Агеев, Евгений Иванович

Википедиясто материал - аорев содамкундосто
Еня Агеев
чачома лем Евгений Иванович Агеев
чачома чись якшамковонь 16 чи 1922(1922-01-16)
Чачома тарка
Кулома чись эйзюрковонь 5 чи 1943(1943-03-05) (21 ие)
Важодема ёрокчизе сёрмадей, валморозей

Агеев Евгений Иванович (1922 якшамковонь 16 чи Мордовиянь Тумобуень Кобалесэ — 1943 эйзюрковонь 5 чи) — эрзянь[1] сёрмадей.

Эстедензэ[витнемс | витнемс лисьмапрянть]

Тумо буень сёрмадеень фотокувост. Агеев Ёня ало керш ёно

Чачсь Евгений Агеев Мордовиянь Тумобуень Кобалесэ 1922иень якшамковонь 16 чистэ. Сисем иесэ тусь школав. Тонавтнесь парсте, шныльть эйсэнзэ. Котоце классо кармась сёрмалеме кулялопас. Сыль кулялопась сонзэ сёрмадовкскензэ марто — кециль, аноколь киштемс, курго — пиледе пилес. Мейле кундась валморос-стихс, кармась кучнемест «Пионерэнь вайгель» ковставкс, «Ленинэнь киява», «Эрзянь коммуна» кулялопатнес. Тосо ульнесть печатазь зярыя стихензэ-валморонзо, ёвксонзо, ёвтнеманзо. Шка сась — кармасть тердтнемензэ юнкоронь промксов-конференцияв.

Мезеяк эзь кадово пельдензэ: а эйкакшке, а калмине. Ансяк ветешка-котошка сёрминеть, зяро-бути фотокувт ды… стих-валморо марто тетрадь. Фронтов туемстэ Еня (истя мерсть Женянень кудосо) кутмордызе аванзо ды тошказевсь:

«Бути мезе, авай… ванстыть неть тетрадтнень. Энялдан…».


Ушосонть ульнесь 1941-це иень тарьксэв сёксь. Фронтсто сеедьстэ кучнесь кудов сёрмат, секе тев кевкстнесь: кода тынь тосо? Мелявтсь аванзо-тетянзо, ялаксонзо-сазоронзо кисэ. Эсь прядонзо сёрмадсь нурькинестэ:

«Монь тевтне парт, истожатано фашисттнэнь…».


Меельце сёрманзо ало шкаськак — 1943 иень эйзюрковонь 5 чи. Седе тов — а куш а каш. Мейле тетянзо-аванзо туртов сась раужо куля. Сынст батальононь санитаркась пачтясь:

«…блиндажс, косо ульнесь Тынк цёранк, радистэсь, старшей сержантось Агеев Евгений Иванович, понгсь ятонь снаряд. Цёранк маштовсь…».


Кувать калгодо вармась Енянь таркас вачкоесь тиринь кудонзо вальмас, соракавтнесь аванзо. Ансяк эзь учово Еня, эзь са…

Куломадонзо икеле Евгений Агеевень авазо, Наталья Степановна, максынзе ломань вельде Енянь тетрадензэ Саранскоев, кемсь: паряк, печатыть зярояк стихть. Илизь стувто седей покольнензэ, содаст ломантне, кодамоль сон: чевте ойме, мелень ваныця, превей.

Кода ёвтнесь сазорозо, Софья Ивановна Бровцева (Агеева) (1923—2004): "эрзянь кулялопань вейс ставкстнэнь Еня яла кирдсь пряпесэнзэ, чокшне ланга ламо ловнось ды сёрмадсь. Вейксэ класстнэнь прядомадо мейле ушодсь тонавтомо Дубинкань школасо: ярмакт эрявсть семиянтень, косо ульнесть сисем эйкакшт. Чокшне ланга якиль од сёрмадыцянь курынев: оймесь бажась морос, вешнесь поэзияс чарькодиця ломань. Истямокс тензэ ульнесь Андрей Юргай (Андрей Сафронов) эрзянь поэтэсь — мазый, сэрей цёрась. Сонгак важодсь тонавтыцякс ды теке марто ветясь сёрмадыцянь курыненть. Зяро ломанть пурнавильть! Кандыльть: кие ёвтнемине, кие ёвкске-кавкске, кие стихть, кие истяко сыль кунсоломо. Покш кемемат ульнесть Еня лангс — сонзэ валморонзо-стихензэ вадряльть. Виев валморазей эйстэнзэ лисевель".
Неень шкане не тетрадьтнэ ванстовить Саранскоень прявт архивсэ.


Лисьмапрят[витнемс лисьмапрянть]

  1. Алешкин, А. Агеев Евгений Иванович / А. Алешкин // История Мордовии в лицах: биогр. сб. / НИИ яз., лит., истории и экономики при Правительстве Респ. Мордовия; сост.: П. Д. Грузнов, В. А. Чугунов; редкол.: П. Д. Грузнов (отв. ред.), В. А. Чугунов (зам. отв. ред.), И. Г. Кильдюшкина и др. – Саранск, 1997. – [Кн. 2]. – С. 8–9. ISBN 5—7493—0100 —1(руз.)