Рябовонь, Анатолий Павлович

Википедиясто материал - аорев содамкундосто
Рабовонь Анатолий
чачома лем Анатолий Павлович Рябов
чачома чись чадыковонь 15 чи 1894(1894-04-15)
Чачома тарка
Кулома чись панжиковонь 23 чи 1938(1938-05-23) (44 иеть)
Кулома тарка
Мастор
Важодема ёрокчизе келеньсодый, тонавтыця
Тетязо Павел Тимофеевич Рябов
Авазо Александра Михайловна Рябова (Юрченкова тейтерькс)
Логотип Викитеки Произведения в Викитеке

Анатолий Павлович Рябовонь (1894 чадыковонь 16 чистэ Ламбаське велесэ, Ицялонь буесэ, Мордовия Республикань — 1938 панжиковонь 22 чистэ Саранскойсэ) — эрзянь профессор, ламо келень содыця, васенце Эрзянь букварень пурныця-нолдыця. 1923 иестэ сти Московсо «Сыргозема» вейсэндявксонть прявтокс, ледезь 1938-це иень панжиковонь 23-це чистэ. Рябов, Владимир Павловичень ды Рябова, Софья Павловнань ялаксозо.


Эрямо пингезэ (Биографиязо)[витнемс | витнемс лисьмапрянть]

Рябовонь Анатолий чачсь эрзянь[1] сокиця-видиця семияс, Ламбаське велесэ[2][3]. Велень школанть прядовомадо мейле тетянзо-аванзо кучизь сонзэ тонавтнеме Починковонь духовной училищав, мейле тонавтни Нежинской ошонь тонавтнема таркасо, Украина мастор, косо эсь шкасто тонавтнесь Н.Гоголь.

Тонавтнемазо[витнемс | витнемс лисьмапрянть]

Тетянзо куломадо мейле кадсы семинариясо тонавтнеманть, ансяк, сёксня 1912-це иестэ пек парсте максы экзамент Нежинской педагогической институтонь келень тонавтнема (филологической) факультетс (Украинасо), косо эсь шкасто тонавтнесь Н.Гоголь ды конань Анатолий пек парсте прядсы 1916-це иестэ. Тонавтнемстэ сон кармась содамост латинэнь, англань, украинань, финнэнь, эстониянь ды китаень кельтнень[1]. 4 иеть А. П. Рябов важодсь тонавтыцякс семинариясо, мейле — Нижегородской губерниясо раськень образованиянь отделсэ сотрудникекс. Тесэ сон бажи теемс школасо тонавтнеманть эрзянь ды мокшань кельтнесэ. Активной профессиональной важодемазо эрзятненень ды мокшотненень раськень школа панжома коряс неизь РСФСР-энь Наркомпросонь прогрессивной сотрдниктне, секскак 1924-це иестэ сонзэ тердить Московов важодеме методистэкс Совнацменэнь Центральной Мордовиянь бюров. Московсо свал ульнесь покш мокшонь ды эрзянь томбале эрицятнеде. Тесэ мокшотне ды эрзятне муильть кекшема тарка вачочиденть, революциядо мейле кундсематнеде, свал весе кортасть эсь ютковаст тиринь кельсэ.

Московсо эрямозо[витнемс | витнемс лисьмапрянть]

1923-це иестэ эрзятне ды мокшотне панжить Московсо «Сыргозема» вейсэндявкс[3], покш тарка косо явозель морамо кужотненень, конань прявтокс ульнесь А. П. Рябов. Те хоронть лемс Весесоюзонь пачтямокерьксень (радиосо) морамодо мейле масторонть эрьва пельде сыльть пек ламо сёрмат, конатнесэ ломантне ёвтнесть покш ёжомарямодост эсест кельсэ искусстванть марто вастомадонть, вельть седейсэ моразь эрзянь моротнеде.

Морамотнесэ сеедьстэ ульнесть покш ломантькак, примеркс, искусствасо реформаторось В. Э. Мейерхoльд, кона ульнесь «чавозь» эрзя моротнень мазычисэ. Сон пек вечкилинзе А. П. Рябовонь хоронть эрзянь моротнень.

1926-це иестэ панжови эрзянь ды мокшонь клуб Марьиной Рощасо, прявтокс путозель А. П. Рябов. Те клубось теевсь эрзянь келень, литературань ды культурань центракс. Свал инжекс ульнесть тесэ Артур Моро, Никул Эркай, А. Лукьянов, Яков Григошин, Фёдор Чесноков ды ламо лия сёрмадыцят. А. П. Рябов свал вансь од ломантнень касомаст мельга.

Саран ошсо. Эрзянь келень кепедема шка[витнемс | витнемс лисьмапрянть]

Зярдо теевсь Мордовия автономиясь ды панжовсь Саранск ошсо пединститут, А. П. Рябов сы Саранск ошов, сестэ сон кадызе эсензэ «эйкакшонзо» — хоронзо уш се шкане содавикс эрзя морыцянтень Илларион Яушевнень.

А. П. Рябовонь, кода лингвистэнтень, покш вий макссть вастоматне келень покш содыцятнень Д. В. Бубрихень, Ф. Ф. Советкинэнь ды народонь просветителенть М. Е. Евсевьевень марто. Сон покш тев тейсь эрзянь ды мокшонь тонавтниця-учительтнень 1-це ды 2-це промкстнэнь анокстамосонть ды ютавтомасонть 1924—1925-це иетнестэ. Неть иетнестэ А. П. Рябов аноксты эрзянь школань лездамо пелькст (учебникть). 1926—1927-це иетнестэ ульнесь сон эрзянь келень экспедициясо Лувне ды Кеченьбуе велетнесэ. 1926-це иестэ сон кармась тонавтнеме Востоконь народтнэнь НИИ-нь аспирантурасо. Тосо сон тееви эрзянь ды мокшонь келень покш содыцякс. А. П. Рябовось аноксты эрзянь келень юронть, ванькскавты эрзянь келенть руз валтнэнь эйстэ.

1930 иесте А. Рябовонь кедь алдо лись «Эрзянь-рузонь валкске». Вана мезе кадсь сон эйстэдензэ кавто-колмо вал (пунктуацуиясь ды сёрмадома нормась кадозь):

Те валкскенть мон сёрмадыя 1925-це иестэ. Умоконь тевть... Ламо шка ютась седе мейле. «Яла икелев чуди Сура леесь». Эрзянь кельскак а айшчи ве таркасо. Валкскенть сёрмалыцящояк кайсь эрзянь келенть кувалт. Лиякс де седе ламо сэрмадоволь сон ней. Лиякс нолдавлиньзе «кель пирясо кочказь кснавнэ» валонзо.

Ютазь шкась а мурды. Сави нолдамс мезе ули. Валкскенть ловныцязо иляссо стувто — сон сёрмадозь 1925-це иестэ.

Ламо валт пырнынь Куцян велестэ (Ордань-буень район Мокшэрзянь область). Валтнэнень максозь литературань келень хорма.
Ламо шка ютавтсь, ламо вий рутсь мартон валкскенть сёрмадомсто Демань Поля (П. Ф. Дементьева).

Январь ков 1930-це ие.
Анатолий Рябов[4].


1934-це иестэ эрзянь келень васенце профессоронть А. П. Рябовонь тердизь Мордовской пединститутс мокшонь-эрзянь келень кафедранть прявтокс. А. П. Рябов профессоронть покш питнезэ сеньсэ, што сон васенцеде сёрмадызе ды ловнызе неень шкань эрзянь келень курсонть, методиканть ды сонзэ историянзо.

Мордовской пединститутсо А. П. Рябовонть перька пурназельть учёнойтне (Антонов, Смирнов, Васильев, Макаров) ды студенттнэ (Горбунов, Сигимова, Смолькина, Назаров).

НКВД: «Эрзя ды мокшонь раськетнень ятт»[витнемс | витнемс лисьмапрянть]

«Вельть покш важодемась» мокшо ды эрзянь культуранть кепедемасонть НКВД-нтень неявсь берянь тевкс. 1937-це иень аштемковонь 5-це чистэ ульнесь максозь №4 ордер Рябовонь Анатолиень кудосо вешнеманть коряс. Сонзэ пекстызь, ёвтазь «мокшонь ды эрзянь ятокс». Пекстазель сонзэ низэяк, тонавтыцясь Прасковья Фадеевна, а цёраст Ричард ёртозель ушов.

1937-це иень ацамковонь 17-це чистэнть чумондомасонть мерезель, што сонзэ сиведизь финнэнь ды эстононь шпионтнэ, Дмитрий Бубрих ды Марк. Нама, А. Рябов кодамояк «антисоветской» тевсэ арасель, ялатеке 1938-це иень панжиковонь 23 чистэ[3] ледезель. Калмамо тарказо апак ёвта те шкас.

Омбоцеде чавизь сонзэ кода «раськень ят» 1952-це иень келень конференциясо, кона алтазель келень коряс «Сталинэнь» роботатненень, истя жо ледезельть Мордовиянь ламо лия покш ломанть. СССР-нь Верховной Судонь Военной коллегиясь 1956-це иень сундерьковонь 28-це чистэ полавтызе Верховной Судонь коллегиянь приговоронзо, кона теезель А. П. Рябовонь коряс, секскак тевесь лоткавтозель преступлениянть арасьчинзэ коряс.

А. П. Рябов профессоронть ульнесь нурькине эрямозо, ялатеке сон виензэ максызе эрзянь ломантнень туртов. Сон сёрмадсь малав 30[3] ловномат эрзянь ды мокшонь кельтнень коряс, конатне кандыть те шкас покш лезэ. Минь сюконятано те покш Эрзянь ломанентень, кирдтяно сонзэ мельсэнек — превсэнек.

Вант седе тов:[витнемс | витнемс лисьмапрянть]

Лисьмапрят[витнемс лисьмапрянть]

  1. 1,0 1,1 Н.И. Зараева. Первый мордовский профессор-лингвист (к 120-летию А.П. Рябова)(руз.), (эрз.)
  2. Данильчев Александр Алексеевич «Эрзянско-русский словарик» и «Русско-эрзянский словарь» А. П. Рябова.(руз.), (эрз.)
  3. 3,0 3,1 3,2 3,3 Н.Баюшкин. «Кудо» Эстононь-мокшэрзянь вейсэндявксонть журналозо. 1998, nr. 1 Алтави Анатолий Павлович Рябов профессоронть 104-це иень чачома чинтень(эрз.)
  4. Эрзянь-рузонь валкске. Москов, Центриздат, 1930 А. П. Рябов