Каррик, Вильям Андреевич

Википедиясто материал - аорев содамкундосто
Каррик, Вильям Андреевич
Портрет
чачома чись ацамковонь 31 чи 1827(1827-12-31)[1][2][3][…]
Чачома тарка
Кулома чись сундерьковонь 11 чи 1878(1878-11-11)[4] (50 иеть)
Кулома тарка
Мастор
Важодема ёрокчизе фотокувтеий
 Вильям Андреевич Каррик

Вильям (Василий) Андреевич Каррик (англ. William Carrick; 1827—1878) — Шотландиянь ды Рузонь Империянь артыця ды фотокувонь теиця, Англань масторонь гражданин.

Эрямозо[витнемс | витнемс лисьмапрянть]

Вильям чачсь Шотландиясо, прявт ошсо – Эдинбургсо, тетязо - Эндрю Каррик - микшнесь вирь. Сон кувать эрясь Ине-Петрань ошсо, Рузонь Империясо. Тетянзо тетясь 1790 иетнестэ ульнесь содавикс Лондононь биржасо, кода «купец из Петербурга». 1825 иестэ Шотландияв ардомсто Эндрю-тетязо каршовастызе 15-иень Джесси Лаудерэнь. Сынь венчасть 1827 иестэ, ды сынст чачсь цёрыне – Вильям. Зярдо Вильямнэнь топодсть зярыя таргот, раськезэ тусь эрямо Кронштадтов, Рузонь Империяв. Тосо сынь эрясть 16 иеть.

1844 иестэ Каррик месть тусть эрямо Ине-Петрань ошов. Тосо Вильям кармась тонавтнеме Художествань Академиясо архитектура. Тонавтыцязо ульнесь Александр Брюллов (Брюллов артыцянть лелязо). Ансяк седе пек Вильям правтсь артома ёнов. 1853 иестэ прядызе Академиянть ды тензэ макссть конёв, косо сон сёрмадозель кода «внеклассный художник с правом производить строения». Теде мельга сон сыргась Римев седе тов тонавтнеме. Секе шкане кармась Крымень войнась ды вирень микшнемась лоткась: весе венчень аштема таркатне пекстазельть. Раськенть ярмактнэ маштсть. 1856 иестэ сон аламос велявтсь Ине-Петрань ошонтень, а 1857 иестэ, кизна, тусь ялаксонзо - Джордж - марто Эдинбургов, косо Джордж арсесь поступамс лечицякс тонавтнеме. А Вильямень мелезэ ульнесь кармамс тонавтнеме фотокувонь теицякс.

Эдинбургсо сон теевсь содавиксэкс Джон Мак-Грегор марто, конась ульнесь фототехникекс. 1857 иестэ сон сась Каррик мельга Рузонь масторов. Аламо шкань ютазь 1859 иестэ Каррик - васенцекс Рузонь масторсо, Ине-Петрань ошсо - панжсь "фотоателье". Аштема тарказо ульнесь Малая Морская курось, 19.1. кудось. Сон куроксто теевсь содавиксэкс. Снимсесь эрьвачинь эрямонть, тень кувалт кармась васенцекс Рузонь масторсо этнографокс-фотокувонь теицякс. 1862 иестэ Николай Александрович Ине Чирязось (Александр II-цень цёразо), теевтсь В.Каррикень кедьстэ фотокув. Фотокувось пек тензэ мельс тусь ды секень кисэ сон казсь В.Каррикнень суркс бриллиант марто. 1865 иестэ Михаил Зичи (Венгрань масторонь граф), конась ульнесь царень артыцякс, пшкадсь Каррикнень снимамс сонзэ артовксонзо. Не ламовгавтозь фотокувтнэ, косо ульнесть царесь ды сонзэ малавиксэнзэ, мейле микшневсть лавкатнева.

Истя Каррикень марто кармасть важодеме истят содавикс артыцят кода - Иван Крамской, Виктор Васнецов и Николай Ге. 1869 иестэ ульнесь ютавтозь Москов ошсо сонзэ васенце важодемань невтевкс. Каррик ды Мак-Грегор зярыя кирда якасть губерниява. 1871 иестэ сынь цела ков ульнесть Симбирской губерниясо. Тосо теезель пек ламо фотокувт рузонь, эрзянь, татаронь, чувашонь сокиця-видицятнеде. Фотокувтнэ теезельть кудо-ютконь тевень теемстэ: ведень кандомсто, калонь кундамсто, текень вельде невтевтсь ломантнень эрьвачинь эрямось. 1872 иестэ Мак-Грегор кулось. Каррик ёмавтызе ялганзо, конанть марто тейсть вейке тев. 1872 иестэ Лондонсо ютавтозель омбомасторонь фотокувонь невтема, тосояк ульнесть Каррикень фотокувонзо.

Кизна 1875 иестэ Каррик таго сась Симбирской губернияв. Истя жо снимсесь эрзят, рузт. 1876 иестэ сон кармась Академия Художествань фотокувонь теицякс ды тензэ макссть тосо студия. 1878 иестэ Парижсэ теезель сонзэ фотокувонь невтема.

Carrick, Kamenka Fair

Вильям Каррик кулось 11.11.1878 иестэ Ине-Петрань ошсо пневмониядо. Калмазь Смоленской калмозэрьсэ. Калмозо эзь ванстово.

Ламо негативензэ аштить ломанень кедьга. Сехте ламо – 200 фотокувт – аштить Лондонсо, братонзо нуцькань кедсэ – Фелисити Эшби. Зярыя фотокувт кирди Соммер Эрх коллекционерось. 70 фотокувт - Публичной библиотекасо Ине-Петрань ошсо. Пек ламо фотокувт аштить Женевасо, Л.Варнеке артыцясь раминзе сынст Каррик кедстэ 1876 иестэ.

Раськезэ[витнемс | витнемс лисьмапрянть]

Вильям Каррик ульнесь урьвакстозь А. Г.Маркелова – ютавтыця лангс. Сынст ульнесть кавто цёраст: Дмитрий ды Валерий. Теде башка сон теевтизе эсь цёракс А.Г.Маркеловань цёранзо (васенце венчамонь эйкакшонзо) – Григориень. Григорий истяжо кармась фотокувонь теицякс, Валерий – содавикс карикатуристэкс. Сонзэ низэ – Александра – ульнесь либералокс ды нигилисткакс, сон ульнесь вейкине тейтерьава – журналистка се шкане, важодсь «Санкт-Петербургские ведомости» кулялопасо.

Фелисити Эшби - братонзо нуцька, кармась В.Каррикень тевензэ ванстыцякс ды популяризаторокс. Эрясь Эдинбургсо, Шотландиясо. 1980 иетнестэ сон сёрмадсь "Советское фото" журналонтень кавто а покш сёрмадовкст В. Каррикде, конатне одс панжизь ломантненень те лементь.

Лисьмапрят[витнемс лисьмапрянть]

  1. Bibliothèque nationale de France идентификатор BNF (фр.): اوپن ڈیٹا پلیٹ فارم, платформа відкритих даних, платформа открытых данных, plateforme de données ouvertes, piattaforma di dati aperti, Opendata-Plattform, otevřená data platforma, åben-data-platform, տվյալների բաց շտեմարան, platforma za odprte podatke, plataforma de datos abierta, plataforma de dados aberta, платформа адкрытых даных, платформа на отворените данни, platforma otwartych danych, ашық деректер платформасы, ачык маалыматтарды платформа, açıq məlumat platforması, ochiq ma'lumotlar platforma, açık verilerin platformu, платформа отвореног података, platforma otvorenih podataka, platforma otvorenog podataka, platforma otvorených údajov, πλατφόρμα ανοικτών δεδομένων, platformu atklātā datu, platforma atvira duomenų, platvormi avatud andmete, avoimen datan foorumi, nyílt adatok platformja, პლატფორმა ღია მონაცემები, платформа за отворени податоци, нээлттэй мэдээллийн тавцан, platformă de date deschise, platformo de malferma datumoj, open data platform, плятформа адкрытых зьвестак, Усьтэм даннойёслэн платформазы, асыҡ мәғлүмәт платформаһы, açıq malümat platforması, açıq malümat platforması, ачык малюмат платформасы, öppen dataplattform, платформаи додаҳои боз, ачык кӧргӱзӱлердиҥ платформазы, гом бæрæггæнæнты платформæ — 2011.
  2. William Carrick (нидерл.)
  3. https://www.kulturarv.dk/kid/VisKunstner.do?kunstnerId=35505 (дат.)
  4. SNAC (англ.) — 2010.
  5. 5,0 5,1 Deutsche Nationalbibliothek Record #1020772204 // Общий нормативный контроль (GND) (нем.) — 2012—2016.