михаилонь дедазо тельня потпанарсо лисиль банянь уштомо ды кепе ютыль баняв парямо ды банястояк – кепе. Мон Мишанень кортан: «Сон превстэ лись?», а Миша ёвтыль: «Минек весе истя теить…»

Весе Боровтне ульнесть паро ломанекс ды сеедьстэ лездыльть стака важодемасо велесэ ломантнененьгак.

Миша Боров – истя мерсть весе малавиксэнзэ. Сон ульнесь васенце изницякс СССР-нь грекень-римень бороцямонть коряс. Васенце чемпион-профессионал! Арседеяк! Эрзянь церантень савкшнось вастовкшномс XX пингень сехте виевтне марто. Истя ульнесть изнязь Иван Поддубный, Осман Абдурахманов, Кристап Вейланд-Шульц, Клеменс Буль, Феофан Лавренов, Федор Кожемяка, Василий Ярков, Сергей Алопский.

Якстере Армиясо Мишанень ковшка эзть муе оршамот. Сон якась карьсэ ды ансяк мейле колмо кемстэ сонензэ стасть вейке. Истяжо весень мельсэ ашти се, кода Михаил Боров лавтово лангсо пулемет марто (60-66 кг.) уйсь лей. Ялганзо неизь, кода тона берёксто Миша лись ведьстэ ды сонзэ копоренть лангсо ульнесь пулеметось, а станинась сюлмазель наразь прянтень.

Кода ледстнесь Н. Г. Жеребцов, Михаил Боров тренировкат тейнесь истя: ёртыль лавтовонзо лангс 500 кг ды истя апак кавтолдо якиль. Содыйтне свал неильть асатыкст сонзэ бороцямосонть, анасяк свал дивасть, кода цёрась вийсэ свал изниль. Эрьва изнямонть мельга сон ёвтыль вейке вал: «Вадря». Рузонь ялгатненень свал марявиль «За зря». Ансяк эрзятне содыльть, кодамо смусть те валсонть. Бороцямонь тевесь кандыль ярмакт. Миша Боров явшилизе велесэ ярмактомотненень. Вана кодамо алкуксонь эрзясь: виев, превей, валдо, раськень вечкиця, тиринь масторонь ванстыця. Истя 1927 иестэ Иван Поддубный лия масторга гастрольтнень мельга самсто энялдсь эрзянь цёрантень полавтомс сонзэ ды ардомс важодеме Америкав. Ансяк тиринь масторонть вечкемась ульнесь певтеме. Миша лиядсь эсензэ тиринь велес.

Эсензэ велестэ сон муизе вечкеманзо, тонавтыцянть Алаксандра Любушкинань. Иень ютазь сынь тейсть свадьба весе эрзянь койтнень коряс. Свадьбантень сакшность ломантне весе маласо велетнестэ. Паз эзь максокшно тенст эйкакшт ды паро эрзятне сайсть эстесть кавто эйкакшт ды максызь весе лембест сынст кастомантень.

Церанть кастызь эрзянь масторось ды эрзянь койтне. Вана истямоль минек эрзянь виесь! Се шкасто саезь эрзятне кортыть: «Миша Боров – сехте здоров! Истямо шумбрачи марто ломанть мастор лангось эзь нейне ды, паряк, зярдояк а неияк. Ды сон ульнесь минек, эрзянь.

Кулось Миша Боров 1941 иень панжиковонь 29 чисте Киев ошсо, калмазь Байковонь калмазырьсе. 1957 иестэ Боровонь Михаилэнь янгазь калмонзо муизь сонзэ ялганзо, ды пудсть кеврунго истят валт марто^[2]:

(эрз. (1869 ие) «РСФСР-нь чемпион, бороциця Боров Михаил Романович. 1896 – 1941»

Оригинальной текст (руз.)

«Чемпион РСФСР, борец Боров Михаил Романович. 1896 – 1941»

Лисьмапрят

↑ ^1,0 ^1,1 «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)
↑ «Мордовский республиканский объединенный краеведческий музей им. И.Д. Воронина». Мордовский исполин (руз.)

[«Эрзянь_Мастор»-1] 1,0 ^1,1 «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)

[МРОКМ_им._И.Д._Воронина_Мордовский_исполин-2] «Мордовский республиканский объединенный краеведческий музей им. И.Д. Воронина». Мордовский исполин (руз.)

[1]

[2]