Кривошеева, Ефимия Петровна

Кривошеева, Ефимия Петровна (1867-1936) — эрзянь кельсэ содавикс сёрмадей, валморонь ладсий.

Чачсь Пензань ёнкссонь Кемешкирской буень Тарасовка велесэ сокицянь-видицянь семиясо. Сонзэ ярямонзо вельде парсте неяви се, мезе макссь Советской властесь икеле лепштязь важодиця раськенть шкинеманзо панжовомантень.

Е.П. Кривошеева, сёрмас а содыця авась, сюпалгавтызе эрзянь литературанть од моросо, ёвтнемасо, ёвкссо, конатнень лацесь эрямонзо перть. Сонзэ содыцянзо лецтнить, Ефимия Петровна содась пек ламо раськень морот, кезэрень ёвкст, лайшемат, конатнень сон вечксь ды маштсь ёвтнемест ды морамост кунсолыцятненень. А сонзэ кунсолыцякс ды содыцякс кармась улеме весе минек масторонь ламо раськень раскеть.

Ефимия Петровнань лемензэ минек масторонь ловныцятьне кармасть содамо 1936 иестэ, зярдо «Правда» кулялопасонть рузонь кельсэ ульнесь печатазь «Кировдо лайшемась». Те сёрмадовксось алтазель Коммунистической партиянть инее цёранстэнь Сергей Миронович Кировнень, конань Ленинградсо маштызь раськенть яттне.

«Кировдо лайшемась» поэманть аванзо мальга сёрмадызе эрзянь содавикс валморозеесь Илька Морыця (И.П. Кривошеев). Те поэмась ютавтозь ламо лия раськень кельс. Е.П. Кривошеева эсензэ мелеензэ-превензэ, седейшкавань ёжомарямонзо эрзянь раськенть эрямонзо коряс видестэ невтизе моросонзо, аварькшнемасонзо, лайшемасонзо, конатне лиссть «Лайшемат ды морот» ды «Авань в айгель» пурнавксснесэ. Куломадо мейле сказительницанть весе сёрмадовксонзо нолдазельть башка кирь пусмозо «Е.П. Кривошеева».

Е.П. Кривошеева сюпалгавтызе эрзянь курксто-кургс поэтической шкинемасонзо одс эпитетсэ, сравнениясо, метафорасо, конатнень вельде невти тиринь раськенть эрямонзо кезэрень пингстэ саезь социалистической строенть кемекстмао иетнес. «Истя ульнесь» моросонть сказительницась седей рискс марто ёвтни сеть стака шкатнеде, зярдо эрзятьнень эзть лово ломаньскак, сынь ульнесть «соронь таркас».