Эрзят

Эрзянь Раськень коцт

Эрзя (руз. эрзя, эрзяне) — те Эриця, Эрий, Эри «эрямс» ды «эрямо» валтнэстэ; суоми-угрань раське, Уралонь покш семияньте совиця. Эрзятне эрить Мокша ды Сура лейтнень чирева, истяжо Рав ды Ашонь леень ютксо.

Раськень лемезе-смустезэ

Эрзя валонть лемезэ-смустэзе лиси-саеви иранонь-сарматонь кортавиксенте (arsan - атяка, цёра). V пингстэ саезь эрзятне эрить пелеве-чивалгома ёнкссо мокшотнень эйстэ, неень Эрзянень ды Обран ошонь Мастортнева.

961 иестэ эрзя (арта, ариса) лецтяви хагаронь каганатсонть Иосифсэнть кода раське, кона панды каявкс сонензэ. Истя жо Эрзятнеде сёрмалесть пингэньгрэкень географтнэ Страбонось (аорсы) ды Птолемей (арсииты).

Арза - эрзянь мастор, конадонть сёрмали арабонь киньякиця Ибн-Хаукалэсь (X пингэ). Эрзятнеде (арджаны) сёрмалесь Рашид-ад-дин (XIV пинг.); ногаень инязор Юсуфось сёрмалесь о "рзянах" грамотассо (сёрмас содамосо), конань кучизеть Московов 1549 иестэ.

Куншка пигэтнестэ Эрзя — раське, кона каршо моли хазартнэнm ланкс, печенегетнень ды половецтнэнь. Пингэнь чинязось Эрзятнень аштиль мастортнева Сыре Эрзянь (Эрзяни). Лепштевятомасонь, конань кандыльть славянонь раськесь, эрзятне туильть чилисема ёнов — Эрзямас ёнов.

Мокшотнень содавксонть эйстэ, конать 1237 иестэ ве мельс састь кедь алдо Ордатнть эйстэ, Эрзятне туить пелевеёнксов вирьтнэне, ды максыть каршо вий татартненэ.

Сэсте коли суздалень прявтошось куншка XIV пингтнэсте тееви Обран ош (Ало ош) Эрзятне понгсь суздалень инязоронь кеденть алов, ды кой-контне эрзятнедэ рузыясть, кой-конатне тусть седе тов Чилисема ёнов, ды понгсть XVII пингэсте Равоньтомбалев (Заволжье) ды Лембе Уральёнксов (Юж. Приуралье), косо турсь ногайтнень ды калмыкнэнь марто.

Теевема Саратовонь-Оренбургонь-Челябань кирькс нарьдечитнень кармась улеме седе тов молеме эрзятнень Уралов. Ламо эрзянь эрямо таркатне Уралонь Масторга появасть рузонь ломатнень икелев. [1]

Зярдо

Эрзянь ломаньтне кортыть Эрзянь кельсэ. Эрзякс, 2002 иенть ловномасонть-цётомасонть пряст сермадызь 410 000 ломаньть.

Раськень лем

Эсист раське лемест видсте ёвтыть «Эрзя», теде видсте ёвтасть «Эрзянь раськенть алкуксонь лемензэ коряс мельяволявтома»-сонть:

Минь, весе эрзянь раськенть пельде Эрзянь Инекужос кочказь эрзянь ломантне,

— нежелезь ламо тёжаиень эрзянь раськенть эрямопингезэнзэ, мельсэ кирдезь минек покштянок ды сынст койтнень-кирдатнень,

эрзя раськень, эрзя келень ды эрзя культурань вейсэксчинь ёжонь марязь ды кирдезь,

— мельспаросо тешкстнезь кеме эрзянь меленть ды ёжомарямонть уликсчист,

— парсте чарькодезь ды марязь – Эрзя раськенть сы шкань эрямонзо кис мелявксось ней весемезэ ашти неень шкань эрзятнень лавтов лангсо,

— раськеютконь праватнес ды Рузмасторонь Прявткоентень кирдезь, конат идить эрьва ломанень ды эрьва раськень праватнень,

— лия раськень эрямопингест, коест, культураст, келест ды раськень каштанчист мельванозь,

— бажазь улемс Модамасторонь лия раськетнень ютксо улемс-эрямс эсь кезэрень лем ало, норовазь улемс содавиксэкс, эсь питнень содыця ды мариця, эсь мельсэ эриця раськекс,

— лия раськетнень, сынст кирдивийтнень ды ветикуротнень паро мельс ды ялгаксчис кемезь,

— весе эрзянь раськенть мелензэ-бажамонзо ломань сельме икеле невтезь,

яволявттано Эрзя раськенть мельдензэ: панжадо лемдявомс эсь кезэрень лемсэнек – эрзянь раське, эрзя

ды кемекстатано — Эрзянь раськенть улить весе асаевикст эсензэ праванзо лия раськетнень ютксо.

Весе раськетненень Вемельксчинь, Сетьмечинь ды Изнявксчинь арсезь Эрзянь Раськень Инекужось.

[2]

Сёрм.:

• Исследования по материальной культуре мордовского народа. М., 1963; Мокшин Н.Ф. Этническая история мордвы. Саранск, 1977.
• Эрзянь Раськень Инекужось, 1995 ие, эйзюрков, 23 чи. Саран Ош.