Инешкипаз

Ине́шкипаз (Инешки, Паз, Шкай) — эрзянь ине Паз, Модамасторонь теиця. Инешкипаз валось лиси колмо валсто — "ине" (покш), "шки" (шкамс-теемс - шкиця) ды "паз".

Инешкипазось вейке. Эрзятне мерить Тензэ Инешкипаз, Нишкепаз, Нишке. Мезе Тонь лемсэть? Мезесь ашти Ванстомакс эрзятнень туртов?

Ванстомакс ашти Пертьпельксэсь, конань теизе Инешкипазось. Мейсь Инешкись Ломаненть теизе? Ломанекс, аволь пазонь урекс, Пертьпелксэнть ванстыцякс, идицякс. Ознови-арась эрзя-ломаненть пежетезэ? Арась. Ломанесь озны чумонзо нолдамонь кис, ансяк эрямопингензэ перть канды пежетенть сталмонзо оймесэнзэ, мари чумо пежетенть кувалма. Мереви-арась Ломанентень кандомс зыян Пертьпельксэнтень? Арась. Мекс? Модась — Мастораванть рунгозо. Эрьктне — Ведьаванть сельмензэ, лейтне — сонзэ верьсанонзо. Коштось — Инешкипазонть оймекоштозо. Мереви-арась понгавтнемс мезеяк ломаненть кирьгазонзо? Ансяк аваломаннень кирьгакст, эрьгть, мазылгавтомкат. Кирьгасонзо кандтни тешкст ды килькшт ансяк уресь, аволь Эрзя ломанесь. Мекс Инешкипазось лемдизе Ломаненть Эрзякс? Эрзя — те Эриця, Эрий, Эри "эрямс" ды "эрямо" валтнэстэ. Артокшныть-арась эрзятне Инешкипазонть чаманзо-рунгонзо лаз эли конёв ланга? Эрзятне тейнить ансяк Нишкепазонь-Чипазонь Тешкс. Ули-арась Эрзянь Кемемасонть кияк, кона эряви Инешкипазонтень пшкадемстэ-озномсто? Арась. Эрзянтень а эряви бачкась эли диаконось Инешкипазонтень пшкадемстэ. Эрзянь ломанесь корты Инешкипазонть марто ойместэ оймес. Кие вети вейсэнь озкстнэнь? Вейсэнь (Раськень, Велень, Авань...) Озксонть вети Озатя эли Озава, кона кочкави озксонть ютавтомонзо.

Эрзянь раськенть пазнэнь кемема лувонтень малав 3000 иеть. Пазнэнь кемеманть, оймеёжомарямочинь лувтнэнь ёнкстнэ, нама састь вейсэнь суоми-угрань раськетнень ундокстнэнь нилькстэ. Сеть нилькстнэ вейкеть лия раськетнень Пазнэнь кемема, оймеёжомарямочитнень марто. А мезть сёпомс, малав 2000 иеть, Модамасторонть лангсо азорксчинть саить Авраам Пазмариенть пазнэнь кемема аравтомазо. Авраам Пазмариенть пельде састь истят Пазнэнь кемематне кода Иудаизма, Христианства, Ислам. Авраамонь панжовксонзо нежетекс нама ульнесть седе кезэрень Египетэнь, Шумерень пазнэнь кемема ундокстнэ. Тесэ тешкстасынек сень Библиянть ундоксонзо, лувозо, тешкстазь Шумерень сёвонень сёрмадовкстнэсэ. Секскак меремс те ансяк Авраамонь пельде сазь панжовксось, ули покш ильведьксэкс. Мекс бути стувтовить лия раськетнень Чилисема ёнксонь,Пелеве ды чиньэлькс Американь, Европань пелевеёнксонь, раськетнень ёвтамост, ды пазнэнь кемема лувост. Тешкстасынек сень Авраам Пазмариенть пельде лисезь пазнэнь кемематнеде башка, лията оймеёжомарямочинь ды пазнэнь кемемань лувтнэ яволявтовить авидекс. Мейсэ тувталось? Косо видечись, адядо вейсэ арсесынек, паряк видечинть мусынек.