Оцинямось

Википедиясто материал - аорев содамкундосто
Перейти к навигации Перейти к поиску

Оцинямось — сехте кезэрень тевтнестэ вейкесь. XVI – XVII пингетнень самс эрзятне пертпельгаст эриця раськетнень ладсо, оцинямо якасть налчирьке марто. XVII пингестэ саезь налчирькетьнень полавтсызь ружиясо. Оцинямонь туртов тейневильть модас каразь латк-туворт, эрьва кодат манямкат-вешкемкат, пистть, килькшт. Якасть оцинямо тонавтозь нармунь (сокол) мартояк.

Оцинясть кода вишкине, истя покш идемка лангскак: чавность урт, чинеметь, нумолот, мият, ведьбачат, ривезть, ласькамот, верьгизт, овтот, идем тувот, сярдт. Идемканть чавсть кода сывелень кисэ, истя питней кедест кисэяк.

Верьгиз лангс оцинямось[витнемс-петнемс | витнемс-петнемс лисьмапрянзо]

Тельня верьгиз лангс оцинясть зярыя эрьва кодамо койсэ. Ванна ансяк вейкесь эйстэст. Тарадсто эли илёвосто кодыльть спиралень парцунсо пирявкс. Те пирявксонть потсо, куншкасонзо, истя жо илёвонь башка клеткасо ульнесь реве эли вирез. Те спираленть-пирявксонтень совамо кенкшесь поводезель кшнань кенкш петькель лангсо верде ды панжовиль ансяк потмо ёнов. Вачомозь верьгизесь, добычань неезь, ардтниль пирявксонть перька, зярс а муилизе шождасто панжовиця кенкшенть. Совиль пирявксонть потс лы пачкодиль ревенть видс.Ансяк каподемс ульнесь а кода: тонань ванстась кеме клеткась. Манявозь верьгизэсь туевельгак тестэ, ды а кодаль: спиралень кондямо пирявксонь теине ютктне эзть максо тензэ велявтомс, ды кенкшеськак, кона панжовиль ансяк потс, кирдилизе сонзэ. Шкань ютазь сыль варштамо оциницясь, ды сонензэ ансяк кадовиль лазомс верьгизэнть эсь сялгсонзо пирявксонь тараднэнь юткова.

Овто лангс оцинямось[витнемс-петнемс | витнемс-петнемс лисьмапрянзо]

Овтотьнень лангс эсь койсэ. Идемканть редязь, оциницясь кочкиль истямо тарка, козонь эрявикс койсэ аравтовиль кавто ёндо пшти оржакс марто покш, «овтонь», пеель. Недезэ теезель истя - маштоволь кеместэ нежедемс мода лангс. Сялго недьсэнть ульнесть кшнинь пштикст эли пеельть: илязо авторя эйзэнзэ овтось ды аволизе синде. Ды ванна виесь мольсь виенть каршо. Лангозонзо эциця идемканть сялгосо кидезь, оциницясь пачтилизеть сонзэ се таркантень, косо кемекстазель пеелесь. Мейле эрязасто ноцковтылизеть сялгонзо ды кирнявтыль ве ёнов. Сялго пштиксэнь пупсематнестэ азаргавтозь овтось, кона бажась пандомс кеженть ды весе вийсэнзэ, весе сталмосонзо нежедсь сялгонть лангс, апак учо ёмавтылизе нежедема тарканть. Тень эйстэ сон прыль анокстазь пееленть лангс, кона домкасто совиль рунгозонзо. Кадовкшнось ансяк маштомс сяврдазь идемканть.

Овтонть каршо лиснесть истяяк. Оциницясь тапардылизе вить ведензэ лавтов видьс пекшее керьсэ, керенть ланга тапардыль вереек кшна – истя жл лавтов видьс. Те кедентень саиль пеель, керш кедьсэнть кирдсь секира – нурька кечке марто пек пшти узере. Зярдо овтось кургонь автезь ды граж вайгельсэ празь-урнозь сыргиль оциникенть лангс, анок ульнесь панксонь панкс раздемс сонзэ, оцинявксось секирасонзо виевстэ вачкоесь икельце пильге лапатьнень ланга, сонсь пеель марто кеденть домкасто ёвкстылизе кургонзо ды керилизе кирьгапарензэ. Ульнесть оциницят, конат пингест перть чавильть пек ламо овтот истямо ладсо ды лиякскак. Шабра раськетне теде содыльть ды мерильть «оцинямс эрзякс».

Седее вишкине идемка да нармунь лангс оцинямсто лездыльть эрьва кодат манямкат-вешкемат - сынст лиясто теильть видьстэ оцинямо молоемстэ. Мертяно, легекс марто (чавто потом) тикшинестэ эли олгинестэ теевиль вешкемине, конастонсть лисиль чеерень цикнемань кондямо кондямо човине вайгельтне. А неявома таркас кекшезь, охотникесь ушодыль эйсэнзэ вешкеме-цикнеме, ды курок сонзэ налось пезныль ривезьс, кона капшиль чееренть кундамо.

Манямонь вешкемасо «тердильть» малов пунятненьгак, локсейтьненьгак. Тень туртов вешкематне тейневильть куз тарадонь моргосто, нармунень толгасто, вишка нармунень ловажинестэ. Локсейтнень «тердильть» кувака – эскельксэнь кувалмокша эли мик седеяк кувака – «локсеень дудкасо», конань теильть вирень чава потмо эчке тикшестэ. Те манямкантень коштонть аволь пувасть – усксть-потясть эсь ёнов. Тень пингстэ лисисльть локсеень вайгель ёнов молиця гайть: «тур-ря, лур-ля, лурлл». Тердеманть марязь., локсейтне ливтильть «ялгантень», тесэ уш учось эйсэст оцинясь.

Локсейтнеде минек таркатьнесэ ульнесть истянь зняро, мик XVII пингенть прядовомось виртнесэ башка таркатнеде мерилть «локсеень кундсема таркатне», кода «миянь пансематне» («бобровые гоны») – миятнень вечкевезь эрямо таркатне – лововсть питнеекс, ды сынст лангс путовиль каявкс, кода сокамо-видема моданить кисэяк. Васня сон пандовиль чирязнэнь, мейле – инязоронтень.


Сёрм.:[витнемс-петнемс | витнемс-петнемс лисьмапрянзо]

  • Брыжинский М.И. Пингень гайть 2007