Беззубова, Фёкла Игнатьевна

Википедиясто материал - аорев содамкундосто
Фёкла Беззубова
чачома лем Фёкла Игнатьевна Беззубова
чачома чись таштамковонь 27 чи 1880(1880-09-27)
Чачома тарка
Кулома чись панжиковонь 12 чи 1966(1966-05-12) (85 иеть)
Кулома тарка
Мастор
Важодема ёрокчизе рассказчик, певец народной музыки
Тетязо Зверков Игнат Павлович
Авазо Зверкова Дарья Алексеевна
казнеть ды медальть

Трудонь Якстере Коцтонь орден, «Почётонь Тешкс» орден, медаль «Доблестень труд кисэ Ине Отечествань Войнассо 1941–1945 иетнестэ»

 Фёкла Игнатьевна Беззубова

Фёкла Игнатьевна Беззубова, кортнема лем: Сёка патя (1880 таштамковонь 26 чистэ Од Мурзасо (Кочкурбуесэ) - 1966 панжиковонь 12 чистэ) — эрзянь кельсэ содавикс ёвксонь морыця-лациця. СССР-нь Сёрмадеень Кужос совиця (1938[1]).

Чачсь 1880-це иень таштамковонь 26 чистэ[2] Од Мурзасо[3] (Кочкурбуесэ). Лемдизь церьковань койсэ Фёклакс. Ансяк эрзятне а вечксызь ф гайтенть, а стяко сонзэ эйсэ ушодовиця валткак кельсэнек, ловт, арасть. Тейтернентень кармасть мереме эрзякс: Сёка. Кияк сестэ, чарькодеви, эзь сода: сон минек сы шкань морыцянок, мазычинь невтицянок.

Кассь тейтересь, максызь мирденень, тусть эйкакшт. Эрямось мольсь а шождасто. Стакачитнеде истякак байтяк ульнесть, текень пес ушодовсь 1914-це иень войнась, мирденть саизь. Мейле революциясь, гражданской войнась. Ансяк неть коволтнэнь энгамомадо мейле, зярдо аламодо сэтьме чудильмас совась эрямось, редязель Сёкань покштояк покш ёрокчизэ: сон содась ламо морот, ёвтамот, одирьвань урнемат-аварькшнемат, мазыйстэ морыль, вадрясто лайшиль, сонськак маштыль моронь ладсеме. Тень пингстэ тунь а содыль сёрмас. Эрзянь сёрмадыцятнень прявтост А.Я. Дорогойченко явсь покш мель ёроков авантень: аравтовтсь мельганзо сёрмадыцят. 1936[4] иестэ нолдазель моронь васенце пусминесь, конань лангсо аштесь лем: Ф.И. Беззубова. Се шкастонть саезь Сёка патясь свалшкас совась эрзянь раськенть эрямозонзо. Ризнэзь-мелявтозь пачтясь сон од пингедензэ:

Од пингем ютась, прок чаво варма,

Од вийнем солась, прок тундонь ловне.

Тень кис сыречизэ ульнесь пек седе уцяскав.



А стяко сыречидензэ Беззубова кортась:

— Куш мон сыречи — тонеть олячи.

Пирянь кинетне ней весе панжовсть,

Пекстазь кенкшкетне ней весе панжовсть.


1941 — 45 тюремань иетнестэ Беззубова ладсесь ёвтамот, морот, конатнесэ невтинзе ломантнень ёжомарямост, фашисттнэнень а вечкеманть. Артистэнь бригадасо сонзэ сайнизь фронтовгак, зярыяксть морась солдаттнэнь икеле.

XX пингенть 50-це иетнестэ, сыречинзэ лангс апак вано, Сёка патясь тонавтнесь ловномо ды сёрмадомо. Теде икеле сонзэ мельга сёрмадыцякс[5] ульнекшнэсть Абрамов, Платонов, Радаев, Карасев, Кавтаськин, Гайни ды цёразо Беззубов Василий. Неень шкане стака мукшномс, кона моротнень кие мельганзо сёрмадынзе: сестэ секретаренть лемензэ эзть тешта, кедьсёрмадовкстнэ эзть ванстово.

Сех содавиксэв «Сталиндэ моронть» лайшемадонть сёрмады Василий Горбунов[6](сёрмадома лувось кадозь авторонть):

Сюпавдояксюпав курксто-куркс раськень шкинеманть ютксто эсест седей лембесэст ды художественной вийсэст явовить сказительтнень ды сказительницатнень морост ды ёвтамост, конат алтазь Лениннэнь ды Сталиннэнь. Сынст характерэст, идейной томкачист ды седеень пек покш лембест чарькодевить «Сталиндэ моронть» кувалт, конань складизе Фёкла Игнатьевна Беззубова. Фёкла Игнатьевна Беззубова, весе эрзянь народонть арсеманзо ды ёжонзо ёвтазь, Сталин ялганть образонзо лови чинть коряс питнейкс. Минек Родинань весе народтнэнь марто вейсэ мордовской народось Сталин ялганть лови эсензэ ине оякс. Сталин ялганть апак лотксе заботанзо кувалт мордовской народонть эрямозо теевсь мазыйкс, сюпавокс ды культурнойкс, секс народонть Сталин ялгантень благодарностень ёжонзо певтеметь. Эрьва труженикесь арси седе, штобу улемс Сталин ялганть великой заботантень достойнойкс. Од авась, васень эйдензэ- нурсезь, тошки тензе питней валт великой ломанденть, кона макссь народонтень валдо, лембе ды счастья; авась прянь шназь корты, што сонзэ цёранзо васень валокс ули народтнэнь. великой оянть лемесь, Сталинэнь лемесь:

Тон кастая, монь цёрынем,
Виевстэ, покшсто,
Кода касы од тумнне
Одс касы вирьсэ.
Икелевгак Сталин валонть.
Тон тень ёвтасак,
Ды сурнэсэнть портретэнзэ
Стенасто невтсак.

(Эрзянь Фольклор, стр. 342.)


Ойнадо мейле ульнесть нолдазь кавто Ф.И. Беззубовань пурнавксонзо[4]: «Одкстомтозь мастор» (руз. «Обыкновенная земля», 1947), ды «Од пиньгень морот» (руз. «Песни нового времени»). Беззубова казезель кавто орденсэ, медальсэ (руз. ордена Трудового Красного Знамени и «Знак Почета»)[2]. 1940 иень умарьковонь 25 чистэ Беззубованьне ульнесь максозь Мордовской АССР-нь раськень морыцянь лем[3].

Кулось Сёка патясь 1966 иень панжиковонь 12-це чистэ. Сонзэ лем ало лиссть 10 книгат[2] эрзянь ды рузонь кельсэ, весемекс 80[4] хормань ёвкст, сондензэ сёрмадозь ламо статьят, косо ванкшновить весе ладсевксэнзэ. Неть книгатне-кирьяпусмотьне улить ловномакудосова-библиотекасо.

Фотокувт[витнемс | витнемс лисьмапрянть]

Лисьмапрят[витнемс лисьмапрянть]

  1. Девяткин, С. Беззубова Фекла Игнатьевна / С. Девяткин // История Мордовии в лицах: Биогр. сб. /Сост. В.С. Лунин; Редкол.: П. Д. Грузнов (отв. ред.), В.С. Лунин (зам. отв. ред.), В. А. Чугунов и др. – Саранск, 1994. – С. 31-32 – ( Тр. НИИ яз., лит., истории и экономики при Совете Министров – Правительстве Респ. Мордовия; Вып. 111. Сер. ист. ISBN 5—7595—1026 —6(руз.)
  2. 2,0 2,1 2,2 МБУК «Кочкуровская ЦРБ» Писатели Кочкуровского района Архивировазь 10 Якшамковонь 2021 иестэ.(руз.)
  3. 3,0 3,1 Время и события. 2010 Библиографический указатель. Указ Главы Республики Мордовия(руз.)
  4. 4,0 4,1 4,2 «Мордовский республиканский объединенный краеведческий музей им. И.Д. Воронина». Памяти сказительницы (руз.)
  5. Библиотека мордовской литературы. Беззубова Фекла Игнатьевна(руз.)
  6. «Изнямо» ЭРЗЯНЬ ХУДОЖЕСТВЕННОЙ ЛИТЕРАТУРАНЬ АЛЬМАНАХ. – 1951 ие. – 10-це №. 198-219 лоп. В. Горбунов Келенть коряс Сталин ялганть тонавтомазо ды мордовской литературнать касомань вопростнэ(эрз.)