Атласова, Анна Григорьевна
| Анна Атласова | |
|---|---|
| чачома лем | Анна Григорьевна Атласова |
| Важодема ёрокчизе | морыця |
Анна Григорьевна Атласова (тейтерькс Борисова) — эрзянь морыця.
Эрямо пингезэ
[витнемс | витнемс лисьмапрянть]Чачсь Анна Григорьевна Отяжбуень Таразбиесэ. Моронтень вечкемась сась тензэ вишка пингстэ. Школасо тонавтнемстэ урокто башка яксесь эрьва кодамо кужинев. Ды ялатеке весемеде пек седеезэнзэ педясь моронтень вечкемась. Аня морсесь хорсо, мейле ськамонзояк. Школасо вейкеяк вастовома, чокшнэ эзь ютне сонтемензэ. Фестивальть, ванкшномат, конкурсе — сынст эйсэ пелькстась Аняяк. Кизна лият оймсесть, сон велень лия «артисттнэнь» марто паксява, фермава яксесь. Ков тердьсызь, тов молияк. Тинге лангов — тинге лангов сы, нуиця икеле — нуиця икеле ушоды морамо. Кода сизезь илязт уле ломантне, сынст чамаст валдомильть, зярдо Аня серьгедиль моро. Сонзэ мазый, гайтев вайгелезэ срадыль паксянь келес, токиль эрьвань седейс.
«Келу» седямо пурнавкось
[витнемс | витнемс лисьмапрянть]Эрямонь кизэ ветизе «Келу» седямо пурнавкосньте. Тей сонзэ тердизе композиторось, седемань сёрмадыцясь Г.И. Сураев-Королев, кона се шкасто ульнесь «Келу» седямо пурнавксонть прявтокс. Зярдо кунсолызе Анянь вайгелензэ, сеске цётызе: те тейтеренть эйстэ лиси паро морыця. Композиторось эзь маняво. Курок Аня, ней уш Анна Григорьевна, карми моронь ушодыцякс, шкань ютазь карми морамо ськамонзояк. 1994 иестэ республикань музыкальной искусстванть виевгавтомасо покш путовксонть кисэ сонензэ максозель «Мордовиянь заслуженной артистка» покш лемесь.
Морыцянть уцясказо аволь валаняль. Мезть ансяк арасельть: стакачитькак, изнявксткак. Вейкесь ансяк эзь полавтово: мезе лангскак апак вано, Анна Атласова зярдояк эзизе кадно вечкевикс тевензэ, эзь тукшно кочказь кинзэ лангсто. Сон свал шкинемань вешнемасо, иестэ иес сюпалгавты репертуаронзо. 2004–це иестэ лиссь кассетазо. Те васенце истямо изнявкс, конанень морыцясь мольсь зярыя иеть.
Пакшанзо
[витнемс | витнемс лисьмапрянть]Анна Григорьевнань кенярксозо — эйкакшонзо. Сонзэ кавто тейтерензэ ды кавонест тусть аваст киява. Сынсткак Пазось казинзе морамонь ёрокчисэ. Покшось, Марина, теевсь содавиксэкс. Сон лиснесь изницякс моронь зярыя фестивальсэ. М.Н. Антоновань лемсэ, «Од вий», «Эрзя-мокшонь масторонь фольклорось» эсенек республикань фестивальтнеде башка Марина сайнесь икельце таркат Россиянь дельфийской налксематнесэ (Саратов, 1999 ие), «Нижнеень суркс» (2000 ие), Б.А. Мокроусов лемсэ «Келей Рав лангсо» региональной (2001 ие) ды ламо лия конкурстнэсэ. Тень лангс Марина лоткамо а арси. Сон бажи седеяк сэрей тёкшос. Л.П. Кирюков лемсэ музыкальной училищанть прядомадо мейле поладызе тонавтнеманзо Н.П. Огарёв лемсэ госуниверситетэнь национальной культурань факультетсэ.
Омбоце тейтерезэ Галина тонавтни музыкальной школасо-интернатсо. Машты седямо домрасо, лия седямопельсэ. Лиясто морсияк. Вайгелезэ истямо жо ванькс, мазый, кодамо Маринаньгак. Зярс сон а лисни ськамонзо морамо. Ялатеке ули кемема: сы шкасто Галя поладсы аванзо ды патянзо тевест.
Эсь ютковаст Атласоватне кода оят-ялгат. Кияк киньгак икеле а покшкавтни. Весе кевкстематнень толковакшныть вейсэ. Свал вейке-вейкень чарькодицят, вейке-вейкенень лездыцят. Ават-тейтерть — сынь эсест туртов весе вечкемаст, седей лембест панжить моротнень вельде. Анна Григорьевнанень сехте покш казнекс эрси се, зярдо марясы моронть, кона алтазь аватненень. Сонзэ морси сонськак, Марина тейтерезэяк.
Авай, авай, авинем,
Чивалдынем, ойминем,
Чевте таркань ацыйнем,
Валдо ононь ванстыйнем.
Истя мазыйстэ моронтень вечкеманть ават-тейтерть Атласоватне кандыть эрямовантькак. Кенярдыть сынсь, кенярдовтыть гайтев вайгельсэст ломантненьгак.
Сёрм.:
[витнемс | витнемс лисьмапрянть]- Р. Щанкина «Чилисема» ковставксось №3, 2004 ие. лоп.4