Эрзяавань прявельтявкст

Э́рзявань пря́вельтавкст — оршамопельтнень марто эрзя аватне кандтлесть прявельтявкс.

Тейтерькасто прянть вельтильть пацясо, пряссюросо, конань сынь полавтылизь мирденень туемстэ. Прявельтявксонть коряс неявиль, кодамо аванть сюпавчизэ.

Прячерень пурнамось

Аватнень прячересткак пурназельть прявельтявксост коряс. Тейтерь-аватне кодыльть вейке черьпуло, конань нолдылизь кутьмерест ланга. Мирденень лисезь аватнень черест кодазель кавто черьпулос, чертне кекшезельть прявельтявксонть алов. Кода сёрмадыть седе икелень автортнэ, эрзя аватне, васняяк тейтертне, тейнесть прязост ламо черьпулот. Одирьватнень, кода сёрмадсь Майнов, ульнесь комсь ветешка черьпуло, конань пес содозельть понань суреть эрьва кодамо масылгавкс марто (Маннинен 1929:135).

Эрзянь аватне пурнылизь черест коня таркантень вейке черьпулос, сень лангс озавтсть сюронь кондямо панго (Клебанд 1986:45). Пилеюртнэнь видьс менчезь черьпулотненень мерсть сюрот, кавонеск вейсэ саезь черьпулотненень - прясюро.

Прявельтявксне

Эрзянь аванть прявельтявксне ульнесть ауль вейкеть. Те сёрмадоманть пельксенть вансынек, кодат сынь.

Панго

Эрзяватне кандтнесть прясост панго. Панготне теезельть а вейкетьстэ. Ульнесть сюронь кондямо пангот - пшти, мендязь версе пе марто; коймень кондят, конань версе песь седе теенель. Панготнень сэрест ульнесь сатышка, удалгаст ульнесь нурькине пуло, викшневкс марто, мазылгавтозь цитнемасо (Клебанд 1986:45).

Сорока

Истяжо эрзяватнень ульнесь седее лия прявельтявксосткак - сорока, - лапужа оршавкс келей пуло марто, кона нолдазель лавтов ланга. Сорокатне теезевельть а вейкетьстэ - конат седе алкинеть, лапужат, конат куншка видьстэ седе таргазь верев. Кода прявелькс пелесь, истя пулось викшнезельть якстере пона суресэ, ланга чавозельть човалясо, цитнимасо, мазылгавтозь пижень рисьмесэ, сиясо, эрьгесэ (Маннинен 1929:134). Сорокатнень теемаст пек стакаль, сынст теильть паро стыцят.

Рав чиресэ эриця эрзяватне васенцеде путылизь прязост сороканть мирденень лисемстэ, седе мейле сорокась эрявсь пряс путомс эрьва чистэ (Клебанд 1986: 46).

Чехликть, олосник ды пацят

Тенде башка, эрзянь аватне канднесть ситцасто стазь чехлик. Седе тов чехликенть кармасть канднеме паця ало. Чехликенть кондямо прявельтявкс, - олосник аватне путыльть сороканть алов. Се таркатнева, косо седе покшаватне канднесть сорокат ды пангот, - тейтертне, одирьватне путыльть прязост златной, сорокань кондямо прявельтявкс (Белицер 1973: 162). Эрзяватнень ульнесть эрьва кодат пацят – коцтонь паця, понань паця, губовой паця, шаль. Одтейтерькатне канднесть прясуре.