Кривошеев, Илья Петрович

Википедиясто материал - аорев содамкундосто
Илька Морыця
чачома лем Илья Петрович Кривошеев
чачома чись медьковонь 19 чи 1898(1898-07-19)
Чачома тарка
Кулома чись таштамковонь 11 чи 1967(1967-09-11) (69 иеть)
Важодема ёрокчизе валморозей
Тетязо Пётр Васильевич
Авазо Ефимия Петровна

Илья Петрович Кривошеев (эрз. Илька Морыця[1]) (1898 иестэ медьковонь 19 чи Саратов ёнкссо Маяк хуторсо - 1967 иестэ таштамковонь 11 чи Ицяло) — эрзянь[2][3] содавикс сёрмадей, валморонь ладсий.

Мордовиянь заслуженной тонавтыцясь И.П.Кривошеев сехте пек содавикс кода Илька Морыця сонзэ пек вадря, гайгиця, морыця стихензэ-валморонзо кувалма.

Эрзянь сёрмадейть И.К.Инжеватов, И.П.Кривошеев, И.С.Поздняев-Сибиряк, В.В.Горбунов

Чачсь 1898 иень медьковонь 19-це чистэ Саратов ёнкссонь Лопатинской буень Маяк хуторсо[4][2]. Тетязо, Пётр Васильевич, кузнецель, авазо, Ефимия Петровна[1], - ульнесь эрзянь содавикс ёвксонь морыцякс-лацицякс (сказительницакс). Сонзэ пельде самай кармаськак содамо сы шкань поэтэсь-валморонь сёрмадыцясь раськень поэзиянть. Эрзянь келенть сон кармась вечкемензэ эйкакшпингестэ. Руз Камешкирэнь училищанть прядомадо мейле тонавтсь школасо эйкакшт, мейле сонсь тонавтнесь. Прядызе Саратовонь университетэнть - сась эрямо Саранскоев, важодсь педтехникумсо. Меельце иетнень перть Илья Петрович анокстась тонавтыцят Ицялонь педучилищасо. 1934 иестэ саезь сон - СССР-нь Сёрмадеень Вейсэндявксонь улиця[5].

Илька Морыця од пингстэ ды авазо Кривошеева Ефимия

Илька морыцянть лиссть кеменде ламо кирьяпусмонзо, сёрмадсь пьесаткак. Эйкакштнень туртов пьесанзо сёрмадозь эрзянь ёвксонь коряс. Васеньце валморонзо тиринь кельсэ «Пакшатненень» («Детям»), «Большевикень вал» («Большевистское слово»), «Лавсень моро» («Колыбельная песня») улнесть публиковазь 1923 иесте «Якстере сокиця» кулялопасонть («Красный пахарь»). 20-це иетнесте сонзэ валморонзо лиснить «Якстере теште» кулялопасонть («Красная звезда»), кона лисниль Московсо, ды Одсибирень кулялопасо «Од эрямо» («Новая жизнь»). 1929 иесте Московсо Центриздатсо лись эрзянь валморозейтнень вейсэнь пурнавкс «Васень сяткт» («Первые искры»), ков совасть зняро-бути валморот Илька Морыцяньгак, конат алтазевсть велень эрямонте, пертпельксэнте, пакшатнене.

Васеньце кирьяпусмонзо Илька Морыцянь «Коммунань толт» («Огни коммуны») лись 1933 иесте «Молодая гвардия» издательствасо. Теке иесте Саранскойсэ лиси омбоце сонзе валморонь пурнавкссозо «Валскень зорява» («На утренней заре»). Юртонь темас сёрмадовкснесэ - од эрямонь самось ды сонзэ кепедстямость. Пек ламо сонзе 30-це иетнень валморонь теемасонзо аштить пертпельксэнь ды пакшань тематне. 1943 иесте лись «Народонь вайгель» («Голос народа») пурнавксозо, конаньсэ валморозеесь кепедсти оймень покшолманзо советеэнь ломатнень.

Ине Туриманть прядоманзо мейле листь: «Монь ким» («Мой путь», 1946), «Тундонь сад» («Весенний сад»,1952), «Монь Родинам» («Моя Родина», 1954), «Избранное» (рузонь кельсэ, 1955), «Стихть ды поэмат» (1958), «Славан эрямонть» («Славлю жизнь», 1963), «Кеман эрямос» («Верю в жизнь», 1967), «Морамонь ким» («Мой песенный путь», 1968)

Кулось таштамковонь 11 чи 1967 иесте, калмазь Ицялосо, тосо путозь кеврунго валморозееньтень.

Лисьм.:[витнемс | витнемс лисьмапрянть]

  1. 1,0 1,1 Библиотека Мордовской литературы: Кривошеев Илья Петрович (Илька Морыця) (руз.)
  2. 2,0 2,1 МАЯК Лопатинского района Пензенской области Архивировазь 7 Умарьковонь 2018 иестэ. (руз.)
  3. ЛИТЕРАТУРНОЕ ТВОРЧЕСТВО ЗУБОВОПОЛЯНЦЕВ (руз.)
  4. Большая советская энциклопедия: Кривошеев Илья Петрович (руз.)
  5. Городские рейтинги. Самые древние жилые дома Саранска (руз.)